Babilonia kélmassésseyam
1 Aptáhak Wesse' egegkok se'e:
“Wahak sa' ko'o
éxchahayam ekyennaqte agko'
ekmassésseykmohol'a aqsok ma'a
Babilonia, tén han caldeos.
2 Máxa hótáhap apaktek
kélchempasso sa' ko'o
wának etnéssesek
apkelenmexma m'a Babilonia;
meyke énxet apheykha
sa' wának etnéssásekxak ma'a
kañe' xapop apagkok nak.
Wokmek sa' agkok ekhem ekmaso,
máxa sa' kañék kélchetámeyam.
3 ¡Kóllánekxa yágke kélagkok
kélmeykha nak chá'a yágke!
¡Kóláhakkásekxa kélnénya'ák ma'a
kéláhakkasso nak chá'a!
¡Nágkalapyósho kóllanok ma'a
wokma'ák nak Babilonia;
kólmasséssem sa' apyókxoho m'a
sẽlpextétamo apagkok!
4 Exnagkok sa' aphopák énxet'ák
ma'a ámay nak,
cham'a ekyókxoho nak caldeos
apchókxa,
5 apkeláneykegkek eykhe
melya'assáxma nahaqtók ko'o m'a
énxet'ák Israel tén han Judá,
apsawheyáseykekxók
melya'assáxma m'a apchókxa,
makke akxakhák ko'o makham,
sektáha nak Wesse' ekha sekyennaqte,
Dios Appagkanamap nak Israel.
6 “¡Kólántép Babilonia!
¡Kólwagkasaxche teyp
kélewagko enxoho!
¡Nágkóltamho kóletsapok
eñama apkeláneyak
melya'assáxma m'a
énxet'ák Babilonia!
Wokmek kaxwók
sekyaqmagkáseykekxexa mók
apkeltémakxa,
axnéshok sa' mók ma'a
ektémakxa nak
chá'a aqsok apkeláneyak.
7 Aphémók axta Babilonia
sekmeykencha'a m'a
egheykok sawo
ekyátekto ekmomnáwa nak,
élnáhakkassama axta chá'a
anmen apyókxoho énxet'ák
apheykha nak keso náxop.
Apyenágkek axta agkok chá'a
apyókxoho énxet'ák xa vino nak,
kalyeykesek axta chá'a exma.
8 Axta eyke kawenaqtémok
apteyekmo m'a Babilonia
aptamheykekxo nápakha'a apketkók.
¡Kóllekxagwaha kóllanok ma'a!
Kólsantagkas pánaqte yaqwayam
kóltexnássesagkok apkelyense,
lapmaxcheyk sa' kaltaqmelchessessók.”
9 Néltexnágkek negko'o
pánaqte m'a Babilonia,
makke etaqmelwokmok.
Etnehek apagkok xa,
nók ólántépok se'e,
enxama sa' chá'a
ólmeyekxak ma'a negókxa,
hakte weykmók apkelane
aqsok ekmaso agko' ma'a néten,
weykmók ma'a yaphope nak.
10 Entaqmelchessáseykxeyk axta
negheykha m'a Wesse' egegkok.
Kólchexyem,
óltennágwakxak Sión ma'a
aqsok apkelane axta
Dios Wesse' egagkok.
11 Peyk emasséssók
Wesse' egegkok ma'a Babilonia,
apnaqxétekhássásegkek han
apkelwáxok ma'a
kelwesse'e apkelwányam nak Media.
Cháxa yaqwayam eyaqmagkásekxak
Wesse' egegkok apteméssessamakxa
axta m'a tegma appagkanamap apagkok.
¡Kóllánekxa yágke aktek kélagkok!
¡Kólmák sa' kéláhakkásamáxche!
12 ¡Kólya'és néten
magkenatchesso yaqwayam
kólchetamagkok ma'a
kélhaxtegkesso nak Babilonia!
¡Kólxámasák apkeltaqmelchesso tegma!
¡Kólnegkenák apkelhaxneykha!
¡Kólnegkenák kelhanma!
Hakte apkeláneykekxeyk axta aptáhakxa
Wesse' egegkok yaqweykenxa etnéssesek
apkeltennassama axta m'a
Babilonia, apkelanak nahan.
