Ektáhakxa ántánxo appeywa Elihú
1-2 Job, apkenagkamcheya
exchep kapayhohok
etnehek se'e:
Dios sa' exének
ekpayhawo sektáhakxa'.
3 Aptemék han xép
apkenagkama Dios se'e:
“Megkaphemmek xép ma'a
sélana enxoho may'assáxma,
megkatwássesha apha
m'a may'assáxma.”
4 Ko'o sa' eyke
wátegmowagkok xép,
tén han ma'a apnámakkok nak.
5 Yenmexho hana néten,
elano, netnók ma'a yaphope
apyetseksek nak.
6 Apkelanak agkok mey'assáxma,
megkatwássesha apha m'a Dios;
xámok agko' eykhe katnehek
apkelane mey'assáxma,
megkatnéssessamók eyke exma.
7 Tásek agkok han aptáhakxa',
méko egkések;
méko aqsok ektaqmela egkések.
8 Eyke katwássesha
apheykha mey'assáxma m'a
énxet'ák aphawo nak xép,
tén han kataqmelchessesek
apheykha m'a aptémakxa
ektaqmela nak.
9 Yentexek agkok
kélnaqtawáseykegkoho énxet'ák,
elwehesha chá'a,
keñe etegyaha chá'a
yaqwayam kalwagkasek
teyp neyseksa apkelma m'a
apkelyennaqteyáseykha
nak apyempe'ék;
10 keñe melyo'ókxeyk ma'a
Dios ektáha axta apkelane,
apkelmésso nak
chá'a apkelyennaqte
ekwa'a enxoho chá'a
ekyáqtésso agko' exma,
11 segyeykhássesseykmoho
nak chá'a sẽlxekmósso m'a
aqsok nawha'ák nak keso náxop,
tén han náta.
12 Elpáxamha eykhe chá'a,
megyátegmowagkek eyke Dios,
hakte énxet'ák
élmasagcha'a apkeltémakxa
tén han apkeleymákpoho m'a.
13 Megyeyxók Dios
ekha nak Apyennaqte m'a
negmowána amya'a nak.
14 Ekyágwánxa agkok
xép apxeyenma nak
chá'a méteya Dios,
eleyx aqsa,
hakte yetnegkek
xép aptémakxa nak
ma'a aphakxa nak.
15 Apxeyenmeyk chá'a
exchep Dios melwehe',
tén han mehenlegássesagko',
tén han melanók apagko'
ma'a magya'assáxma.
16 ¡Job, apxeyenmeyk
eyke aqsa exchep
aqsok mékoho,
appaqméteykha
aqsa chá'a exchep
meyke apya'áseyak!
© © Enxet Lengua Sur Bible © Paraguayan Bible Society, 2015.