Jesús tén han kelán'a eñama Samaria
1 Apkellegayak axta amya'a fariseos apxámáseykekxo énxet apkelyetleykekxa m'a Jesús, tén han apxámokma apyaqpassáseyak yegmen, axta kaxnémók ma'a ekweykenxa axta apyaqpassáseyak ma'a Juan. 2 (Háwe axta eykhe Jesús ma'a apyaqpassáseykegko axta yegmen énxet'ák, apkeltáméséyak axta eyke). 3 Xama axta aplegaya amya'a Jesús, aptaqhémók axta makham Galilea apkeñama m'a Judea.
4 Samaria axta nahan eyeykhágwakxak chá'a, apmeyákxoho enxoho m'a. 5 Axta keñamak apweykmo nátegma ekwesey axta Sicar cham'a Samaria nak, ketók axta m'a xapop apmeyáseykekxexa axta apketche m'a Jacob, cham'a apketche José. 6 Cha'a ekyetnamakxa axta nahan Jacob axta yámelchet apagkok ma'a. Apyampágweykmek axta Jesús náxet ámay, apheykmek axta nekha yámelchet. Ketók axta anhan ektémakxa yetseksók ekhem. 7 Weykekxeyk axta nahan xama kelán'a Samaria ekyekweykekxoho yegmen, keñe axta Jesús aptéma apkenagkama s'e:
—Heyekwés ko'óxa yegmen yaqwayam eynek, 8 hakte nátegma axta apkelmaheykegkok apkeltáméséyak aptegyágweykmo aptéyak.
9 Axta entemék eyátegmoweykegko kelán'a s'e:
—¿Yaqsa ektáha sélmaxneya nak yegmen?, judío exchep, Samaria kelán'a ko'o. Hakte mepaqhetchesek chá'a énxet'ák judíos m'a samaritanos.
10 Axta aptemék apchátegmoweykegko Jesús se'e:
—Kaxtemeyk xeyk xeye' ekyá'áseykegkoho m'a aqsok segméssamól'a chá'a Dios, tén han apkelmaxneya nak xeye' yegmen, kalmaxnak xeyk xeye' m'a, keñe exchek egkések ma'a yegmen ekyennaqtéssamo nak egnények.
11 Tén axta kelán'a ektéma eyenagkama s'e:
—Wesse', méko exchep apyekwe yegmen, tawanyek nahan se'e yámelchet nak: ¿Háxko sa' kañék hegkések ma'a yegmen ekyennaqtéssamo nak egnények? 12 Nélyéheyncha'a Jacob axta sempekkencháseykekxa negko'o s'e yámelchet nak, keso apyamakxa axta nahan chá'a yegmen se'e, tén han ma'a apketchek, ekweykekxoho m'a apnaqtósso. ¿Apyeykhágweykmók enxeykel'a exchep ma'a Jacob?
13 Axta aptemék apchátegmoweykegko Jesús se'e:
—Apyókxoho énxet ektáhakxa enxoho apyenéyak se'e yegmen nak, kalnápekxak sa' chá'a ekhem; 14 keñe apyenéyak enxoho m'a yegmen peya nak ko'o agkések, megkalnápekxeyk sa' chá'a ekhem xama enxoho. Hakte cham'a yegmen peya nak ko'o almésagkok, katnekxak sa' ekteyapmakxa yegmen ma'a apkelwáxok, yaqwayam sa' katyapok kalmésagkok ekyennaqte apnénya'ák megkatnégwayam néxa.
15 Keñe axta kelán'a ektéma eyenagkama s'e:
—Wesse', hegkés sa' ko'óxa xa yegmen nak, yaqwayam sa' meheyaqhekxeyk chá'a ko'o ekhem, tén han kamaskok amyenták ayekwaták yegmen se'e yámelchet nak.
16 Axta aptemék Jesús apkenagkama s'e:
—Kayentawakxa atáwa', keñe sa' keyxyók makham se'e.
17 Keñe axta kelán'a ektéma eyátegmoweykegko s'e:
—Méko ko'o etáwa'.
Axta aptemék apkenagkama Jesús se'e:
—Naqsók xa ektáhakxa nak ekpeywa exche' ekxéna méko atáwa'; 18 cinco exche' apweykmok anaqteyegka'a, keñe m'a ekmeykekxa nak kaxwo', háwe atáwa'. Naqsók xa ektáhakxa nak ekpeywa.
19 Xama axta eklegaya xa, axta entemék kelán'a eyenagkama s'e:
—Wesse' ekya'ásegwokmek ko'o kaxwók xép apteme Dios appeywa aplegasso. 20 Axta apkelpeykessamók chá'a negko'o ẽlyapmeyk nanók Dios se'e néten egkexe nak, cham'a samaritanos nak; keñe kéxegke kélteme nak judíos kélxeyenma chá'a Jerusalén eyéméxko kólpeykeshok ma'a Dios.