13 Xép Babilonia,
apyetnama nak neyáwa
wátsam élyawe,
apteme nak ekxámokma aqsok apagkok,
¡wokmek kaxwók néxa apha,
ekmassegwánxa apwetamap!
14 Aptáhak apxéna ekmámnaqsoho
Wesse' ekha nak apyennaqte s'e:
“¡Wáhakkassak sa' ko'o exchep
apkelenmexma,
aptémól'a sawa',
elátsaha sa' nepyeseksa exchep
elmallánek ma'a!”
Dios kélmeneykmássesso
(Jer 10.12-16)15 Yetlo apmopwána axta apkelaneyk
Wesse' egegkok xapop;
yetlo apya'áseykegkoho axta
appekkenmak nélwanmégkaxa;
yetlo apmopwána aqsok axta
appeykessók ma'a néten.
16 Appeywa ekyennaqte chá'a
epáwaksek awáxok yegmen
ekyetnama nak néten,
etekkesek chá'a yaphope
éleñama m'a néxa xapop nak;
etekkesek chá'a apkelyenma
neyseksa ekmámeye;
etekkesek chá'a éxchahayam
eñama m'a appekkenmakxa nak.
17 Élyeyháxma apyókxoho énxet
tén han melya'áseyak aqsok.
Kelyexancháseykha chá'a
aqsok kéleykmássesso m'a
ektáha nak chá'a apkelane:
kéleykmássesso sẽlyexancháseykha m'a,
tén han meyke élennama;
18 aqsok mékoho,
tén han kélya'asseykmoho,
emasséssók sa' Wesse' egegkok
ma'a ekwokmo sa' ekhem
sẽlyekpelchássessamókxa'.
19 ¡Megkaxnawok agko'
Jacob nak Dios apagkok xa,
apkelane nak ekyókxoho aqsok
élánteyapma nak!
Axta apkelyéseykha
énxet'ák Israel ma'a
yaqwayam etnehek apagkok apagko'.
Wesse' ekha apyennaqte:
cháxa apwesey xa.
Babilonia apchásenneykekxa nak chá'a Wesse' egegkok ellegássesagkohok énxet'ák
20 “¡Babilonia, xép apteme
sawo ekyentaxno ahagkok,
sekmeykha nak chá'a
sénchesso kempakhakma!
Xép chá'a wásenneykxak
alyaqtennagkok ma'a
pók aptémakxa énxet'ák,
tén han amasséssók ma'a
ekyókxoho apkelókxa.
21 Xép chá'a wásenneykxak
alyaqtennagkok ma'a yátnáxeg,
tén han ma'a apheykha apkap'ák,
tén han ma'a yátnáxeg apkelyenyawasso
yetlo m'a apkelxegkesso nak chá'a.
22 Xép chá'a wásenneykxak
alyaqtennagkok ma'a énxet'ák,
tén han kelán'ák, apkelwányam,
tén han wokma'ák, wokma'ák apketkók
tén han kelán'ák étkók.
23 Xép chá'a wásenneykxak
alyaqtennagkok ma'a
keláneykha nepkések,
yetlo apnaqtósso,
tén han ma'a apkeltamheykha nak namyep,
yetlo m'a weyke kélméssamól'a
chá'a éltamheykha,
tén han apkeltaqmelchesso nak apkelókxa,
yetlo apkeláneykha.
Babilonia kéllegassáseykegkoho
24 “Kélnápaqta'awók sa' kéxegke
ayaqmagkásekxak apkeltémakxa
m'a énxet'ák Babilonia,
tén han ma'a caldeos,
ekpayhawo nak chá'a atnéssesek,
eñama ekmaso
apteméssessamakxa axta m'a Sión.
Ko'o sekxeyenma xa, sektáha nak Wesse'.
25 Énmexchek ko'o exche'
meteymog ekwenaqte
ekmassesseykmoho nak aqsok,
ekmasseseykmo nak aqsok
ekyókxoho keso náxop.
Ko'o sekxeyenma xa, sektáha nak Wesse'.
Añássesagkohok sa' ko'o exche',
eyttelegwásenták sa' eñama m'a
néten meteymog élwenaqte nak,
egkexe ekmeyesma sa'
atnéssásekxa'.
26 Méko sa' xama enxoho nekha'a étkók
élpaqxo ektaqmalma kólmaha
yaqwayam elanakpok tegma.
