Filisteos apkelxénamap yaqwánxa katnehek
1 Keso amya'a apkeltennasa axta Wesse' egegkok Dios appeywa aplegasso Jeremías apkelxéna m'a filisteos, mektámegkaxa axta makham faraón ma'a Gaza:
2 “Ektáhak ko'o sekpeywa s'e,
sektáha nak Wesse':
Nexcheyha keñamak
ekwa'a ekho yegmen ekyawe,
ektémól'a wátsam
katyapok yegmen;
sawhékxók eyapma m'a apchókxa,
tén han ma'a ekyókxoho
aqsok ekhéyak nak kañe',
cham'a tegma apkelyawe nak,
tén han apheykha nak ma'a kañe'.
Apkelwehéseyha m'a
apyókxoho énxet'ák
apheykha nak kañe',
kelpayheyha apatña'ák
apkellegágkoho ekmáske.
3 Apkelyelqákpek nahan apyapmeyk
apkelleg'a yátnáxeg apmagkok
apkeléwayam,
tén han éxtegyawasso xóp
yátnáxeg apkelyenyawasso,
tén han élaqtáwayam
ma'a amagkok nak,
apkexakkek aqsa apketchek.
4 Hakte wokmek ekhem
yaqwánxa kólmasséssók ma'a filisteos,
tén han kólyementemekxak Tiro,
tén han Sidón ma'a apkeleymomap
nak makham ma'a
ektáha nak chá'a appasmo.”
Naqso', emasséssók sa'
Wesse' egegkok ma'a filisteos,
apkelánteyapma axta m'a
egkexe Creta,
apkelmeyáyekmo s'e.
5 Apkelmópésawók apkelyese m'a
énxet'ák Gaza,
apkelwanmeyágkek ma'a
énxet'ák Ascalón.
Kéxegke kéleymomáxche nak
kélqántawo' nanók énxet'ák kélwenaqte,
¿háxko sa' ekwánxa ekhem kammok
kélpexyekháseykha kélyempe'ék
magkenatchesso éllapwámeyak?
6 ¡Wesse' egegkok
sókwenaqte apagkok!
¿Háxko sa' ekwánxa
ekhem kalwataksek
ekyetneykha ekyógkexma?
¡Kataxnekxa makham axagkok,
kawanmeyekxa', wánxa katne!
7 ¿Háxko eyke katnehek
kalwataksek?
Wesse' egegkok apkeltémo katnehek,
apkeltémo kaktamagkok ma'a Ascalón,
tén han ma'a apyókxoho énxet'ák
apheykha nak neyáwa' wátsam ekwányam.
© © Enxet Lengua Sur Bible © Paraguayan Bible Society, 2015.