Jonás aplo
1 Aplókek axta Jonás apwet'a apteméssesakxa Dios ma'a énxet'ák, axta kalchak apwáxok. 2 Tén axta appaqhetchesa Wesse' egegkok aptáha apkelmaxnagko s'e:
—Wesse', cháxa sekxeyenma axta chá'a ko'o katnehek xa, sekhamakxa axta makham ma'a seyókxa. Axta keñamak sekmáheyo heykxe ko'o axyenmok amhagkok ma'a Tarsis, hakte ekya'ásegkók ko'o exchep apteme Dios ektaqmeleykha apwáxok henlano', tén han apmopyósa henlano', mepekhésamap elwok, awanhek nahan segásekhayo, exének chá'a ellegássesagkohok énxet'ák, keñe elwátessók chá'a. 3 Cháxa keñamak séltamho nak ko'o hemasséssók xép Wesse', tásek ko'o watsapok, kaxnók aweynchamha chá'a.
4 Aptáhak axta Wesse' egegkok apchátegmowágko s'e:
—¿Táseya aptáhakxa, aptáha nak aplawa xa ektáha nak?
5 Aptekkek axta Jonás ma'a nepyeseksa nak tegma apwányam, appakxenwokmek axta m'a ekpayhókxa nak ekteyapmakxa ekhem nepyáwa tegma apwányam. Axta apkelánegwokmok xama appakxanma yámet áwa' m'a, tén axta apha kóneg pessesse agkok, apkelhaxna etagkohok yaqwánxa katnehek ma'a tegma apwányam. 6 Keñe axta Dios aptekkesa xama élyaw'áwa' aphakxa m'a Jonás, yaqwayam enxoho kápok pessesse agkok, yaqwayam enxoho exek ektaqmalma agko' ma'a kóneg. Payhekxeyk axta apwáxok apwet'a Jonás ma'a yámet nak. 7 Keñe axta élsaka, apkeltamho katwok askok Dios ma'a élyaw'áwa' nak, kelyamakak axta áwa'. 8 Xama axta ekwa'a néten ekhem, apkeltamhók axta kaxchahák Dios ekmexanma eñama m'a ekteyapmakxa ekhem, apwetágkok axta peya kápok ma'a Jonás hakte payhawók axta ekmexanma m'a aphakxa, apkeltamhók axta yetsapok.
—Tásek ko'o watsapok, kaxnók aweynchamha chá'a— axta aptáhak. 9 Aptáhak axta Dios apchátegmowágko s'e:
—¿Táseya aptáhakxa, aptáha nak aplawa xa ektáha nak, eñama ekyamaye m'a élyaw'áwa' nak?
—¡Táse' neykhe sektáha seklawa xa ektáha nak! —axta aptáhak Jonás apchátegmowágko— ¡Peyk ko'o watsapok seklo!
10 Tén axta Wesse' egegkok aptáha apchátegmowágko s'e:
—Háwe exchep apkeneykekxa élyaw'áwa', háwe han apwánegkesso; xama axta'a tépak, keñe mók axta'a étsapa, chaqhak aqsa apwáxok apkelano. 11 Ekyágwánxa agkok ko'o apyósekak alanok ma'a énxet'ák Nínive, tegma apwányam apheykegkaxa nak ciento veinte mil sakcha'a meyke apkeltémakxa, tén han ekxámokma agko' ma'a aqsok kélnaqtósso.
© © Enxet Lengua Sur Bible © Paraguayan Bible Society, 2015.