Meyke xama aqsok
meyke néxa sa' katnekxa'.
Ko'o sekxeyenma xa, sektáha nak Wesse'.
27 “¡Kólchexen néten
aqsok ma'a apchókxa nak
magkenatchesso yaqwayam
kólchetamagkok!
¡Kólpáwés kélaqkahasso,
kólána' elanagkokxak
aptamhágkaxa apyókxoho énxet'ák,
yaqwayam ektamagkok ma'a Babilonia!
¡Kólenmexches sa' ma'a
apkelókxa nak Ararat, Miní,
tén han ma'a Asquenaz!
¡Kólyésha xama sẽlpextétamo
apkemha apmonye' kempakhakma!
¡Kólána elxog yátnáxeg apkelchánte,
aptémól'a sawa' apkello!
28 Kóllánekxés aptamhágkaxa
apyókxoho énxet'ák yaqwayam ektamagkok;
kóllánekxés nahan aptamhágkaxa m'a
kelwesse'e apkelwányam nak Media,
yetlo apkeltaqmelchesso
nak chá'a apkelókxa,
tén han apkeláneykha,
tén han ma'a ekyókxoho apkelókxa
aptamheykegkaxa nak chá'a
kelwesse'e apkelwányam.”
29 Yawheyha xapop,
pexyennegkek nahan,
hakte apkelanak
Wesse' egegkok ma'a
ekxeyenma axta apwáxok elána',
apmáheyo etnéssásekxak Babilonia
meyke xama aqsok ekmaso agko'.
30 Apkelwáteságkek apkempakhe m'a
sẽlpextétamo Babilonia,
apkelhákxeyk ma'a
tegma apkelyennaqte apagkok nak;
massék apkelyennaqte,
máxa kelán'ák aptamhágkokxa'.
Apkelántaxneykpek ma'a
tegma apkelyawe apagkok nak,
kélwatneyásekxeyk ma'a apxanák.
31 Apyaqmagákpek pók
apkelseykha nak chá'a amya'a
apkeltennássekxo chá'a
wesse' apwányam Babilonia
apmákpo apyókxoho m'a
tegma apwányam apagkok.
32 Apkelmeyk axta apkelenmexma m'a
wátsam apkelyekheykekxexa
axta chá'a énxet'ák,
apkelwatneyk axta han ma'a
tegma apkelyennaqte nak,
apkelyegwakkók apagko' axta m'a
sẽlpextétamo.
33 Hakte aptáhak Wesse' ekha apyennaqte
Dios apagkok nak Israel se'e:
“¡Aphawók Babilonia m'a
kélchexakkassamakxa nak chá'a
apyempe'ék hótáhap apaktek,
kaxwók sa' kammok
ekhem eknakxamáxchexa apaktek!”
34-35 Aptáhak Jerusalén se'e,
tegma apwányam Sión nak:
“Nekha'a étkók axta ko'o
etnéssáseykekxak Nabucodonosor
wesse' apwányam nak Babilonia,
emasséseykmek axta;
máxa axta etnessáseykekxak ma'a
sokpayhe meykel'a aqsok awáxok.
Máxa yegmen askok ekyawe
axta aptemék senaqsapma,
ekyetno nak wátsam ekwányam;
apyaqkáneykmek axta aptama
ekleklamókxa nak apwáxok
ekyetno sekyókxa,
keñe m'a nekha nak apkexakhama.
¡Kólyaqmagkásekxak sa'
setnéssessamakxa axta ko'o m'a Babilonia!
¡Kólyaqmagkásekxa sa'
ektémakxa axta
sẽlnapma negko'o m'a caldeos!”
Dios apmésso appeywa Israel
36 Aptáhak Wesse' egegkok se'e:
“Alánekxések sa' ko'o exchep
amya'a kélteméssessamakxa,
ayaqmagkassásekxak sa' ko'o
apteméssessamakxa exchep
ma'a apkelenmexma.
Eymaksek sa' ko'o m'a wátsam,
tén han ma'a élánteyapmakxa nak
yegmen Babilonia,
37 peya nak etnekxak
ektaháneykekxa mók meteymog,
élleykegkaxa semheg nawha'ák,
meyke énxet apha,
elyegwakkasek sa' chá'a
apyókxoho énxet, yeyk sa' nahan chá'a.
