Job
1-2 Makhemek ko'o
makham sekpaqméteykha
seklegeykegkoho ekmáske,
eñassáseykegkók ko'o m'a
Dios apmopwána nak.
3 ¡Ay'asagkoho annal'a
ko'o ekpayhókxa óta',
tén han yaqwánxa
atnehek ammok
ma'a aphakxa nak!
4 Altennaksek nahan
nápaqtók ma'a setnamakxa nak,
hakte xámok agko' aqsok
yaqwayam axének.
5 ¡Ay'asagkohok han
yaqwánxa atnehek
wátegmowagkok ma'a
ektáhakxa enxoho
chá'a seyátegmowéyak!
6 Yeyxhok sa' ko'o
sektáhakxa sekpeywa m'a,
ménnaqtések sa'
appeywa hélána',
memha sa' ma'a ektémakxa
nak ekha apmopwána
7 ey'asagkohok sa'
ekpayhawo sektáhakxa';
hexének sa' sekteme
meyke sektémakxa,
¡elwataksohok apagko' sa'
han apteme sékpelchémo!
8 Ekmahágkek axta
ekteyapmakxa ekhem
sétama Dios,
méko axta eyke m'a;
ekmeyákxeyk axta
sétama m'a
taxnegwánxa ekhem,
axta óteyákxa'.
9 Keñe sekmeyákxo
makham nexcheyha,
axta han ót'ak ma'a;
ekmeyákxeyk axta
han nepyeyam,
méko axta han ma'a.
10 Apya'ásegkok ekyókxoho
ektémakxa sekxega ko'o m'a;
apkelanawók agkok sektémakxa,
étak sa' eyáxña'awo
agko' sektémakxa
ektémól'a sawo
ekyátekto ekmomnáwa.
11 Ekyetlamchek
chá'a ko'o meyke
sekyetnakhágwayam ma'a
ámay séltennassamakxa nak chá'a.
12 Éláneyak chá'a ko'o
m'a segánamakxa
apagkok nak,
tén han apchánamakxa
nak antéhek,
malaneyk ma'a
sekmámenyého ahagko' nak.
13 Peyk agkok elának
xama aqsok ma'a,
elának nahan;
méko awanchek
kayaqmagkassesek ma'a
yaqwánxa etnehek.
14 Cham'a apmakókxa
enxoho chá'a hetnéssesek,
hetnéssesek nahan,
yetlo m'a ekyókxoho aqsok
apmáheyo nak chá'a
etnéssesek xa ektáha nak.
15 Cháxa keñamak
seyáya nak ko'o m'a;
xénchek agkok chá'a
ko'o ewáxok ma'a,
keytlawhok chá'a seyeye.
16 Eyélaqtéssessegkek
ko'o ewáxok ma'a Dios,
ekha nak Apyennaqte.
17 ¡Hexyánegkesho annal'a axta'a,
keñe heyápok ekyáqtessóxma!
© © Enxet Lengua Sur Bible © Paraguayan Bible Society, 2015.