Levítas tegma apkelyawe apagkok
(1 Cr 6.54-81)1-2 Apkelmahágkek axta apkelámha apmonye'e nak chá'a nepyeseksa aphawóxama levitas ma'a Siló, yókxexma nak Canaán, yaqwayam elpaqhetchesakpohok ma'a apkelmaxnéssesso Dios énxet'ák apagkok Eleazar, Josué tén han ma'a apkelámha apmonye'e nak chá'a énxet'ák apagkok israelitas. Axta aptáhak apkeláneya s'e: “Apkeltamhók axta hegmések negko'o Wesse' egegkok tegma apkelyawe yaqwánxa aghakha, Moisés axta eyke apchásenneykxa', yetlo yókxexma ektaqmelakxa nak pa'at, yaqwayam katawagkok nennaqtósso.” 3 Keñe axta énxet'ák Israel apkelmeyásegko pók xama m'a tegma apkelyawe apagkok apagko' nak, yetlo m'a yókxexma ektaqmelakxa nak pa'at, apkeltémókxa axta etnahágkok ma'a Wesse' egegkok.
4 Tawásexcheyk axta sekxók xama aqsok peya elxawagkok xapop ma'a levitas apnámakkok, Quehat axta aptawán'ák neptámen. Trece tegma apkelyawe axta han apkelxawágkok ma'a quehatitas, Aarón axta aptawán'ák neptámen, apteme axta apkelmaxnéssesso Dios énxet'ák apagkok, apkeleñama axta nepyeseksa m'a Judá énxet'ák apagkok, Simeón tén han Benjamín énxet'ák apagkok. 5 Diez tegma apkelyawe axta han apkelxawágkok ma'a pók quehatitas, apkeleñama axta nepyeseksa m'a Efraín énxet'ák apagkok, Dan, keñe han ma'a nápakha nak Manasés énxet'ák apagkok. 6 Keñe axta natámen xa, élpehewokmo apkelxawéyak trece tegma apkelyawe m'a levitas, Guersón axta aptawán'ák neptámen, ektáha axta apagkok ma'a Isacar énxet'ák apagkok, Aser, tén han Neftalí, keñe han ma'a nápakha nak Manasés énxet'ák apagkok, apheykencha'a axta m'a Basán. 7 Tén ma'a levitas, Merarí axta aptawán'ák neptámen, élpehewokmo apkelxawéyak ma'a doce tegma apkelyawe, ektáha axta apagkok ma'a Rubén énxet'ák apagkok, Gad, tén han ma'a Zabulón énxet'ák apagkok.
8 Xama aqsok axta aptawásegkok israelitas apkelmeyásegko levitas ma'a tegma apkelyawe, tén han yókxexma ektaqmelakxa nak pa'at, apkeltémókxa axta etnahágkok ma'a Wesse' egegkok, eñama apchásenneykekxa m'a Moisés. 9 Keso tegma apkelyawe apkelmeyáseyak axta énxet'ák Judá tén han ma'a Simeón énxet'ák apagkok, 10 ekpayhawo axta apkelxawéyak ma'a levitas, apkeleñama axta nepyeseksa m'a Quehat apnámakkok, Aarón axta aptawán'ák neptámen, hakte apmonye'e axta chaqhawok apkelxawéyak xapop ma'a. 11 Apkelxawágkek axta m'a Hebrón, yókxexma ekxámakxa nak meteymog élekhahéyak ma'a Judá, cham'a tegma apyawe apagkok axta m'a Anac aptawán'ák neptámen, xama énxet apwenaqte axta, yetlo m'a yókxexma ektaqmelakxa nak pa'at. 12 Keñe m'a xapop tén han tegma apketkók aphéyak axta nepyáwa' m'a tegma apwányam nak, kélmésa yaqwayam etnehek apagkok ma'a Caleb, Jefuné axta apketche.
13 Apkelxaweykegkek axta Aarón aptawán'ák neptámen ma'a Hebrón, apteme axta apkelmaxnéssesso Dios énxet'ák apagkok, cham'a tegma apwányam apkelyexánegweykekxexa axta chá'a énxet apchaqhe pók, apkelxaweykegkek axta han se'e tegma apkelyawe nak: cham'a Libná, 14 Jatir, Estemoa, 15 Holón, Debir, 16 Ain, Jutá tén han Bet-semes. Cháxa nueve tegma apkelyawe nak, yetneyk axta chá'a apagkok apagko' ma'a yókxexma ektaqmelakxa nak pa'at. 17 Kélmeyásegkek axta han ma'a Gabaón, Gueba, apagkok axta m'a Benjamín énxet'ák apagkok, 18 tén han Anatot keñe han ma'a Almón, cuatro axta apyókxoho tegma apkelyawe yetlo m'a apagkok apagko' nak chá'a yókxexma ektaqmelakxa nak pa'at. 19 Trece tegma apkelyawe axta apkelxawágkok ma'a Aarón aptawán'ák neptámen, apteme axta apkelmaxnéssesso Dios énxet'ák apagkok, xama axta chá'a apagkok apagko' ma'a yókxexma ektaqmelakxa nak pa'at.