38 Máxa yámakméwa sa'
etnahagkok elyexwéwha
m'a apyókxoho nak,
elesñeykha sa',
ektémól'a m'a étkók nak.
39 Kelmexneyk sa' agkok apyempe'ék,
alagkok sa' ko'o apyenéyak,
apyenéyak yaqwayam sa'
kalyeykesek exma,
tén han kamaskok kalya'ássesagkok aqsok.
Keñe sa' enaqtének meyke néxa,
menaqxétekhagkek sa'.
Ko'o sekxeyenma xa, sektáha nak Wesse'.
40 Keñe sa' anaqlakxak ma'a
aptekyómakxa,
ektémól'a nepkések apketkók
kólnaqlakxak, tén han yát'ay,
tén han ma'a nepkések apkelennay'a.”
Babilonia aptéyam
41 ¡Apteyekmek ma'a Babilonia,
apxénamap nak ekyókxoho yókxexma,
apmákpe'!
¡Apkelyegwakkek apkelwet'a
ektáhakxa m'a apyókxoho énxet'ák!
42 Chapchek yegmen eñama
wátsam ekwányam ma'a Babilonia,
chapchek ma'a élyaqyahayam agkok
élyawe nak.
43 Yókxexma ekmaso agko'
aptamhákxak ma'a
tegma apkelyawe apagkok nak,
meyke xama aqsok,
ekyamayéxma xapop,
ekyaqhapmo exma,
meykexa xama énxet apha,
meykexal'a han kayeykhágwók.
44 “Añássesagkohok sa' ma'a
dios Bel nak Babilonia,
ayekxássesek sa' ma'a
aqsok élmenaqsapma axta,
melyo'ótamók sa' nahan kaxwók
ma'a pók aptémakxa énxet'ák.
¡Kelyaqnenágkek kaxwók ma'a
kélhaxtegkesso nak Babilonia!
45 Énxet'ák ahagkok,
kólántép xa,
¡kólwagkasaxche teyp kólenyahagkok,
amonye' seklómo ahagko'!
46 Nágkólyegwe',
nágkóle kéllegeykha nak amya'a
ektépeykha m'a apchókxa.
Ekyókxoho apyeyam sa' chá'a
katyapmakha mók
ektémakxa amya'a,
katyapmakha sa' amya'a
negyennaqteyáseykha
egyempehek ma'a apchókxa,
tén han apkelenmexamap ma'a
apkeltaqmelchesso nak chá'a apkelókxa.
47 Kammok sa' ekhem yaqwánxa
allegássesagkohok ko'o m'a
kéleykmássesso nak Babilonia.
Mékoho sa' katnekxak
ekyókxoho apchókxa,
eksawheykekxoho kélhapák.
48 Kapayhekxak sa' awáxok
apteyekmo sa' Babilonia m'a
néten, tén han xapop,
tén han ma'a ekyókxoho
aqsok élánteyapma nak,
apkelxegakmo sa' apkeleñama
nexcheyha m'a apmassésseyam nak.
Ko'o sekxeyenma xa, sektáha nak Wesse'.
49 Naqso', etyamok sa' ma'a Babilonia,
eñama apkelnapma
énxet'ák ma'a kañe' Israel,
tén han ma'a ekyókxoho apkelókxa nak
keso náxop.”
Amya'a apkelxawéyak judíos apheykha nak Babilonia
50 Kéxegke kélegketamaxche axta,
kólenyahák meyke kélchaqnágwayam,
kélwokmek sa' agkok ma'a
makhawo nak,
kaxén sa' kélwáxok ma'a
Wesse' egegkok,
nágkalwánaqma aqsa m'a Jerusalén.
51 Kéltáhak kéxegke kélpeywa s'e:
“Nélmegqakkek negko'o
nenleg'a ektáhakxa sẽlwanyeykha.
Nélmegqakkók egagkók negko'o
hakte weykmók apkelántaxnama
énxet apkeleñama mók nekha m'a
kañe' ekpagkanamaxchexa agko' nak
ma'a tegma appagkanamap.”
52 Akke aptáhak Wesse' egegkok se'e:
“Xegakmek yaqwánxa sa' ko'o
allegássesagkohok ma'a
kéleykmássesso nak Babilonia,
elápentegmakha sa'
kélyensáseyák ma'a
ekyókxoho apchókxa nak.
