1 Ewáxok ahagko'
axta ko'o ekxeyenmak
megkatsepek chá'a
egkenyek alanok kelán'a étkok.
2 ¿Yaqsa ekyánmaga
egkések ekha nak Apyennaqte
énxet ma'a aphakxa nak néten?
3 ¿Háweya élmasagcha'a
nak apkeltémakxa apagkok
ma'a ekmaso nak apheykha,
tén han ma'a
melya'assáxma nak?
4 ¿Enxeykel'a eteyk Dios
ma'a aqsok séláneya nak?
¿Enxeykel'a eteyk
ektémakxa nak sekxega?
5 Naqsók eyke ko'o
maláneya aqsok yetlo
ekmaso élchetamso ewáxok,
maltémók nahan
alyexanchesha xama énxet.
6 ¡Dios sa' ko'o
hélyetsetagkok kelyetsáteyak
megkamenyexma nak,
keñe sa' ey'asagkohok
sektáha ko'o meyke sektémakxa!
7 Ekyetnakhágwokmek
sa' agkok ko'o m'a
ámay ekpéwomo nak,
sey'awo enxoho
kamok ewáxok
étsapeykha egkenyek,
ekwetáxko enxoho
sekmeykha m'a aqsok
megkatnaha nak ahagkok,
8 pók énxet sa'
etwok ma'a aqsok
séneykekxa nak,
elpátekkesek sa' han.
9 Ey'awók sa' agkok
ko'o hélának xama kelán'a,
essenhan sélteyanyáncha'a
enxoho alanha aptáwa' m'a
apha nak ketók exagkok,
10 pók énxet sa'
etnehek apchásenneykha
naqsa m'a etáwa' nak,
pók énxet'ák sa'
han epathetagkok.
11 Hakte asagkók
agko' sa' katnehek
ma'a aqsok sélane;
megkatnehek sa'
mehellegassáseykegkoho.
12 Kaxhok sa' ma'a
ektémól'a táxa eyáléwe
ekmassésseykmohol'a aqsok,
kasawhohok sa'
aqsok ahagkok.
13 Ey'aweykteyk
axta agkok ko'o chá'a
séláneykha héltennássetak
aqsok megkaleklo apwáxok,
alánekxések axta chá'a ko'o.
14 Agkok ko'o atnahak xa,
¿háxko atnehek ko'o
amyekxak nápaqto' Dios?
¿Háxko atnehek
ko'o wátegmowagkok
sélyetsetchásekxoho
enxoho sektémakxa?
15 Dios aqsa
senlane kañe' méme
egagkok awáxok,
apkelméssegkek
apkelyennaqte m'a,
ekhawo nahan ko'óxa.
16 Axta alwátesseykmok
chá'a ko'o sekpasmo
eyéméxchexa enxoho m'a énxet
meyke nak aqsok apagkok.
Axta han wahayók
kalnápok meyk ma'a
kelán'a xentampe'e nak.
17 Axta atók chá'a
ko'o sekto exakko',
apasmok axta chá'a
sekto m'a élyeheykha nak.
18 Máxa yáp axta ko'o
ekteméssessók ma'a
élyeheykha nak;
séltaqmelchesso axta
ektemék chá'a m'a
xentampe'e nak.
19 Ekwet'ak axta agkok
chá'a ko'o xama énxet
meyke agko' nak apáwa,
essenhan han meyke
enxoho yaqwayam
yaqlakpok ma'a meyke
nak aqsok apagkok,
20 almésagkok axta chá'a
apáwa apkelánamap
nak apwa' m'a
nepkések seknaqtósso,
keñe axta hegkések chá'a
ekpayheykekxa apkelwáxok.
21 Axta ko'o eynnaqtéssók
chá'a sekpeywa xama
enxoho alának ma'a
apkelyéheykha nak,
wásenneykxak ma'a
sélxegexma'a énxet'ák
segyekpelchémo nak.
22 Háwe agkok naqsók xa
sektáhakxa nak sekpeywa,
hélekkexchesek sa' ahaktegák;
hélhaxyawássesek sa'
nahan awhók ahaktegák.
23 Hakte eyáyak ko'o Dios
senlegassáseykegkoho;
¡mowanchek alenmaxaxkohok
nápaqtók ma'a wesse'
ekha nak apcheymákpoho!
24 Magwáyok chá'a
ko'o xama enxoho m'a
sawo ekyátekto ekmomnáwa,
yaqwayam enxoho
hetaqmelchessesek sekha.
25 Mehepeykessáseykekxak
ewáxok ma'a ekxámokma
aqsok ahagkok,
tén han sekxámáseyak
ma'a selyaqye ahagkok.
26 Ekweteyak chá'a ko'o
kalsaksek exma ekhem,
tén han apxega pelten yetlo
apchápogwate aptaqmalma,
27 makke eyxamaxkohok
alpeykeshok xama enxoho,
malya'ássessók han néten emék.
28 Ektemék agkok xa,
payhawók héllegássesagkoho';
¡máxa sektaqnagko atnehek
ma'a Dios apha nak néten!
29 Megkapayheykekxak
chá'a ko'o ewáxok
katnégwomhok exma
m'a sélenmexma nak,
megkapayhekxeyk han
chá'a ewáxok eyáhapwa'a
enxoho ekmaso apha.
30 Maltémók han ko'o
katnégwomhok exma
ekmaso xama enxoho,
maltémók han yetsapok.
31 Peyk agkok han
chá'a etwasagkohok
xama énxet'ák ahagkok ma'a
énxet apkeñama mók nekha,
32 magwohok chá'a
etyenek aqsa
axta'a m'a ámay.
Almok axta chá'a ko'o
takha' alhéssók exagkok
ma'a apkelxega nak chá'a.
33 Makpóssók nahan
chá'a xama enxoho m'a
aqsok magwaqhémo,
aptamheykegko nak
chá'a m'a pók énxet'ák,
mamáheyók han akpósek
34 eñama seyeye
hexének énxet'ák.
Maxmak nahan xama
enxoho kañe' awanma',
eñama seyeye hewanyaha
m'a énámakkok.
35 ¡Yeyxho annal'a
sekpeywa xama énxet!
¡Sekwesey chá'a ko'o
apekkenek sektáhakxa
enxoho chá'a sekpeywa;
heyátegmowagkok sa' kaxwók
ma'a ekha nak Apyennaqte!
Tásek kanaqtáxésaxchek
ma'a aqsok sélpehésseyam
nak chá'a ko'o sélane,
36 asawha sa' chá'a
ko'o yetlo meyke
ektáhakxa ewáxok;
watchásekxak sa' épátek
ektémól'a nélháxaqxo.
37 Altennaksek sa'
ko'o Dios ekyókxoho
m'a aqsok sélane nak,
atnegwók sa' nápaqtók
meyke sekháxaheykha.
38 Mehexeyenmak
han ko'o ekmaso m'a
xapop ahagkok nak,
megkalekxagweykha han
ma'a xapop sekpeyncheyam.
39 Élmenyexchessek
agkok ko'o aqsok apagkok
énxet ekwetasso nak xapop,
essenhan seknaqtawásegkoho
enxoho m'a énxet'ák
apkeltamheykha nak namyep,
40 ¡katyapok sa' menóke
xapop ahagkok,
keñe sa' hótáhap metyepe',
katyapok sa' pa'at ekmaso,
keñe sa' apho nak
hótáhap metyepe'!
Cháxa néxa axta appeywa Job apxeyenma aptémakxa'.
© © Enxet Lengua Sur Bible © Paraguayan Bible Society, 2015.