Dios apchátegmowéyak Job
1 Keñe axta Wesse' egegkok appaqhetchesa Job neyseksa éxchahayam ekyennaqte.
Wesse' egegkok
2 Mopwanchek xép
metnéssesek naqso'
ma'a ektémakxa nak
sekya'áseykegkoho aqsok,
hakte appaqméteykha
aqsa chá'a exchep
meyke apya'áseyak.
3 Hexekmós kaxwók
apteme apyennaqte,
yátegmowák sa' se'e
aqsok sélmaxneyeykha:
4 ¿Háxko axta aphakxa
exchep séláneya axta
ko'o s'e náxop?
¡Héltennés sa'
apya'ásegkoho enxoho naqso'!
5 ¿Apya'ásegkoya han
ekxeyenma ekwánxa
katnehek ekyawe?
¿Yaqsa axta énxet
apkelyetsátéyák?
6 ¿Yaqsa axta aqsok
kélpekkenma m'a awhak nak?
¿Yaqsa axta
énegkessesso meteymog
yaqwayam kólteyeksek,
7 neyseksa
apkelmeneykmasso yaw'a
apkelánteyapmól'a axto'o,
neyseksa élpayheykekxa apkelwáxok
yetlo apkelwónchesso m'a
sélásenneykha apheykha nak néten?
8 ¿Yaqsa axta
eyápeykekxa átog
yaqwayam keyxnegwók
sekxók axta ekteyapma
wátsam ekwányam
ma'a kañe' xapop?
9 Ekméssegkek axta
ko'o yaphope yaqwayam
katnehek ektaxno,
keñe ekyáqtésso
exma ektaháno.
10 Ekpekkenchessegkek
axta han ko'o néxa m'a
wátsam ekwányam,
eyáhakkáseykekxeyk
axta han átog agkok
m'a ketchessama átog.
11 Axta ektemék seyenagkama s'e:
“Sa' katnehek néxa s'e,
megkamallánek sa';
sa' kalnextog
élyaqyahayam élyawe
agkok se'e.”
12 ¿Apkeltémoya chá'a
exchep katyapok ekhem,
essenhan kalsék chá'a
neyseksa apha?
13 ¿Apkeltémoya han chá'a
kasawhekxohok élseyéxma
ekyókxoho keso náxop,
keñe elyexanmok chá'a m'a
élmasagcha'a nak apkeltémakxa?
14 Keñe agwethok ma'a
ektémakxa xapop,
máxa katnehek ma'a
kéltaxno kélyexwássessól'a;
15 melxawagkehek
élseyéxma m'a énxet'ák
élmasagcha'a nak apkeltémakxa',
katwássesha chá'a apmáheyo
elanagkok apkeltémakxa ekmaso.
16 ¿Apmeheykegkeya m'a
kañók agko' nak wátsam ekwányam
éñamakxa nak ekteyapmakxa yegmen?
17 ¿Apweteyaya han ekheykegkaxa
m'a atña'ák ekyáqtéssamakxa exma
apkelmaheykegkaxa nak apkeletsapma?
18 ¿Apya'ásegkoya ekwánxa
ekpayhakxa m'a náxop?
¡Héltennés sa' apya'ásegko
enxoho ekyókxoho!
19 ¿Apya'ásegkoya han
kélpekkenmakxa m'a élseyéxma
tén han ekyáqtessóxma?
20 ¿Apwancheya elya'aksek
ekweykmoho m'a néxa xapop nak
keñe elya'ásenták makham
ma'a ekheykegkaxa nak?
21 ¡Katnehek mey'áseyak
hakte apwányamók aptáhak,
aphegkek axta exchep ma'a
amonye' axta élánamáxche'!
22 ¿Apweykmeya han
ma'a seknegkenmakxa
nak yeyam appok
tén han yegmen élyennaqte
23 seyáphassamól'a
chá'a ko'o ekwa'a enxoho
ekhem ekmaso,
tén han kempakhakma?
24 ¿Apya'ásegkoya exchep
élmaheykegkaxa élxega
enxoho m'a élseyéxma?
¿Apya'ásegkoya ektémakxa
kalxog éxchahayam eñama
nak ekteyapmakxa ekhem,
kalmahagkok ekyókxoho nak
keso nélwanmeygkaxa?
25 ¿Yaqsa ekyagqaxqatchesso
chá'a ekteyapmakxa
m'a ekmámeye,
tén han éltennasso chá'a
yaqwánxa kamhagkok
éxchahayam ekyennaqte,
26 yaqwayam enxoho kammék
ma'a ekyamáyekxa nak exma,
meykexa nak ekha,
27 yaqwayam enxoho kayássesek
ma'a xapop ekyaqhapmókxa nak exma,
keñe kaltektekkásekxak ma'a pa'at?
28 ¿Yaqsa yáp
ma'a ekmámeye
tén han yálye?
29 ¿Yaqsa egken
ma'a yeyam appok,
tén han ma'a apmópeyak nak?
30 ¿Yaqsa ekyennaqteyáseykekxa
chá'a yegmen ektémól'a meteymog,
tén han ekyennaqteyáseykekxa
chá'a m'a néten nak wátsam ekwányam?
31 ¿Xépya apyepetcháseykekxa
mók ma'a Élántépeyam nak,
keñe han apkexpánchesso
apheykegkaxa m'a
yaw'a apkelyawe Orión?
32 ¿Xépya chá'a aptekkesso
ekwokmo enxoho chá'a
apteyapmakxa axto'ók
ma'a yaw'a apwányam?
¿Xépya apnaqlo chá'a m'a
yaw'a Osa Mayor tén han Osa Menor?
33 ¿Apya'ásegkoya
exchep ektémakxa
nenláneykha m'a néten?
¿Apwancheya exchep
xa etnehek apkeláneykha
s'e náxop nak?
34 ¿Apwancheya
exchep ey'aksek
appeywa néten yaphope
yának káhakkasek
yegmen ekyawe?
35 Apcháphássek agkok takha'
yának emhagkok mók nekha,
¿etneheya sa'
yátegmowagkok se'e:
“Keso ko'o s'e,
alyahakxohok sa'
aptáhakxa seyáneya?”
36 ¿Yaqsa élmésso
élya'áseykegkoho
aqsok ma'a náta,
cham'a kesseyána',
tén han tat'a kennawo'?
37 ¿Yaqsa ekyetna
ekmowána agko' aqsok
yaqwayam kay'asagkohok
ekwánxa m'a yaphope?
¿Yaqsa awanchek
kalyegkenek yaqwayam
enxoho kamme',
38 yaqwayam enxoho
katnekxak yelpa' m'a xapop,
keñe keypetchekxak mók?
39 ¿Xépya aptegyáseykha
chá'a ekyógkexma m'a méwa,
yaqwayam enxoho
katawagkok chá'a m'a étkók nak
ekwokmoho élyaqkanakmo,
40 cham'a élyexanma
enxoho chá'a m'a
élyáqtamakxa nak,
essenhan élyexanmeyncha'a
enxoho m'a neyseksa
ekmompánaqma?
41 ¿Yaqsa éléyak
chá'a apto m'a máma,
apkelweynchámeyncha'a
enxoho chá'a etegyagkok
aptéyak ma'a apketkók nak,
apkelpáweyncha'a enxoho
chá'a hélmaxneyha?
© © Enxet Lengua Sur Bible © Paraguayan Bible Society, 2015.