53 Yántek sa' eykhe Babilonia m'a néten,
yaqwayam epekkenwók netnók agko' ma'a
apxagkok apyennaqte nak,
aláphaksek sa' eyke han ko'o
apkelenmexma m'a,
yaqwayam emasséssók.
Ko'o sekxeyenma xa, sektáha nak Wesse'.”
Babilonia kélmassésseyam
54 Babilonia keñamak
élpayheykha kélatña'ák,
caldeos apchókxa keñamak
ekyennaqte agko' ekyennama exma.
55 Wesse' egegkok ma'a
apmasséssekmo nak Babilonia,
apwanmeyásekxo nak
ekyennama exma.
Máxa yegmen élyaqyahayam
ekyennaqte ekpáwà awáxok sa'
etnehek ektamagkok ma'a apkelenmexma,
yetlo ekyawe agko' éxtegyawà.
56 Apkelxegakmek
yaqwayam emasséssók Babilonia;
apkelmeyk kaxwók ma'a kempakhakma
yapmeyk apagkok,
apkelekkexchessek yágke apagkok.
Hakte Wesse' egegkok,
apteme xama Dios,
apyaqmagkáseykekxohol'a chá'a
aptémakxa xama énxet
ekpayhawo nak chá'a etnéssesek.
57 Aptáhak Wesse' Apwányam,
Wesse' ekha nak apyennaqte s'e:
“Annáhakkasek sa' ko'o
anmen ma'a apkelámha
apmonye'e nak Babilonia,
tén han ma'a apkelmopwancha'a nak aqsok,
tén han ma'a apkeltaqmelchesso nak
apkelókxa yetlo apkeláneykha,
tén han sẽlpextétamo apagkok,
keñe sa' enaqtének meyke néxa,
menaqxétekhagkek sa'.
58 Ektáhak ko'o sekpeywa s'e,
sektáha nak Wesse' ekha sekyennaqte:
Kólyaqnegkesek sa' ekyókxoho m'a
kélhaxtegkesso ekyawe nak
ekpayhakxa m'a Babilonia,
kólwatnekxak sa' ma'a
átog apagkok élyawe nak.
Kaqhok sa' chá'a eltemeykha énxet'ák,
hakte táxa sa' kalwatnések chá'a m'a
apkelwasqápeykekxoho nak apkelánéyak.”
Jeremías appeywa kélso Babilonia
59 Apméssek axta apkeltamhókxa etnehek Dios appeywa aplegasso Jeremías ma'a Seraías, Nerías axta apketche, Maaseías axta aptáwen, ektéma axta cuatro apyeyam apteme apkeláneykha apchókxa m'a Sedequías, wesse' apwányam axta m'a Judá. Apyetlókek axta nahan Seraías wesse' apwányam Sedequías apmahágko m'a Babilonia, hakte axta apteme chá'a apkelánéseykekxa yaqwánxa exek ma'a wesse' apwányam. 60 Aptáxéssegkek axta Jeremías appeywa weykcha'áhak apxeyenma m'a ekyókxoho aqsok ekmaso yaqweykenxa katnehek kélhe m'a Babilonia, cham'a ekyókxoho ektémakxa axta ektáxésamaxche ekxénamaxche m'a. 61 Aptáhak axta apcháneya Seraías se'e: “Apwokmek sa' agkok Babilonia, etaqmelchesho sa' apkelyetsete ekyókxoho s'e amya'a nak. 62 Keñe sa' etnehek se'e: ‘Wesse', apxeyenmeyk axta exchep emasséssók se'e apchókxa nak, yaqwayam enxoho méko kaxwók kaxek se'e, cham'a énxet essenhan aqsok kélnaqtósso, hakte yókxexma meykexa énxet meyke néxa sa' etnéssásekxa'.’ 63 Appenchessek sa' agkok apkelyetsete s'e weykcha'áhak nak, ethet sa' xama meteymog, tén sa' eyenyók kañe' wátsam Éufrates, 64 tén sa' etnehek se'e: ‘Sa' etnehek ewéwagkok Babilonia xa, mopwanchek sa' exnekxak néten neyseksa m'a aqsok ekmaso peya nak yahak Wesse' egegkok.’”
Cháxa néxa appeywa Jeremías xa.
© © Enxet Lengua Sur Bible © Paraguayan Bible Society, 2015.