Sedequías apkelmaxneyeykha aqsok Jeremías
1 Apteméssessek axta Nabucodonosor, wesse' apwányam nak Babilonia, wesse' apwányam Judá m'a Sedequías, Josías axta apketche, apyaqmagkasso m'a Jeconías, Joaquim axta apketche. 2 Axta eyke nahan yaháxenmok Sedequías ma'a Wesse' egegkok appeywa yetlo m'a apkeláneykha, ekweykekxoho m'a énxet'ák apkeltennasso axta eñama apchásenneykekxa m'a aplegasso nak appeywa Jeremías.
3 Apcháphássek axta wesse' apwányam Sedequías ma'a Jucal, Selemías axta apketche, tén han ma'a apkelmaxnéssesso Dios énxet'ák apagkok Sofonías, Maaseías axta apketche, ey'ókxak ma'a Dios appeywa aplegasso Jeremías, tén han etnehek yának se'e: “Hẽlmaxnésses negko'o Dios Wesse' egegkok.” 4 Axta eyke emomakpok makham ma'a Jeremías, apweynchámeykha axta aqsa nepyeseksa énxet'ák. 5 Apkelántekkek axta apkelxegakmo faraón sẽlpextétamo apagkok apkeleñama m'a Egipto. Xama axta apkelleg'a amya'a m'a caldeos apketámeyak axta Jerusalén, apkelántekkek axta apkeltaqháwo.
6 Tén axta Wesse' egegkok appaqhetchesa m'a aplegasso appeywa Jeremías apkeltamho etnehek elának ma'a 7 kélápháseykha axta: “Kóltennés sa' wesse' apwányam Judá, apkeláphasso exchek hélyo'ótak ko'o, apkeltaqháwo makham Egipto m'a faraón sẽlpextétamo apagkok, apkelxegakmo excheykhe yaqwayam epasmok kéxegke. 8 Elchexyók sa' makham caldeos yaqwayam ektámenták tegma apwányam Jerusalén, emok sa', keñe sa' ewatnekxoho'. 9 Ektáhak ko'o séltennasa kéxegke s'e, sektáha nak Wesse': Nágkólleyx aqsa eltaqhohok ma'a caldeos, hakte megkatnehek sa' xa ektáha nak. 10 Mexók sa' eykhe kéxegke m'a sẽlpextétamo caldeos, apketámeyam nak, apqántawók sa' eykhe eleymakpok énxet ma'a apkelpakxeneykegkaxa nak, elchempekxak sa' eyke néten xa énxet'ák nak, keñe sa' ewatnekxak ma'a tegma apwányam.”
Jeremías apmomap
11 Xama axta apkelántepa sẽlpextétamo caldeos ma'a Jerusalén, hakte apkelleg'ak axta amya'a apkelxegakmo faraón sẽlpextétamo apagkok, 12 aptekkek axta Jeremías ma'a tegma apwányam, peya emyekxak ma'a Benjamín nak xapop apagkok, yaqwayam enxoho exkak xapop apxaweykekxa, ekmelassexchexa axta m'a kañe' apchókxa nak apnámakkok. 13 Xama axta apwákxo m'a éltamhomaxchexa nak Átog Benjamín, apmágkek axta Jeremías xama énxet apwesey axta Irías, Selemías axta apketche, Hananías axta aptáwen, apteme axta apkemha apmonye' aptaqmelchesso wesse' apxagkok, axta aptáhak apcháneya s'e:
—¡Caldeos xép peyk epáxaqwók! ¡Peyk hegkexa'!
14 Axta aptáhak apchátegmowágkokxo Jeremías se'e:
—¡Ma' makxáyhe', mapáxaqwomek ko'o m'a caldeos!
Axta eyke yahaxnawok Irías, apmeyk axta aqsa, apyentamákxeyk axta m'a aphágkaxa axta wesse' apkeláneykha. 15 Apkellókók apagko' axta apkelano m'a Jeremías, apkeltamhók axta kólyekpexchetmakha, tén han kólaqxegkesek ma'a kañe' Jonatán apxagkok kélteméssessamakxa axta kélxátamakxa apkelmomap, cham'a Jonatán apnaqtáxéseyak axta chá'a weykcha'áhak. 16 Kélhesseykmek axta Jeremías ma'a kañe' xóp apwáxok nak tegma kañe' negmomaxchexa, apheykenxa axta ekwenaqte agko' ma'a.
17 Apkeltamhók axta kólyentemekxak Jeremías wesse' apwányam Sedequías ma'a aphakxa nak, xama axta kélyentamákxo Jeremías ma'a aphakxa nak wesse' apwányam, axta aptáhak apyexákpoho apkelmaxneyáncha'a s'e:
—¿Yetneya amya'a eñama Wesse' egegkok?
Aptáhak axta Jeremías apchátegmowágko s'e:
—Éhay, temék se'e: emakpok sa' xép wesse', wesse' apwányam Babilonia sa' emok.
18 Axta aptáhak Jeremías apkelmaxneyáncha'a wesse' apwányam Sedequías se'e:
—¿Yaqsa aqsok ekmaso ko'o séláneya nápaqtók xép wesse', essenhan nápaqta'awók ma'a apkeláneykha nak, essenhan ma'a énxet'ák, seyaqxegkessama nak kañe'? 19 ¿Háxko apkelmahágkaxa m'a Dios appeywa apkellegasso apkelxeyenma axta chá'a mektámegmék kéxegke m'a wesse' apwányam Babilonia, tén han se'e negókxa nak? 20 Yeyxho hana s'e wesse', elyahakxoho sa' nahan se'e yaqwánxa nak ko'o atnehek wának xép: Nágyoho aqsa ko'o hélyentemekxak makham ma'a Jonatán apxagkok, cham'a apnaqtáxéseyak nak chá'a weykcha'áhak, hakte watsapwók ko'o katnehek ma'a.
21 Keñe axta wesse' apwányam Sedequías apkeltamho aqsa kólhések Jeremías apmomap ma'a kañe' kélhaxtegkesso nak wesse' apwányam apxagkok, tén han kólsakxések chá'a kelpasmaga ekyókxoho ekhem, apkeñama nak apkelánamap ma'a ámay ekwesey nak Apkelánéyak Kelpasmaga. Axta kélteméssessók xa ektáha nak, ekhakxa axta makham nento m'a tegma apwányam. Aphegkek axta Jeremías ma'a kañe' kélhaxtegkesso nak wesse' apwányam apxagkok.
© © Enxet Lengua Sur Bible © Paraguayan Bible Society, 2015.