21 Axta aptemék apchátegmoweykegko Jesús se'e:
—Kelán'a, náhey'ássem aqsa, kammok sa' ekhem yaqwánxa kólpeykeshok kéxegke Egyáp meyke kélmeyeykenta s'e néten egkexe nak tén han meyke kélmeyeykekxa m'a Jerusalén. 22 Megkólya'áseykegkok kéxegke m'a kélpeykessamo nak; negko'o eyke negya'áseykegkók ma'a nélpeykessamo nak, hakte judíos keñamak ma'a nélwagkásamáxche teyp nak. 23 Peyk eyke kaxwók kammok ekhem, keso kaxwo' nak, cham'a yaqwánxa sa' etnéssesek ekmámnaqsoho apkelpeykessamo Dios ma'a énxet'ák ektáha nak naqsók apkelpeykessamo Dios, ekhawo apkeltémókxa nak chá'a etnahagkok ma'a Espíritu apkeñama nak Dios. Hakte apmenyeyk chá'a Egyáp etnahagkok énxet xa ektáha nak, cham'a apkelpeykessamo nak chá'a. 24 Dios apteme Espíritu, keñe m'a énxet ektáha nak chá'a apkelpeykessamo, kéméxcheyk chá'a etnahagkok ekmámnaqsoho apkelpeykessamo, apkeltémókxa nak chá'a etnahagkok ma'a Espíritu apkeñama nak Dios.
25 Keñe axta kelán'a ektéma eyenagkama s'e:
—Ekya'ásegkók ko'o apxénamakpo ewak Mesías, apkeltamhomakpo nak Cristo; apwa'ak sa' agkok ma'a, hẽltennaksek sa' ektémakxa ekyókxoho xa.
26 Axta aptemék apkenagkama Jesús se'e:
—Ko'o neykhe xa, keso sekpaqhetchesa nak xeye'.
27 Keñe axta apkelweykto apkeltáméséyak, kelpelakkassegkek axta nahan apweteya appaqhetchásseykencha'a xama kelán'a Jesús. Kelnawagkamchek axta eyke elmaxneyha aqsok ekmámenyého xa kelán'a nak, tén han elmaxneyha ektémakxa élpaqhetchásamáxkoho. 28 Pekkenmeyk axta yátegwáxwa agkok keñe ekmeyeykekxo m'a nátegma. Axta entemék éltennáseykekxo énxet'ák se'e:
29 —Kólteyánegwomho hana xama énxet séltennasa exchek ko'o ekyókxoho aqsok sélane. ¿Háweya Mesías ma'a?
30 Apkelánteyepmeyk axta nátegma énxet'ák apkelmaheykegko m'a aphakxa axta Jesús. 31 Keñe axta apkeltáméséyak aptéma apkenagkama Jesús apmonye' ekweykekxa kelán'a s'e:
—Sẽlxekmósso, etaw sekxók apto.
32 Keñe axta aptéma apkelanagkama s'e:
—Yetneyk ko'o sekto megkólya'ásegko nak kéxegke.
33 Axta aptemék apkelmaxneyeykencha'a chá'a pók apkeltáméséyak se'e:
—¿Kélsókasakmek enxeykel'a apto?
34 Keñe axta Jesús aptéma apkelanagkama s'e:
—Neykhe ko'o sekto m'a sélane nak chá'a apmopmenyého m'a aptáha axta seyáphasso ko'o, tén han apenchessesek sélánésso m'a aptamheykha. 35 Kéltemék chá'a kéxegke kélpeywa s'e:
—‘Cuatro pelten makham kéméxcheyk yaqwayam kanakxaxchek aqsok ekyexna’; éltamhók eyke ko'o kéxegke kóllanok ma'a aqsok kélcheneykekxa nak, makhetchek kaxwo', wokmek eknakxamáxchexa ekyexna. 36 Kólyánmagkasek chá'a aptamheykha m'a apnakxo nak chá'a aqsok ekyexna, keñe m'a aqsok apnakxo nak ekteme ekyennaqte egnények megkatnégwayam néxa, keñe kaxhok chá'a mók ekpayheykekxa apwáxok pók ma'a ektáha nak apkeneykekxa tén han ma'a apnakxo nak ekyexna. 37 Naqsók ektémakxa nak chá'a amya'a ekxénamaxko s'e: ‘Nápakha chá'a eknekxa', nápakha han chá'a enakxagkok ekyexna.’ 38 Éláphássegkek axta ko'o kéxegke yaqwayam kólnakxagkok aqsok ekyexna m'a megkóltamheykegkaxa axta; pók énxet'ák axta eyke apkeltamheykha m'a, keñe kéxegke kélmeykekxo m'a aptekkesso axta apkeltamheykha.
