Jesús apkelmaxnéssesso apkeltáméséyak
1 Apsekheykekxók axta néten Jesús natámen apxeyenma xa aqsok nak, axta aptemék appaqmeyesma s'e: “Táta wokmek kaxwók ekhem. Etnésses kaxwók apcheymákpoho Apketche, yaqwayam sa' etnéssesek nahan xépxa apcheymákpoho m'a. 2 Hakte apméssegkek axta exchep Apketche yaqwayam etnehek meyke ekhémo nepyeseksa m'a énxet'ák, yaqwayam enxoho elmésagkok élyennaqte apnénya'ák megkatnégwayam néxa apyókxoho m'a énxet'ák apkelmésso axta exchep. 3 Keso ekyennaqte nak apnények se'e: cham'a ektáha nak apya'áseykegkoho exchep apteme wánxa xama Dios apmámnaqsoho, tén han Jesucristo, apcháphasso axta exchep.
4 “Ekteméssessegkek ko'o exchep apcheymákpoho keso náxop, hakte ekpenchessegkek ko'o sélane m'a sektamheykha segkésso axta exchep. 5 Táta hegkés ko'o makham seyeymáxkoho aphakxa nak xép ekyetnama axta xamók ko'o exchep ma'a amonye' axta élánamáxche keso náxop.
6 “Elya'assásegweykmek axta ko'o exchep aptémakxa m'a énxet'ák apkelyéseykencha'a axta keso náxop, yaqwayam hélmések ko'o. Xép axta apagkok xa énxet'ák nak, keñe sélméssama ko'o exchep, apkelyaheykekxók axta nahan ma'a appeywa. 7 Apkelya'ásegweykmek nahan kaxwók ektáha eñama exchep ma'a ekyókxoho aqsok segkésso axta exchep; 8 hakte éltennassegkek axta ko'o m'a amya'a segkésso axta exchep, apkelmomchek axta nahan takha' m'a. Apkelya'ásegweykmek axta ektéma ekmámnaqsoho séñama ko'o m'a aphakxa nak xép, axta nahan elya'ásseykmok apteme exchep seyáphasso ko'o.
9 “Élmaxnéssessek ko'o exchep séltamho epasmok xa énxet'ák nak, malmaxnessásak ko'o m'a énxet'ák apkeleñamakxa apagko' nak keso náxop, wánxa m'a ektáha axta exchep sélmésso, hakte xép énxet'ák apagkok xa. 10 Ekyókxoho ektáha nak ko'o ahagkok, xép nahan apagkok, keñe m'a ektáha nak xép apagkok, ko'o nahan ahagkok ma'a; cháxa keñamak ekwetamaxko ko'o seyeymáxkoho xa énxet'ák nak.
11 “Kaxwók sa' eyke ko'o kamassegwók sekha keso náxop, sa' eyke exmakha makham xa énxet'ák nak, cham'a sekmeyákxo sa' makham yaqwayam axnakxohok xamo' xép. Táta aptaqmalma, eltaqmelches sa', yetlo apmopwána apagkok apagko', cham'a apwesey segkéssama axta, yaqwayam enxoho épetchekxohok apagko' pók etnekxak xama, ekhawo ektémakxa nak negko'o, xép tén han ko'o. 12 Éltaqmelchessegkek axta chá'a ko'o xa énxet'ák nak, sekhamakxa xamók keso náxop, élmasmeyk axta anhan chá'a yetlo m'a apmopwána apagkok apagko' nak, cham'a apwesey segkéssama axta exchep. Axta anhan exyáneykmok xama enxoho xa énxet'ák nak, wánxa axta aqsa m'a apxegáneykmo axta, yaqwayam enxoho katnehek ma'a ektémakxa axta eknaqtáxésamaxche'.
