1-2 Xép Job, apmáheyo nak
chá'a hélátegmoweykpok,
sektáha nak ekha Sekyennaqte,
¿elwatakseya sa'
seyátegmowéyak chá'a?
Job
3-4 Mowanchek ko'o
wátegmowagkokxak xép,
énxet mékoho ko'o,
kéméxcheyk awanmak aqsa.
5 Xámchek sekpaqméteykha,
méko kaxwók yaqwánxa
atnehek sekpeywa.
Dios appaqhetcháseykekxa makham Job
6 Appaqhetchásekxeyk axta makham Wesse' egegkok Job, neyseksa éxchahayam ekyennaqte.
Wesse' egegkok
7 Hexekmós kaxwók
apteme apyennaqte,
yátegmowák sa' se'e
aqsok sélmaxneyeykha:
8 ¿Péya exchep hexének
megkapéwomo sektémakxa,
tén han seksexnenagko,
keñe exchep etnehek
máxa meyke aptémakxa'?
9 ¿Apmeyhek enxeykel'a
exchep, sektéma nak ko'o?
¿Kaxtegyawhoya exchep xa
appeywa ektéma nak ko'o?
10 Yáhakkasap
kaxwók apyennaqte
tén han apteme wesse',
yaqláp apcheymákpoho
tén han apkelyenma.
11 Elano apyókxoho
apkeleymákpoho nak:
nágyéssekxa eltaqnaweygkok,
etnessásekxa mékoho.
12 Elano, keñe sa'
etnessásekxak mékoho,
elteyammaha élmasagcha'a
nak apkeltémakxa,
cham'a apheykegkaxa nak chá'a.
13 Elátawanye sa'
apyókxoho kañe' xapop,
exátawom sa' chá'a m'a
apkelmaheykegkaxa
nak apkeletsapma.
14 Keñe sa'
ko'o ay'asagkohok
eñama xép apmopwána
apagko' ekmallahanchesso.
15 Elano yegmen askok
ekyawe Behemot,
sélane axta ko'o,
ektéma axta ko'o
exchep séláneya:
katwohok han pa'at
ektémól'a weyke;
16 elano, kayhok agko'
émpehek ma'a,
kalyeyha'ak han aktegák.
17 Kayhek han ma'a épakyek,
máxa yámet cedro,
naqtétamáxchek áhak
ma'a amagkok nak.
18 Máxa sawo
ekyexwase m'a
axchakkok nak,
tén han sawo ekyentaxno.
19 Cháxa amonye'
aqsok sélane axta;
ko'o aqsa han
ewanchek waqhek
sektáha nak sélane.
20 Keleñamak han chá'a
kélseykentegkesso pa'at
yaqwayam katwok ma'a egkexe,
eknéweykegkaxa nak
aqsok nawha'ák éllo.
21 Kaxnagkok chá'a m'a
kóneg nak yámet ekha am'ák,
kalyexanmok chá'a m'a
neyseksa qamok
ekmomhápexa nak.
22 Pessesse chá'a
ekmésso m'a yámet
ekha nak am'ák,
apwakhayak ma'a
xóxeg apkelámha
nak neyáwa yegmen.
23 Yaweykxeyk agkok
yegmen ma'a wátsam,
megkakyehe';
kammok eykhe
aweyhek ma'a yegmen,
megkatneykha awáxok.
24 ¿Yaqsa awanchek kamok,
tén han kalhexyawássesek aqta'ák,
essenhan kathetchesek
aweyhek táma'?
© © Enxet Lengua Sur Bible © Paraguayan Bible Society, 2015.