1 Yentexek ektémakxa
apha énxet keso náxop,
hawók ma'a ektémakxal'a
apkelane aptamheykha sẽlpextétamo,
2 máxa m'a
kélásenneykha naqsa
apmáheyól'a eykhe chá'a
exek ma'a pessesse,
máxa m'a kélásenneykha
ekpekhéssól'a emok
ekyánmaga aptamheykha.
3 Yókxoho pelten eyaqhémo
sekweynchámeykha,
yókxoho axta'a
eklegeykegkoho ewáxok.
4 Eytek chá'a,
keñe kawegqagkok
aqsa chá'a axta'a;
héleklamok
sélpeynchamaxche sekyetno,
ekwokmoho ekyexwasakmo,
keñe katnehek chá'a ewáxok se'e:
¿Wokmeya sekxátekheykxa'?
5 Apsawheykekxók
émpehek yápa apketkók,
kelyenneykekxeyk han
émpe'ék sélyense,
kelpexyaweykenteyk
nahan cháwen émpehek
élenmaga sélyense.
6 Chágketwokmek
néxa sekha,
méko kaxwók aleyxek,
yahamok agko' ekxega
máxa m'a yámet ekmanyehel'a
kélatcháseyak kélótma.
7 Oh Dios,
kaxén apwáxok
ekhawo ko'o sekyennaqte
m'a ektémól'a xama
nentekkesso nennama,
móteyekxók sa' chá'a
ekpayheykekxa ewáxok.
8 Méko sa' nahan
héteyekxohok chá'a;
hélanok sa' eykhe exchep,
mehétyehek sa' eyke,
hakte amassegwók sa'.
9-10 Temék aphagwayam
nak chá'a takhaxpop ma'a
ektémól'a yaphope kayeykha',
keñe kamassegwók:
mopwanchek chá'a
etaqhohok apkeñamakxa',
melwetekxók han chá'a
m'a apnámakkok nak.
11 Cháxa keñamak mamako
nak ko'o awanmeyekxa'.
Mamágwakxeyk sa'
axénmakha seklegeykegkoho,
tén han eklo ewáxok.
12 ¿Yegmen askok
ekyawe ya ko'o eyeneyk,
ekyetnama nak
wátsam ekwányam,
apkeltamho nak héllanha?
13 Wának chá'a ko'o
ótak séllókasso sekyampe
néten sekyetnamakxa,
keñe han kamasseksek
seklegeykegkoho
m'a sekteyenma,
14 keñe chá'a exchep
hégwakkashok apagko'
hexekmósek aqsok
sekwanmagko,
¡hégwakkasek chá'a
hexekmósek
sekwanmagko ekmaso!
15 Tásek xeyep
eyaqhápok eyespok;
émenyeyk ko'o watsapok,
mómenyeyk aweynchamha chá'a.
16 Massék sélenmáxexko.
Mómenyeyk alenxanmagkohok sekha.
Ná hélya'es kaxwók exma',
hawók ko'o sekyennaqte m'a
ektémól'a nentekkesso nennama.
17 ¿Yaqsa m'a
nentáha nak énxet,
apmopmenyého nak chá'a?
¿Yaqsa ektéma
ekyetnakhassamo nak
chá'a apwáxok?
18 ¿Yaqsa ektéma
apkeláneykencha'a nak
chá'a yókxoho ekhem?
¿Yaqsa ektéma
apyekkeynma chá'a?
19 ¿Yaqsa ektéma
melwátéssama séláneykha
yenmexhok mók nekha',
yaqwayam enxoho wawának
sekxók anaqsepekxak émánog?
20 Élanak agkok
ko'o may'assáxma,
megkatnéssessamók
exma ekmaso exchep,
apkeláneykha nak
chá'a énxet'ák.
¿Yaqsa ektéma
sepeykessamo nak chá'a
ko'o semakte yágke apagkok?
¿Ekyentaxnéssegkeya
ko'o apha exchep?
21 ¿Mopwancheya
heyásekhekxohok xép
sektémakxa may'assáxma?
¿Mopwancheya
heyásekhekxohok
sektémakxa sélane
aqsok ekmaso?
Kaxwók sa' eytek náxop:
hektamok sa',
amassegwók sa' eyke.
© © Enxet Lengua Sur Bible © Paraguayan Bible Society, 2015.