39 Apxámok axta nahan énxet'ák apkeleñama Samaria mey'ásseykmo Jesús, cham'a ektémakxa axta éltennásseykekxo kelán'a s'e: “Éltennásekxók xeyk ko'o ekyókxoho aqsok sélane.” 40 Xama axta apkelweykmo samaritanos ma'a aphakxa Jesús, apkeltémok axta exek sekxók xamo'. Ánet ekhem axta anhan aphayam Jesús ma'a, 41 apxámeykegkek axta aqsa nahan énxet apteme melya'ásseyam aplegaya appeywa apagko'.
42 Keñe axta ektéma amya'a eyáneymaxko kelán'a s'e:
—Magya'ássekmok kaxwók negko'o, háwe ekwánxa agkok ma'a ektáhakxa exchek sẽltennáseykekxa exche', hakte negko'o egagko' nahan nenleg'ak kaxwo' aptáhakxa appeywa, nélya'ásegwokmek nahan naqsók apteme apkelwagkasso teyp énxet'ák keso náxop.
Jesús aptaqmelchesseyam wesse' apwányam apkeláneykha apketche
(Mt 8.5-13Lc 7.1-10)43 Yeykhayak axta xa ánet ekhem nak, apteyepmeyk axta Jesús ma'a Samaria apmeyeykekxo m'a Galilea. 44 Hakte apxeyenmeyk axta Jesús méko katnehek eyáyo Dios appeywa aplegasso m'a apchókxa apagko' nak. 45 Xama axta apweykekxo m'a Galilea, apchápeykha axta apmoma takha' m'a énxet'ák apheykha m'a yókxexma nak, hakte apkelmaheykegkek axta anhan Jerusalén xa énxet'ák nak, cham'a élánamáxko axta apkelsawássessamo ekhem melwagqayam axta chá'a judíos ma'a Pascua, apkelweteyak axta anhan ekyókxoho aqsok apkelane axta Jesús ma'a.
46 Aptaqhémók axta makham Jesús ma'a Caná yókxexma Galilea, aptemessáseykekxexa axta vino yegmen. Aphegkek axta anhan xama wesse' apwányam apkeláneykha ekha kéláyo m'a, apyetna axta apketche apháxamap ma'a Cafarnaúm. 47 Xama axta aplegaya amya'a wesse' apwányam apkeláneykha apweykto Jesús Galilea apkeñama m'a Judea, apya'eykekxeyk axta apkeltémo emhagkok apxagkok etaqmelchessessók ma'a apketche, hakte ketók axta apketsapmakxa. 48 Axta aptemék Jesús apchátegmoweykegko s'e:
—Kólya'assók chá'a kéxegke megkólwet'a enxoho m'a aqsok élyawe sempelakkasso nak agweta'.
49 Axta eyke aptemék apkenagkama wesse' apwányam apkeláneykha s'e:
—Wesse', nók heykxa', megyetsapakxa nak makham hatte.
50 Keñe axta Jesús aptéma apkenagkama s'e:
—Etaqhoho apxagkok; megyetsepek sa' apketche.
Axta ey'ásseykmok wesse' apkeláneykha m'a aptémakxa axta apkenagkama Jesús, aptaqheykekxeyk axta. 51 Xama axta apchágketchesseykekxo apxagkok, apkelanyexeykegkek axta apkeláneykha, axta aptemék apkenagkama s'e:
—¡Apmallanchek apketche!
52 Apkelmaxneyeykha axta apkeláneykha ekwánxa hora aptaqmelweykmo m'a apketche, keñe axta aptéma apkelátegmoweykegko s'e:
—Hem axta ekmassa ekmexanma apyempehek, la una taxnám axta.
53 Keñe axta apyáp ekxénweykekxoho apwáxok ekweykenxa axta hora aptéma apkenagkama Jesús se'e: “Megyetsepek sa' apketche”. Aptemegkek axta nahan mey'ásseyam Jesús xa énxet nak, ekweykekxoho m'a ekyókxoho ekheykha nak apxagkok.
54 Cháxa ektáhakxa axta ánet ekwetamaxche apkelane Jesús aqsok ekyawe agko' sempelakkasso nak agweta', cham'a apweykekxo axta makham Galilea apkeñama m'a Judea.
© © Enxet Lengua Sur Bible © Paraguayan Bible Society, 2015.