20 Keñe axta m'a pók levitas, Quehat axta aptawán'ák neptámen, kélmeyásegko m'a tegma apkelyawe apagkok axta m'a Efraín nak énxet'ák apagkok. 21 Keñe axta egkexe nak Efraín kélmésa m'a Siquem, yaqwayam etnehek apyexánegweykekxexa chá'a énxet ektáha enxoho apchaqhe pók, tén axta han ma'a Guézer, 22 Quibsaim tén han Bet-horón, cuatro tegma apkelyawe, yetlo m'a apagkok apagko' nak chá'a yókxexma ektaqmelakxa nak pa'at. 23 Keñe m'a Dan énxet'ák apagkok axta xapop apagkok, kélmésa m'a tegma apkelyawe nak Eltequé, Guibetón, 24 Aialón tén han ma'a Gat-rimón, cuatro axta tegma apkelyawe yetlo m'a yókxexma ektaqmelakxa nak pa'at; 25 tén axta m'a nápakha nak Manasés énxet'ák xapop apagkok, kélmésa apqánet tegma apkelyawe, cham'a Taanac keñe han Gat-rimón, yetlo m'a yókxexma ektaqmelakxa nak pa'at; 26 diez axta apyókxoho tegma apkelyawe apagkok ma'a quehatitas apnámakkok, yetlo m'a apagkok apagko' nak chá'a yókxexma ektaqmelakxa nak pa'at.
27 Keñe axta m'a levitas, Guersón axta aptawán'ák neptámen, kélmésa m'a apqánet tegma apkelyawe, apagkok axta m'a nápakha nak Manasés énxet'ák apagkok, yetlo m'a apagkok apagko' nak chá'a yókxexma ektaqmelakxa nak pa'at: cham'a Golán, apyetnama nak ma'a Basán, yaqwayam enxoho etnéssesek tegma apwányam apyexánegweykekxexa chá'a énxet'ák, keñe han ma'a Beesterá. 28 Keñe m'a Isacar énxet'ák axta xapop apagkok, kélmésa m'a Quisión, Daberat, 29 Jarmut tén han ma'a En-ganim, cuatro tegma apkelyawe yetlo m'a apagkok apagko' nak chá'a yókxexma ektaqmelakxa nak pa'at. 30 Keñe m'a Aser énxet'ák axta xapop apagkok, kélmésa m'a Misael, Abdón, 31 Helcat tén han ma'a Rehob, cuatro tegma apkelyawe yetlo m'a apagkok apagko' nak chá'a yókxexma ektaqmelakxa nak pa'at. 32 Keñe m'a Neftalí axta énxet'ák xapop apagkok, kélmésa apqántánxo tegma apkelyawe yetlo m'a apagkok apagko' nak chá'a yókxexma ektaqmelakxa nak pa'at: cham'a Quedes, apyetnama nak ma'a Galilea, yaqwayam etnéssesek tegma apwányam apkelyexánegweykekxexa chá'a énxet'ák, tén han ma'a Hamot-dor tén han Cartán; 33 trece axta apyókxoho tegma apkelyawe apagkok ma'a guersonitas apnámakkok, xama axta chá'a apagkok apagko' ma'a yókxexma ektaqmelakxa nak pa'at.
34 Keñe m'a Zabulón axta énxet'ák xapop apagkok, kélmésa m'a pók levitas melxawéyak axta makham xapop apagkok, Merarí axta aptawán'ák neptámen, cham'a tegma apkelyawe nak Jocneam, Cartá, 35 Dimná tén han ma'a Nahalal, cuatro tegma apkelyawe yetlo m'a apagkok apagko' nak chá'a yókxexma ektaqmelakxa nak pa'at. 36 Keñe m'a Rubén axta énxet'ák xapop apagkok, kélmésa m'a tegma apkelyawe nak Béser, Jahas, 37 Cademot tén han ma'a Mefáat, cuatro tegma apkelyawe yetlo m'a apagkok apagko' nak chá'a yókxexma ektaqmelakxa nak pa'at. 38 Keñe m'a Gad énxet'ák axta xapop apagkok, kélmésa m'a tegma apkelyawe nak Ramot nak Galaad, yaqwayam etnéssesek tegma apwányam apkelyexánegweykekxexa chá'a énxet'ák, tén han ma'a Mahanaim, 39 Hesbón tén han Jazer, cuatro tegma apkelyawe yetlo m'a apagkok apagko' nak chá'a yókxexma ektaqmelakxa nak pa'at. 40 Doce axta apyókxoho tegma apkelyawe ekpehewokmo apkelxawéyak ma'a levitas, melxawéyak axta xapop apagkok ma'a sekxók axta, cham'a Merarí axta aptawán'ák neptámen.
41 Cuarenta y ocho axta apyókxoho tegma apkelyawe apagkok levitas aphéyak axta m'a kañe' nak énxet'ák Israel xapop apagkok, yetlo m'a apagkok apagko' nak chá'a m'a yókxexma ektaqmelakxa nak pa'at, 42 wakheykekxeyk axta chá'a m'a tegma apkelyawe nak. Axta temék chá'a m'a apyókxoho tegma apkelyawe nak.
Wesse' egegkok apteme mehegyenyaweykha
43 Cháxa aptémakxa axta Wesse' egegkok apkelmeyáseykegko israelitas ekyókxoho xapop, apkeltennassama axta naqsók agko' egkések ma'a apyapmeyk nano'. Apmomchek axta m'a keñe apkelheykmo. 44 Apkelánéyak axta Wesse' egegkok ma'a apxeyenma axta elána', aptaqmelchessáseykekxeyk axta han apheykha m'a ekyókxoho apheykegkaxa nak. Mopwanchek axta apmáheyo elenmexekxak chá'a m'a apkelenmexma nak, hakte apkelmallanchessegkek axta Wesse' egegkok nepyeseksa m'a apkelenmexma. 45 Temegkek axta ekyókxoho m'a aptémakxa axta appeywa Wesse' egegkok apxeyenmakxa axta etnéssesek ektaqmela israelitas.
© © Enxet Lengua Sur Bible © Paraguayan Bible Society, 2015.