13 “Keñe kaxwók peya amyenták xa aphakxa nak xép; ekxeyenmeyk eyke ko'o xa aqsok nak sekhakxa nak makham keso náxop, yaqwayam enxoho kayáwhok agko' élpayheykekxa apkelwáxok, ekhawo ektémakxa nak ko'o ekyawe ekpayheykekxa ewáxok. 14 Éltennáseykha axta chá'a ko'o m'a appeywa nak, apkeltaqnagkamchek axta eyke m'a énxet'ák apkeleñamakxa apagko' nak keso náxop, hakte háwe apkeleñamakxa apagko' náxop ma'a, ekhawo nak han ko'óxa megkatnaha séñamakxa keso náxop. 15 Malmaxneyk ko'o exchep yaqwayam elwátéssesagkok apheykha keso náxop, éltamhók eyke aqsa elmeyók neyseksa aqsok élmasagcha'a. 16 Háwe apkeleñamakxa apagko' náxop xa énxet'ák nak, ekhawo ektémakxa nak ko'o megkatnaha séñamakxa keso náxop. 17 Etnéssesho apagko' xép apkelpagkanamap xa énxet'ák nak eñama m'a amya'a ekmámnaqsoho apagkok nak; xép appeywa ekteme ekmámnaqsoho. 18 Éláphássegkek ko'óxa nepyeseksa énxet'ák apkeleñamakxa apagko' nak náxop ma'a, ekhawo ektémakxa axta exchep seyáphassama ko'o nepyeseksa m'a énxet'ák apheykegkaxa apagko' nak keso náxop. 19 Axta keñamak nahan xa énxet'ák nak, sekpagkanchásamáxkoho ahagko' ko'o exchep yaqwayam agkésaxkohok ahagko', yaqwayam enxoho nahan etnahagkok apkelpagkanamap eñama m'a amya'a ekmámnaqsoho nak.
20 “Háwe eyke ko'o wánxa sélmaxnéssesa séltamho epasmok xa énxet'ák nak, akke nahan élmaxnessásak ma'a peya nak han etnahagkok mehey'ásseyam ko'o, apkelleg'a enxoho apkeltenneykha xa énxet'ák nak. 21 Élmaxnakkek ko'o exchep séltamho épetchekxohok apagko' pók xa énxet'ák nak; ekhawo nak xép Táta sépetcheyo ko'o, tén han sekyepetcheyo ko'o exchep, tén han hẽlyepetkohok negko'óxa xa énxet'ák nak, yaqwayam sa' melya'ássemek énxet'ák apheykegkaxa apagko' nak náxop apteme exchep seyáphasso ko'o. 22 Élmeyáseykegkek nahan ko'o m'a seyeymáxkoho segkésso axta exchep, yaqwayam enxoho katnekxak xama, ekhawo ektémakxa nak negko'óxa nentamheykekxo xama, xép tén han ko'o: 23 élyepetcheyók ko'o xa énxet'ák nak, keñe exchep sépetcheyo ko'o, yaqwayam enxoho etnahagkok nahan naqsók apyepetcheykekxoho apagko' pók ma'a, keñe sa' elya'ásegwók énxet'ák apheykegkaxa apagko' nak náxop apteme exchep seyáphasso ko'o, tén han apkelásekhayo exchep ma'a énxet'ák apagkok, ekhawo ektémakxa nak seyásekhayo ko'o exchep.
24 “Táta, élméssegkek axta ko'o exchep xa énxet'ák nak, émenyeyk nahan ko'o hexhok xamo' ma'a yaqwánxa nak axnók ko'o, yaqwayam sa' elwetak seyeymáxkoho, cham'a seyeymáxkoho segkéssama axta exchep; hakte eyásekhayók axta exchep eyeynamo m'a sekxók axta ekmáheyo kalanaxchek keso náxop. 25 Xép Táta appéwomo, melya'áseykegkok xép ma'a énxet'ák apheykegkaxa apagko' nak keso náxop; ekya'áseykegkók eyke ko'o exchep, apkelya'áseykegkók nahan apteme exchep seyáphasso ko'o exchep ma'a énxet'ák apagkok. 26 Élya'assásegweykmek axta ko'o aptémakxa exchep ma'a, malwátéssemek sa' nahan sekteme xa, yaqwayam sa' keytek apkelwáxok ma'a ektémakxa nak seyásekhayo exchep, tén han axek ko'óxa apkelwáxok ma'a.”
© © Enxet Lengua Sur Bible © Paraguayan Bible Society, 2015.