Wesse' egegkok apmésso appeywa Baruc
1 Aptáhak axta Jeremías apcháneya Baruc, Nerías axta apketche neyseksa aptáxésso axta chá'a aptáhakxa apkelyetsetchesso m'a Dios appeywa aplegasso Jeremías, ekweykmo axta cuatro apyeyam apteme wesse' apwányam ma'a Joaquim wesse' apwányam axta m'a Judá, Josías axta apketche: 2-3 “Baruc, etnehek chá'a exchep se'e: ‘¡Eyóse nak la'a ko'o! ¡Eklegeykegkoho ewáxok aqsa ko'o egkéssók ma'a Wesse' egegkok tén han seklegeykegkoho ekmáske! Éleklágweykmek sélekxagweykha, móteyágweykmok xama enxoho séllókasso sekyampe.’ Aptáhak xép apxéna Wesse' egegkok, 4 eyáphássek nahan apkeltamho atnehek wának xép se'e: ‘Alyaqnegkesagkok chá'a ko'o m'a ektáha axta sélane, alpátekkeshok nahan chá'a m'a ektáha axta séneykekxa. Sa' atnéssesek nahan ekyókxoho xapop. 5 ¿Apmenyéya exchep hélmaxnak yaqwayam megkaxók ektáhakxa apha m'a pók énxet'ák nak? Ná hélmaxna aqsa, hakte wáphaksek sa' ko'o aqsok ekmaso nepyeseksa apyókxoho énxet'ák. Wának sa' eyke ko'o exchep megyetsepe', cham'a apmahágkaxa enxoho chá'a. Ko'o sekxeyenma xa, sektáha nak Wesse'.’”
© © Enxet Lengua Sur Bible © Paraguayan Bible Society, 2015.