Sawa' aptawáseykha aqsok kélcheneykekxa
1 Keso appeywa apkeltennasa axta Wesse' egegkok ma'a Joel, Petuel apketche.
2 Kéxegke kélámha
kélmonye'e nak,
kóltaqmelchesho kélháxenmo s'e,
tén han kélyókxoho
kélheykha nak apchókxa'.
¿Kélweteyaya axta
kéxegke ekhémo xa
aqsok nak?
¿Apkelweteyaya nahan
ekhémo m'a kélyapmeyk nak?
3 Kóltennasha sa' kélketchek,
keñe sa' nahan
eltennasha apketchek ma'a,
tén sa' nahan eltennasha
apketchek ma'a
appalleyam sa'
makham egmonye'.
4 Aptókagkek sawa'
m'a ekyókxoho
aqsok kélcheneykekxa':
keñe apkelwa'akto makham pók,
apsawhawo aptawa m'a
apkeláyam axta.
5 ¡Kéxegke,
anmen át'ák nak,
kólnaqxétekhák!
¡Kóllekxagwaha,
kélyeneykegkoho nak vino,
hakte kawomhok sa'
apkelyamáséyak ma'a anmen
yámet ekyexna égmenek!
6 Máxa sẽlpextétamo
apkelyennaqte tén han
apxámokmal'a m'a sawa',
appayhékxo nak seyókxa,
ekhémól'a méwa am'ák,
tén han méwa kelwána m'a
élyawakxa nak am'ák.
7 Aptawáseyha negkeneykekxa
anmen yámet,
apkelekkexchek higo
negkeneykekxa';
apkeláxñásekxók apagko',
apkelmópesákxók ma'a
axchakkok nak.
8 Máxa kelán'a étkok
élekxagweykhal'a
apketsapma ekpagkanma,
ektaxneykekxal'a apáwa
senlapwayam
9 aptamhágkok
apkellekxagweyncha'a
m'a apkelmaxnéssesso Dios
énxet'ák apagkok,
hakte méko entáhak
aqsok ekyexna
kélcheneykekxa m'a
tegma appagkanamap nak,
tén han anmen
yámet égmenek,
yaqwayam kólmések
chá'a Wesse' egegkok.
10 Meyke aqsok
táhak ma'a namyep;
yaqhapchek exma'.
Apkelepsagkek ma'a
hótáhap apaktek,
kelyameygkek ma'a
anmen yámet,
apák entáhak ma'a olivos.
11 Kéxegke kéltamheykha
nak chá'a namyep,
tén han kélcheneykekxexa
nak chá'a anmen yámet,
kóllekxagwaha yetlo
ekyentaxnamo agko' kélwáxok,
hakte kelesagkek ma'a
aqsok kélcheneykekxa,
tén han ma'a kélnakxo
nak hótáhap apaktek,
tén han ma'a apho nak hótáhap.
12 Kelyameygkek ma'a
anmen yámet kélcheneykekxa,
tén han higo yámet.
Kelyameygkek nahan
ma'a yántakyexna,
tén han áxa,
tén han manzano awhók,
keñe han ma'a ekyókxoho
yenta'a nak yókxexma.
¡Massegwokmek
élpayheykekxa apkelwáxok
ma'a apyókxoho énxet'ák!
13 Kéxegke kélmaxnéssesso
nak chá'a Dios énxet'ák apagkok,
kéltamheykha nak chá'a
ekwatnamáxchexa aqsok,
kólántaxnekxa apáwa
sẽlwáxaqxo nak,
kóllekxagwaha yetlo éllapwámeyak,
hakte méko entáhak aqsok
kélcheneykekxa ekyexna m'a
Dios nak tegma appagkanamap apagkok,
tén han vino
yaqwayam kóltéhek
kélmésso naqsa Dios.
14 Kóláneyha énxet'ák,
kóltennés peya
megkóltawagkehek kéltéyak;
kólánchásekxa apkelámha apmonye'e
m'a Dios Wesse' kélagkok nak
tegma appagkanamap apagkok,
tén han ma'a apyókxoho
énxet'ák apheykha nak
kañe' negókxa,
kólwónmakha sa'
Wesse' egegkok.
15 ¡Cha'asagko nak la'a,
chágketwa'ak
Wesse' egegkok
ekhem apagkok!
¡Ekhem ekyentaxno,
eksáyam nak sẽlmassésseyam,
segáphássesso nak ma'a
ekha nak Apyennaqte!
16 Negaqta'awók negko'o
ẽlyementamágkok nentéyak,
massegwokmek élpayheykekxa
egwáxok ma'a
Dios egagkok nak
tegma appagkanamap apagkok.
17 Kelyamágwokmek aqsok
aktek ma'a kélmétegkáseyak
nak kélcheneykekxa',
apkelepsagkek ma'a
hótáhap apaktek,
kelesagkek nahan ma'a
kélxátamakxa nak chá'a.
18 ¡Kelpáwaha kélnaqtósso!
Chaqhók ektegyágko pa'at weyke;
apkeletsekkek ma'a nepkések.
19 ¡Ekwóneyha ko'o
exchep, Wesse',
hakte kelwatneyk
táxa pa'at ma'a yókxexma
meykexa nak énxet,
tén han yenta'a m'a yókxexma!
20 ¡Wokmók xép
ekwóneykha m'a
aqsok nawha'ák,
hakte kelyameygkek
ma'a alwáta nak,
kelwatneyk táxa
m'a pa'at nak!
© © Enxet Lengua Sur Bible © Paraguayan Bible Society, 2015.