Jeremías tén han Hananías
1 Appaqhetchessek axta Hananías ma'a Jeremías, cham'a tegma appagkanamap nak, cham'a Hananías apxeyenma axta chá'a apteme Dios appeywa aplegasso, Azur axta apketche, apteme axta énxet Gabaón, nápaqta'awók ma'a apkelmaxnéssesso Dios énxet'ák apagkok, tén han ma'a apyókxoho énxet'ák, cham'a ekweykmo axta cinco pelten cuatro apyeyam apteme wesse' apwányam Sedequías ma'a Judá. Aptáhak axta apcháneya s'e:
2 —Aptáhak Wesse' ekha nak apyennaqte, Dios apagkok nak ma'a Israel: ‘Amasséssesek sa' ko'o ektémakxa nak ekha apyennaqte m'a wesse' apwányam Babilonia, 3 wának sa' makham kólsanták ekyókxoho aqsok kélmeykegkexa nak tegma appagkanamap se'e ekheykegkaxa axta, ekwokmo sa' apqánet apyeyam, apkelseykekxa axta Babilonia m'a wesse' apwányam Nabucodonosor. 4 Wának sa' han éxyamok Jeconías se'e yókxexma nak, wesse' apwányam nak Judá, Joaquim axta apketche, tén han ma'a apyókxoho énxet'ák kélántekkesso axta Judá kélnaqleykekxa m'a Babilonia. Naqso', amasséssesek sa' ko'o m'a ektémakxa nak ekha apyennaqte m'a wesse' apwányam Babilonia. Ko'o sekxeyenma xa, sektáha nak Wesse'.’
5 Apchátegmowágkek axta Jeremías ma'a Hananías apxeyenma axta chá'a apteme Dios appeywa aplegasso, nápaqta'awók ma'a apkelmaxnéssesso nak Dios énxet'ák apagkok, tén han ma'a apyókxoho énxet'ák apheykha axta m'a tegma appagkanamap nak. Axta aptáhak se'e:
6 —¡Elánho annal'a Wesse' egegkok xa aqsok nak! ¡Yánho annal'a katnehek Wesse' egegkok xa aptáhakxa nak appeywa, keñe kólsanták makham ma'a aqsok kélmeykegkaxa nak tegma appagkanamap, keñe elchexyók nahan apyókxoho m'a kélnaqleykekxa axta m'a Babilonia! 7 Yeyxho sa' se'e peya nak ko'o altennaksek xép, tén han apyókxoho énxet'ák: 8 Apkellegassegkek axta chá'a kawak kempakhakma, nenlegeykegkoho ekmaso, tén han negmasse ekxámokma agko' apkelókxa, tén han élyawakxa nak apkelókxa m'a Dios appeywa apkellegasso nano' axta, metyeykemxa axta makham xép tén han ko'o. 9 Aplegássek agkok xama Dios appeywa aplegasso m'a ektaqmeleykekxa nak negha, temék agkok ma'a aptáhakxa enxoho appeywa, eyke aptáha naqsók Wesse' egegkok apcháphasso m'a.
10 Keñe axta Hananías aplekkesa Jeremías ma'a yámet ekyentaxno apkexanma axta nápenyétek, apkelekkexákxeyk axta apteméssesa nekha'a étkók, 11 axta aptáhak nahan appaqmeta nápaqta'awók apyókxoho énxet'ák se'e:
—Aptáhak Wesse' egegkok se'e: ‘Cháxa sektáhakxa nak, alekkesek sa' ko'o aqsok ekyentaxno apyespa'ák ma'a apyókxoho énxet'ák, apkelchexenchesso nak ma'a wesse' apwányam Nabucodonosor apkeñama nak Babilonia ekwokmo sa' apqánet apyeyam, alekkexchesek sa'.
Tén axta apxega m'a Jeremías. 12 Yáma wenaqtémók axta nahan natámen aplekkessama axta Hananías aqsok ekyentaxno nápenyétek ma'a Jeremías, tén han apkelekkexchessama axta, appaqhetchessek axta Wesse' egegkok Dios appeywa aplegasso Jeremías. Axta aptáhak apcháneya s'e: 13 “Ey'ókxa sa' Hananías, eltennaksek sa' sektáha ko'o sekpeywa s'e, sektáha nak Wesse': Apkelekkexákxeyk axta exchep yámet, élánéssek eyke ko'o exchep xama sawo ekyentaxno. 14 Hakte ektáhak ko'o sekpeywa s'e, sektáha nak Wesse' ekha sekyennaqte, Dios apagkok nak Israel: Eknegkenchásegkek ko'o nápenyétek sawo ekyentaxno s'e apyókxoho énxet'ák nak, yaqwayam enxoho etnahagkok apkelásenneykha naqsa m'a Nabucodonosor, wesse' apwányam nak Babilonia. Wokmók han sekmésso yaqwayam elanha m'a aqsok nawha'ák nak.”
15 Tén axta Jeremías aptáha apcháneya Hananías se'e:
—¡Hananías, yeyxho sa' se'e! Megyápháseykha exchep Wesse' egegkok, amya'a megkamámnaqsoho chá'a exchep apkeltémók melya'ássók xa énxet'ák nak. 16 Cháxa keñamak aptáha nak appeywa Wesse' egegkok se'e: ‘Wának sa' xép kamassegwók apweynchámeykha keso náxop. Yetsapok sa' xép se'e apyeyam nak, hakte appeywa chá'a exchep keñamak sénmexeykekxo ko'o m'a énxet'ák nak.’
17 Apketsekkek axta Hananías apxeyenma axta chá'a apteme Dios appeywa aplegasso ekweykmo siete pelten xa apyeyam nak.
© © Enxet Lengua Sur Bible © Paraguayan Bible Society, 2015.