1 Tén han ma'a Leviatán
¿yásekkeseya sa' sókhaxe?
¿Apwancheya ethetchesek
axkok ma'a táma'?
2 ¿Apwancheya
elántaxnéssesek
aweyhek táma',
essenhan emallahanchessesek
sawo ekhaxe amáxempenek?
3 ¿Kaltamhoya sa'
kayóshok elano'?
¿Kayóshoya sa'
ekpeywa kalának kának
metnéssessamók
exma ekmaso?
4 ¿Kánaya sa' chá'a
etnehek apkeláneykha
meyke néxa?
5 ¿Eneykeseya sa' chá'a
ektémól'a nátetkok?
¿Ethetcheseya sa'
yaqwayam katnehek
ekneykáseykha m'a
apketchek kelwán'ák?
6 ¿Elpaqméteya sa'
énxet'ák exének
ekwánxa ekyánmaga m'a
apkelyánmagkásamákpexa
nak chá'a énxet'ák?
¿Kólyaqtennagkoya sa' han
yaqwayam kólchexák ekha
ekyánmaga nekha'a étkók?
7 ¿Apwancheya
elmallahanchessesek
elyaqxák émpehek ma'a yágke,
essenhan eyaqxák
apqátek ma'a héwa?
8 Appaknegwokmók
sa' agkok ma'a,
kalnapaxchek sa',
kastéhegkeshok sa' han,
metnessásekxók sa' han chá'a.
9 Apwet'ak agkok
énxet ma'a Leviatán,
elyelqakpok aqsa elyaqnenek
eñama apkelaye.
10 Aplókásegkek agkok
chá'a xama énxet,
kalwok chá'a;
méko nahan
awanchek kanmexekxa'.
11 Énxet ektáhakxa
enxoho apkenmexeykekxa',
¿apwancheya emallánek yetlo
meyke ektáhakxa apyempehek?
¡Méko xama enxoho
ekyókxoho keso
nélwanmeygkaxa nak!
12 Malwátéssemek sa'
sekxeyenma ektémakxa
m'a amagkok nak,
tén han ma'a
ektémakxa nak ekyennaqte
meyke ekhémo.
13 ¿Yaqsa awanchek
kalekkesek émpehek,
essenhan kalyetxák ma'a
émpehek ekyentaxno
nak eyápomáxche'?
14 ¿Yaqsa awanchek
kameykessesek átog,
ekheykegkaxa nak
ma'a am'ák
ekpexchessamo nak
egyempehek anlano'?
15 Máxa nahan
negáhakkásamaxche
éléweykekxa m'a akpok nak,
ekyepetcheykekxa mók,
kalyeyha'ak nahan,
máxa meteymog.
16 Taháneykekxeyk han mók,
yawanchek kamallánek éxchahayam.
17 Yepetcheykekxók
agko' nahan mók,
máxa élaspomáxche temék,
méko han awanchek
kayenyókasek mók.
18 Máxa takha' apkelyenma
nahan ma'a étheykha;
máxa han ekhem
éltátchesso m'a aqta'ák
ektémól'a kalse'.
19 Aweyhek chá'a
kalántépok éláléwe,
kalnextog chá'a
ekho táxa éllo.
20 Kalántépok chá'a
ekpánma m'a aweyhek,
ektémól'a ekteyapma
ekpánma m'a
élpaqteyapmakxa nak táxa.
21 Énnama nahan
kaláléwásekxak ma'a átex,
kalántépok chá'a
táxa eyáléwe aweyhek.
22 Kayhok agko'
nahan ma'a ayespok,
apyókxoho énxet han
chá'a yeyk ma'a
apkelwet'a enxoho.
23 Weykmók nahan
ápetek ekyennaqte,
megkatxehek kólyetxa',
máxa m'a sawo.
24 Kayhek ahekhek,
máxa m'a meteymog,
kayhe', máxa m'a meteymog
kéltekxekxól'a aqsok aktek.
25 Keltaqhaháha agkok,
kawomhok apkelyegwakto
m'a apkelyennaqte nak,
yenyahagkok chá'a
yetlo apkeláyo apagko'.
26 Kaqhok emha
ektamagkok énxet ma'a
sókwenaqte, sawhéwa,
yágke tén han héwa.
27 Máxa pa'at
katnéssesek
ma'a sawo nak,
keñe máxa yámet
ápak katnéssesek
ma'a sawo ekyexwase.
28 Megkanyehek han
kótak ma'a yágke;
máxa pa'at katnehek
kólyetnak ma'a meteymog.
29 Máxa yámámok
kéltekpaga katnehek
kóltekpog ma'a
yámet ekyawe nak;
kasmaksek aqsa kañak
élpáwá émpe'ék ma'a héwa.
30 Pexyawágkek agkok,
kapáxqátek yelpa',
máxa katnehek ma'a ektémól'a
kélpeyncheyam xapop.
31 Kalpaqtekkesek ma'a
wátsam ekmattawóneg,
ektémól'a weygke
apwáxok élpaqteyapma;
ektémól'a m'a
kélméxenchessamakxal'a yegmen
kélpáxaqteyáseykekxa pánaqte.
32 Kameykesek
natámen ma'a yegmen,
kalyenmohok han
ekyaqmópesso.
33 Méko ekhawo
ekyókxoho nak
keso náxop;
kelánamáxcheyk axta
yaqwayam megkakyehek
xama aqsok enxoho.
34 Kalwanyohok ma'a
ekyókxoho aqsok
éleymáxkoho nak,
cha'a ekteme han
néten ekyókxoho m'a
aqsok nawha'ák éllo nak.
© © Enxet Lengua Sur Bible © Paraguayan Bible Society, 2015.