1 “Éltennássek ko'o kéxegke xa aqsok, yaqwayam sa' megkólyensemek kélteme mehelya'ásseyam ko'o. 2 Kólántekkesek sa' kéxegke apchaqneykekxexa nak judíos, kammok sa' nahan ekhem yaqwánxa elnápok kéxegke m'a énxet'ák, kalxének apkelwáxok apkelánésa aqsok ektaqmela m'a Dios. 3 Elanagkok sa' xa aqsok nak, hakte mehẽlya'áseykegkok negko'o, melya'ásegkok ma'a Táta tén han ko'óxa. 4 Éltennássek ko'o kéxegke xa, yaqwayam sa' kaxénwakxohok kélwáxok kéxegke séltennassama, cham'a ekwokmo sa'.
Aqsok apkelane nak Espíritu Santo
“Axta altennassók ko'o kéxegke sekxo' agko' axta xa, hakte sélxegexma'a axta. 5 Peyk eyke ko'o kaxwók ataqhoho' yaqwayam enxoho axnakxohok xamo' ma'a aptáha axta seyáphasso, makke hélmaxneyeykha ko'o kélxama enxoho kéxegke yaqweykenxa amhagkok; 6 kelyaqhápeykxók aqsa kélwáxok séltennasa xa aqsok nak. 7 Naqsók eyke ko'o sektáha séláneya s'e: tásek sa' katnehek ektáhakxa kéxegke sektaqháwo enxoho. Agkok ko'o ataqháwo', meweyk ma'a Apkelmasma yaqwayam exek kélnepyeseksa kéxegke; ektaqháwók sa' agkok ko'o, wáphássesek sa' kéxegke m'a. 8 Apwa'ak sa' agkok ma'a, tásek sa' katnehek apxekmósso énxet'ák apheykha nak keso náxop yaqsa m'a megkay'assáxma nak, tén han ma'a meyke nak ektémakxa, tén han yaqsa kasexnánéxchek kaxkak ma'a Dios apyekpelchássessamo. 9 ¿Yaqsa m'a megkay'assáxma nak? Neykhe m'a sey'ásseyam nak ko'o. 10 ¿Yaqsa m'a meyke nak aptémakxa? Ko'o neykhe m'a, peya nak amyekxak ma'a aphakxa nak Táta, keñe sa' mehélwetekxók chá'a kéxegke. 11 ¿Yaqsa m'a peya nak kaxkak Dios apyekpelchássessamo? Neykhe m'a éláneykha nak keso náxop, cham'a nanók ekxénamaxche nak yaqweykenxa kólteméssesek kéllegassáseykegkoho.
12 “Xámok eykhe yaqwayam altennaksek kéxegke, megkólwanchek eyke kólya'ásegwók kéxegke ekyókxoho s'e kaxwo nak. 13 Apxegakmek sa' agkok ma'a Espíritu apmámnaqsoho nak, sa' epékessesagkok chá'a ekyókxoho aqsok ekmámnaqsoho nak ma'a; hakte mexénhek sa' chá'a m'a apmáheyo apagko' nak exének, sa' aqsa chá'a exének ekyókxoho m'a aplege nak chá'a, elya'assásegwók sa' nahan ma'a aqsok peya nak katnehek. 14 Exekmósek sa' nahan kéxegke m'a ektémakxa nak seyeymáxkoho, hakte exkak sa' ma'a aqsok ektáha nak ko'o ahagkok, keñe sa' ellegaksek kéxegke. 15 Ekyókxoho aqsok ekyetnakxa nak Táta, ko'o nahan ahagkok ma'a; cháxa keñamak sekxéna nak ko'o peya exkak Espíritu m'a ektáha nak ahagko' ko'o, tén sa' ellegaksek kéxegke.
16 “Kaxwók sa mehélwetekxók chá'a kéxegke, kaxwók sa' eyke nahan hélwetekxak makham.”
Ekyaqhápeykha egwáxok yaqwayam kayaqmegekxak ekpayheykekxa egwáxok
17 Keñe axta nápakha apkeltáméséyak aptéma apkelpaqhetchásamákpoho s'e:
—¿Yaqsa kexaha apxéna aptáha nak segáneya kaxwók sa' mehélwetekxók chá'a kéxegke, kaxwók sa' eyke nahan hélwetekxak makham apxéna emyekxak makham ma'a aphakxa nak Apyáp? 18 ¿Yaqsa xa apxéna nak aptáha appeywa ‘yaqwatakxoho’? Magya'ásegkok negko'o apxéna.
