1 Elpáxamha Job,
yaqsa sa' kexa
kátegmowagkok.
¿Yaqsa sa' Dios
apchásenneykha
yának epasmok?
2 Kaqhohok eklo
apwáxok ma'a énxet
ekyeyháxma nak,
kaqhohok han
apnathahéyak ma'a
mey'áseyak nak aqsok.
3 Óthok chá'a ko'o
énxet ekyeyháxma
kataqmelek apha,
megkawegqók eyke chá'a,
yahamok eyke han chá'a
kólmasséssessók
ma'a apxagkok nak.
4 Méko han kapasmok
ma'a apketchek nak;
megkólpékessessók
han chá'a kélteméssesakxa
m'a sẽlyekpelchémókxa nak,
méko han kátegmakkasagkok
chá'a amya'a.
5 Meyk át'ák chá'a
etókasek aqsok
apkeneykekxa m'a
ekyeyháxma nak,
elmok chá'a
neyseksa am'ák,
elyementók chá'a
aqsok apagkok ma'a
apkelmopmenyého
nak chá'a aqsok.
6 Háwe kañe' xóp
ekteyapmakxa m'a
ekmaso nentémakxa;
háwe han ekteyapmakxa
m'a nenlegeykegkoho:
7 énxet keñamak
ekteyapmakxa m'a
nenlegeykegkoho nak,
ektémól'a táxa
éllo kalchampa'.
8 Etnék agkok ko'o xa,
ay'ókxak ma'a Dios,
altennaksek ma'a
setnamakxa nak;
9 ¡hakte elánhok
chá'a ekxámokma
aqsok élyawe
éltaqmalma m'a,
aqsok magmowána
nak agya'asagkoho'!
10 Yáphaksek
chá'a ekmámeye
keso náxop,
yaqwayam kalyássesagkok
aqsok yókxexma;
11 etnessásekxak nahan
chá'a néten ma'a
énxet mékoho nak,
egkések chá'a
meyke ektáhakxa
apheykha m'a
éllapwámeyak nak;
12 etwássesha chá'a
yaqwánxa enxoho
etnehek ma'a énxet
ekmanyehe nak
chá'a ey'asagkohok
yaqwánxa etnehek,
megyohok chá'a
katyapok aqsok
apmáheyo elána'.
13 Yának han kápekxak
chá'a aqsok apkelane
m'a ekmanyehe nak
chá'a ey'asagkohok
yaqwánxa etnehek,
megyohok chá'a
katyapok aqsok
ekmaso ekxeyenma
apwáxok elána':
14 ¡ekhakxoho ekhem
eykhe elpaknamagkok
ma'a apkelmahágkaxa
enxoho chá'a,
chapmeyk ekyáqtésso exma,
máxa axta'a temék
apkelweynchámeykha!
15 Ewagkasek chá'a
teyp Dios ma'a énxet
meyke nak aqsok apagkok
tén han kéltawáseykegkoho
nepyeseksa m'a énxet'ák
élmasagcha'a apkeltémakxa;
16 cham'a apkelhaxanma chá'a
apkelyelqamákpoho nak ma'a,
¡cha'a apkelwanmeyáseykekxa
nahan chá'a m'a élmasagcha'a
nak apkeltémakxa!
17 Apkeleñémo énxet
apnókáseykha nak
aptáhakxa m'a Dios;
ná etaqhéssesho aqsa
aplegassáseykegkoho m'a
Ekha nak Apyennaqte.
18 Apyensássek sa' agkok ma'a,
sa' nahan epextehetchesek ma'a;
apkelyekpexchetchek sa' agkok apmek,
sa' han emasséssesek ekmáske m'a.
19 Megkatnégwomek sa'
nahan néxa apmallahanchesso
chá'a neyseksa aqsok ekmaso,
megyohok sa' káhapwak
ma'a aqsok ekmaso nak.
20 Megyohok sa'
yetsapok ekwa'a
enxoho m'a meyk
segaqhe nak,
ewagkasek sa'
nahan teyp neyseksa
kempakhakma.
21 Emyók sa' neyseksa
kéltekkessáseykha aqsa apwesey,
megyekyek sa' nahan ekwa'a
enxoho aqsok ekmaso
ekmassésseykmoho nak aqsok.
22 Ewanyohok sa'
aqsa m'a meyk,
tén han aqsok ekmaso,
megyekyek sa' nahan
aqsok nawha'ák éllo.
23 Megkalya'aksek sa'
exma meteymog
appeynchekmo enxoho
xapop namyep apagkok,
megkataqnókkehek sa' han
ma'a aqsok nawha'ák.
24 Kataqmelhok sa'
apha m'a apxagkok nak,
apkelanawók sa' agkok
chá'a apnaqtósso,
kalanaxkohok sa'
aqsa chá'a ekyókxoho.
25 Apxámok sa' etnehek
aptawán'ák neptámen
ektémól'a pa'at ma'a
yókxexma nak.
26 Apwányamók
apagko' sa' etnehek,
neyseksa ekyenneykha
apyempehek sa' yetsapok,
ektémól'a kamakhéthok
ma'a aqsok kélcheneykekxa
ekweykenxal'a kanakxaxche'.
27 Cháxa ektémakxa
senxekmósso aqsok negwete nak;
yeyxho sa' xa sektáhakxa nak,
elano sa' yaqwayam ey'asagkoho'.
© © Enxet Lengua Sur Bible © Paraguayan Bible Society, 2015.