Bildad
1-2 ¿Háxko ekwánxa
elwátessók apteme
appeywa xa ektáha nak,
ekho nak éxchahayam ekyennaqte?
3 Hakte Dios
ekha nak Apyennaqte,
mopwanchek elának ma'a
aqsok megkapéwomo nak,
kapéwhok chá'a m'a
aqsok apkelanakxa enxoho.
4 Apketchek kexa
keñamak apkeláneyak
melya'assáxma nápaqtók Dios,
keñe apméssama
apkellegeykegkoho
ekpayhawo nak etnéssesek.
5 Ektam Dios ekha
nak Apyennaqte,
elmaxna yának
kapyóshok elanok xép.
6 Aptemék sa' agkok
xép eyáxñeyo aptémakxa
tén han ekpéwomo,
tén sa' elanha chá'a,
keñe sa' egkeyásekxak
makham ma'a apxagkok,
ekpayhawo nak
exkekxak eñama
ekpéwomo aptémakxa.
7 Megkaxók sa' ekwánxa axta
ekxámokma aqsok apagkok
peya nak étak natámen xa,
kayeykhágwomhok sa'.
8 Etegyaha sa'
amya'a ektémakxa
axta apheykha m'a
apyapmeyk nano',
eltámesáp sa'
ektémakxa axta
aqsok apkelwete
m'a nanók énxet'ák.
9 Kaxwe eyke negko'o,
magya'ásegkok aqsok;
hawók ektémakxa
negko'o negheykha
náxop ma'a ektémól'a
kayeykhak pessesse.
10 Apwanchek eyke
exchep eltennasha m'a
nanók énxet'ák nak,
tén han elxekmósek
ekxámokma agko' aqsok.
11 Wánxa awanchek
kaktog ekho' m'a
ekyawakxa nak yegmen,
tén han tappo;
12 kalyameyk eyke aqsa
megkólyaqtennákxoho,
tén han élyápaqmatakxoho áwa',
amonye' élyamaye
m'a mók pa'at nak.
13 Cháxa ektémakxa
han ma'a élmasagcha'a
nak apkeltémakxa,
megkalxeyenma nak
apkelwáxok Dios:
megkatyepek ma'a
aqsok apkelhaxnéyak.
14 Máxa yaweyke
támpagkok ma'a
apkelásenneykekxa nak chá'a,
tén han ma'a
apcháyo nak chá'a.
15 Emáwhok sa'
eykhe elmágwok
ma'a yátépépe nak,
eyetyapok sa' aqsa;
emáwhok sa' eykhe
elyepetchak ma'a
yaweyke támpagkok nak,
melmagkehek sa' eyke.
16 Aphawók énxet'ák
élmasagcha'a apkeltémakxa
m'a ektémakxa nak pa'at
élyápaqmátamo nak áwa'
éltátchessól'a mayáhat,
eksawheykekxohol'a m'a
ekyókxoho nak pánaqte
exnók kélcheneykekxexa';
17 élpextehetmal'a
kepmenák ma'a meteymog,
tén han élyepetchél'a,
18 apkelpátekkessek
agkok énxet ma'a
émhakxa nak,
méko han kay'asagkohok
émhakxa axta m'a.
19 Cháxa ektémakxa
kamassegwók
ektaqmalma apha,
keñe katépekxak
makham mók pa'at
ekyaqmagkasso.
20 Meyenyawha
eyke Dios ma'a
énxet ekpéwomo
nak aptémakxa,
mepasmehek eyke
m'a élmasagcha'a
nak apkeltémakxa.
21 Sa' egkeyásekxak
makham xép
apkektegmeykha m'a,
tén han apwóncháseykha
kapayhekxak apwáxok;
22 elmegqáwhok
apagko' sa' eyke
m'a apkelenmexma,
kólmasséssessók sa'
nahan apxanák
ma'a élmasagcha'a
nak apkeltémakxa.
© © Enxet Lengua Sur Bible © Paraguayan Bible Society, 2015.