19 Apyekpelchegkek axta nahan Jesús apmáheyo elmaxneyha. Tén axta aptéma apkelanagkama s'e:
—Exchek ektáhak ko'o séláneya kéxegke kaxwók sa' mehélwetekxók chá'a, kaxwók sa' eyke hélwetekxak makham. ¿Keyaxa kélpaqhetchásexkoho nak chá'a kéxegke kélxéna xa? 20 Naqsók ko'o sektáha séláneya kéxegke kóllekxagwaha sa', kalyaqhapmakha sa' nahan kélwáxok, keñe sa' ma'a énxet'ák apheykha nak keso náxop kalpayhekxak sa' apkelwáxok. Kalyaqhapmakha sa' eykhe kéxegke kélwáxok, ekpayheykekxa kélwáxok sa' eyke kayaqmagekxak ma'a élyaqhápeykha nak kélwáxok. 21 Peyk agkok chá'a katnehek naqláwa xama kelán'a, kayaqhapmakha chá'a awáxok, hakte kammok chá'a ekhem ektémakxa naqláwa; apteyekmek agkok ma'a étche, kalwánaqmak chá'a m'a ekmáske eñama ekpayheykekxa awáxok aptéyam xama sakcha'a keso náxop. 22 Cháxa ektáhakxa nak han kéxegkáxa élyaqhápeyncha'a kélwáxok se'e kaxwo' nak; awaták sa' eyke ko'o makham alwetágwaták kéxegke, keñe sa' awanhek katnehek élpayheykekxa kélwáxok, méko sa' nahan awanchek keymentók kéxegke xa ekpayheykekxa kélwáxok nak.
23 “Mehélmaxneyha sa' kaxwók ko'o xama aqsok xa ekhem nak. Naqsók nahan ko'o sektáha séláneya kéxegke peya egkések chá'a Táta m'a ekyókxoho aqsok kélmaxneyakxa enxoho chá'a yetlo kélxeyenma sekwesey. 24 Akke kólmaxneyk makham kéxegke xama aqsok Táta yetlo kélxeyenma sekwesey s'e kaxwo' nak, kólmaxna keñe sa' kólxawa', yaqwayam sa' kayágwomhok agko' élpayheykekxa kélwáxok.
Jesucristo apmallanma ektémakxa keso náxop
25 “Éltennassegkek chá'a ko'o kéxegke ekyókxoho xa aqsok nak, sekmeykencha'a chá'a m'a aqsok sekyetcháseykxoho nak, kammok sa' eyke ekhem yaqwánxa maltennasha chá'a kéxegke m'a aqsok sekyetcháseykekxoho nak, apékesseshok sa' chá'a séltennasso m'a ekxeyenma nak ma'a Táta. 26 Kólmaxnak sa' chá'a kéxegke aqsok yetlo kélxeyenma sekwesey xa ekhem nak; háwe sa' ko'o yaqwayam almaxnéssesek wának epasmok kéxegke m'a Táta, 27 hakte apkelásekhayók kéxegke m'a Táta. Apkelásekhayo', hakte élásekhayók ko'o kéxegke, megkólya'ásseykmok nahan séñama ko'o m'a Dios. 28 Ekteyepmeyk axta ko'o m'a aphakxa nak Táta, yaqwayam awak keso náxop, peyk eyke ayenyekxak makham keso náxop, yaqwayam amyekxak makham ma'a aphakxa nak Táta.”
29 Keñe axta apkeltáméséyak aptéma apkenagkama s'e:
—Appékásawók kaxwók xép sẽltennasso meyke apmeykha aqsok apyetcháseykekxoho. 30 Nélya'ásegwokmek kaxwók xép apya'áseykegkoho ekyókxoho aqsok, tén han megkeyméxko elmaxneyha xama énxet enxoho. Magya'ássekmok kaxwók negko'o apkeñama exchep ma'a Dios.
31 Axta aptemék Jesús apchátegmoweykegko s'e.
—¿Naqsóya megkólya'ássekmo kaxwo'? 32 Wokmek kaxwók ekhem, keso kaxwo' nak, yaqwánxa sa' kólexpaqnek kéxegke, kólmahagkok chá'a kélxama m'a kélmakókxa enxoho chá'a kólmahagkok, exakko' sa' hélyenyók ko'o. Háwe eyke ko'o exakko', hakte Táta ko'o sekxegexma. 33 Éltennássek kéxegke ekyókxoho xa, yaqwayam sa' kólwetak meyke ektáhakxa kélheykha neyseksók sélyepetcheyo ko'o. Kóllegagkohok sa' kéxegke keso náxop; eyke kólwasqápekxoho sa', ekmallanegkek axta ko'o ektémakxa nak keso náxop.
© © Enxet Lengua Sur Bible © Paraguayan Bible Society, 2015.