Émha amonye' apkelpaqhetchásamap
(Caps. 4—14)Elifaz appaqhetchesso Job
1-2 Job, megkalchehek
sa' eykhe apwáxok
xép apaqhetchesek,
mowanchek eyke
ko'o awanma aqsa.
3 Xép, apkelxekmósso
axta chá'a apxámokma énxet,
apkelwasqakkáseykekxoho axta
chá'a m'a apkelyelqamap nak;
4 xép apkelwasqakkáseykekxoho
axta chá'a apkeltémo elchempekxak
néten ma'a apkelyaqnenma nak,
tén han apkelméyak axta chá'a
m'a ketók appalleykemxa nak,
5 ¿péya kamaskok kaxwók
apwasqápeykekxoho
apwet'a nak ektáhakxa
aplegeykegkoho?
6 Xeyep apteme
nak meyenseyam
apyetleykha Dios,
xama énxet
ekpéwomo aptémakxa,
¿háxko etnehek xép
metnéssesek naqso'?
7 Kalchetam hana
sekxók apwáxok,
kaxénwakxohok sa'
kexa apwáxok apweteya
kélmassésseykmo xama
énxet meyke aptémakxa.
8 Yetneyk ko'o
ektémakxa sekwete
énxet apkelane nak
aqsok ekmaso agko',
kápekxohok agko' chá'a
m'a ektémakxa nak
aqsok ekmaso aptekkesso.
9 Apwátekhapchek
agkok Dios yetlo aplo
nepyeseksa m'a,
emasséssók chá'a
m'a apyókxoho nak.
10 Elpáxamha eykhe han chá'a
ektémól'a yámakméwa kalyexwéwha,
elwanmeyásekxak eyke chá'a Dios
elekkexchesek ma'a apma'ák.
11 Eletsapok sa'
ektémól'a méwa
megkótyehek ekyógkexma,
kólexpánchessesek
sa' ma'a apketchek.
12 Wa'ak axta amya'a
megkeynnaqte sekhakxa',
xegkessek axta mañék
ektáhakxa' hakte
axta keynna'.
13 Keñe axta axta'a
eyáhapweykxal'a
teyn énxet,
ekwet'ak axta
sekwanmagko aqsok
ekmaso segyegwakkassamo.
14 Ekyegwakkek axta ko'o;
kelpexyennegkek axta
ekyókxoho émpehek.
15 Wátekhapchek axta nahát,
keñe ekpexcha'a émpehek.
16 Yetneyk axta énmeykha m'a,
ekwet'ak axta chá'a pessesse agkok,
axta eyke ót'ak ektémakxa ekyókxa'.
Kelwónekxók axta exma',
keñe sekleg'a xama
kélpeywa ektáha s'e:
17 “¿Apwancheya énxet
etnehek appéwomo
nápaqtók Dios?
¿Apwancheya etnehek
eyáxñeyo aptémakxa
nápaqtók ma'a ektáha
axta apkelane?
18 Weykmók
nahan metnéssesso
naqsók apkeltémakxa
m'a apkelásenneykha
apheykha nak néten.
Hakte weykmok apwete
Dios ekyetna aqsok
melaqhémo m'a
apkelásseneykha nak,
19 ¡eyke ekyágwánxa
agkok ma'a énxet,
apteme nak
apyelqamákpoho,
aptémól'a m'a tegma yelpa',
apkelánamap la'a
néten yagkamex,
kélmowánal'a kóltepelkoho',
ektémól'a yánseleklek!
20 Axto'ók chá'a agweta',
keñe taxnám emassegwók;
yetsapok chá'a meyke aptépéyak,
méko han keytnakhaksohok awáxok.
21 Máxa yátépépe
kélyaqtónmal'a katnehek
kamassegwók ma'a apyókxa;
yetsapok aqsa chá'a meykexho
apya'ásegwayam aqsok.”
© © Enxet Lengua Sur Bible © Paraguayan Bible Society, 2015.