Job
1-2 Kélyetsátegkek agkok
ekyókxoho ektémakxa
seklegeykegkoho ekmaso
xama kelyetsáteyak,
3 yentexek katnehek,
megkaxók ma'a
ekweykenxal'a ekyentaxno
yagkamex wátsam ekwányam.
Cháxa keñamak
ekyenneykencha'a
nak chá'a sekpeywa.
4 Élyát'ak ko'o
yágke apagkok ma'a
Ekha nak Apyennaqte,
héweyk nahan émpehek
ma'a pánaqte agkok
segaqhamo nak.
Egkéssek ko'o
Dios ekyawe agko'
sélmenaye eñama
m'a setnéssesakxa
nak señassásegkoho.
5 Megkapáwha yámelyeheykok
ma'a ekha enxoho pa'at,
megkapáwha han weyke
kennawók ekha enxoho ekto.
6 ¿Yaqsa awanchek
katwok meyke nak yásek
kélenchehe xama aqsok?
¿Atseya katnehek
xama aqsok meyke
nak ekpaqneyam?
7 Sekto kaxwók ektamhákxak
ma'a mamáheyo axta atwok.
8 ¡Tásók la'a hegkések Dios
ma'a sélmaxneya nak;
tásók la'a elának ma'a
aqsok sekmámenyého!
9 ¡Tásók la'a
heyaqhápok heykxa
kaxwók Dios heyaqhek!
10 Askehek sa' eykhe
katnehek seklegeykegkoho,
kapayhekxak sa'
eyke aqsa ewáxok,
hakte élyeheykekxók
ko'o chá'a m'a
segánamakxa apagkok
nak Dios appagkanamap.
11 Méko táhak sekyennaqte,
mowanchek kaxwók alenxanmagkoho',
kaqhok altamhok aweynchamha chá'a.
12 Maxnawok ko'o
m'a ekweykenxa nak
ekyennaqte meteymog,
tén han ma'a
sawo ekyexwase.
13 Mowanchek ko'o
wásenneyxkohok ahagko',
méko han ma'a
sepasmo enxoho.
14 Kélmók aplegeykegkoho nak,
kólásekhohok chá'a,
megkeyxek apyenseyam
apyetleykha m'a
Wesse' ekha Apyennaqte,
15 makke kéxegke
hélpasmak, énámakkok,
máxa m'a alwáta' ekyamayél'a.
16 Kapésamok chá'a
yegmen kalpexyewenták
yetlo élyetleykentamho
yeyam appok;
17 massék agkok xa
yeyám appok nak,
kalyameygkok ma'a alwáta' nak,
keñe ekmexna enxoho,
keymaksek ma'a yegmen.
18 Kalyetnakhaksek nahan
chá'a ámay apagkok ma'a
apkelxega nak chá'a,
elmeyekxak ma'a
meykexa nak énxet,
keñe eletsapwakxak chá'a.
19 Eltamhok eykhe
elwetágwók yegmen
alwáta' m'a énxet'ák
apkelxega nak chá'a
apkeleñama m'a
Temá tén han Sabá,
20 apkelwokmek agkok ma'a,
kalyaqhapwomhok apkelwáxok,
melwetágwomek ma'a
aqsok aptegyágkaxa'.
21 Cháxa sélteméssesakxa
nak ko'o kéxegke xa:
kélwet'ak ekyentaxna
setnahakxa keñe kélaka han.
22 Makke ko'o almaxnagkók
xama aqsok kéxegke,
maltémók nahan
kólyánmagkasek selyaqye
yaqwayam hélwagkasek teyp,
23 tén han maltémo
hélwagkasek teyp
neyseksa apmáheyo
hemok ma'a sénmexma,
maltémók nahan
hélyementemekxak
neyseksa sema m'a
élmasagcha'a
nak apkeltémakxa.
24 Hélxekmós sa',
awanmak sa' eyke aqsa ko'o:
hélxekmós aqsok
magwaqhémo sélane.
25 Méko kataqheksohok
ma'a ektaqmalma nak
sẽlpaqhetchesso;
élxénaha eyke aqsa kéxegke,
meykexho sektáhakxa'.
26 Élxénaha eyke aqsa
ekmaso kéxegke,
eñama m'a sekpeywa
ekyeyháxma eksómo
nak éxchahayam.
27 ¡Kélwanchek kéxegke
kóltawasagkohok ma'a
apyéheykha nak,
kawomhok kélyamasma
ekha ekyánmaga m'a
kélmók kélagko' nak!
28 Héllano ko'o kaxwo',
héltennés sa' sektáha
enxoho sekmowána amya'a.
29 Nágkólxén chá'a
m'a kélxéna exchek,
nágkólteme megkapéwomo kéltémakxa;
kólyekpelkoho sa' ekpayhawo xa
sektáhakxa nak ko'o sekpeywa.
30 ¿Sekmowána
amya'a ya ko'o kélaneyk
meykpelchágwokmo m'a
sektáhakxa nak sekpeywa?
© © Enxet Lengua Sur Bible © Paraguayan Bible Society, 2015.