Énxet apkelane yátegwáxwa kélyetcháseykekxoho tén han yelpa'
1 Epaqhetchessek axta ko'o Wesse' egegkok, aptáhak axta seyáneya s'e: 2 “Emhók sa' apxagkok énxet apkelane nak yátegwáxwa, sa' altennássók xép sekpeywa m'a.” 3 Ekmahágkek axta ko'o m'a apxagkok nak apkelane yátegwáxwa, ko'o Jeremías, ekwetágwokmek axta apyeykesa yelpa' m'a apkeláneykxa nak chá'a yátegwáxwa. 4 Xama axta chá'a eyesagko aptekkesso apkelane, apkeláneykxók axta chá'a, apmáncha'a chá'a xa yelpa' nak, ekwokmoho aptekkesa m'a ekwánxa apmopmenyého etekkesek.
5 Keñe axta Wesse' egegkok aptáha seyáneya s'e: 6 “Israelitas, ¿mowancheya ko'óxa atnéssesek kéxegke xa ektáha nak, ekhawo apteméssesakxa nak yelpa' xa apkelane nak yátegwáxwa? Máxa yelpa' ekteméssessók sélmeykencha'a emék kéxegke, ekhawo aptémakxa nak apkelmeykha apmék yelpa' xa énxet apkelane nak yátegwáxwa. Ko'o sekxeyenma xa, sektáha nak Wesse'. 7 Ekmanyehe agko' ko'o ewanchek axének alántekkesek énxet'ák, tén han alnápok, tén han amasséssók xama apchókxa, essenhan aptémakxa nak chá'a wesse' apwányam xama énxet. 8 Apkelwátesagkek agkok chá'a apkeláneyak aqsok ekmaso xa énxet'ák nak, keñe magwáphássesek chá'a m'a séllegassáseykegkoho séleyxchessama nak ko'o. 9 Ewanchek han chá'a ko'o axének anaqxétekhasegkokxa', tén han axátekhásekxak chá'a xama apchókxa, tén han aptémakxa nak chá'a wesse' apwányam xama énxet. 10 Apkelánegkek agkok chá'a aqsok ekmaso xa énxet'ák nak, melyahákxoho enxoho chá'a sélpaqhetchesso, magwaphássesek chá'a m'a aqsok éltaqmela ekxeyenma nak chá'a ewáxok wáphássesek.
11 “Eltennés sa' énxet'ák Judá, tén han ma'a apheykha nak Jerusalén, sektáha ko'o sélxéna, sektáha nak Wesse': ‘Éláneykxeyk ko'o sektáhakxa yaqwánxa atnéssesek kéxegke; xénchek ewáxok allegássesagkoho'. Kólwátésák kélláneyak aqsok ekmaso, kóltaqmelchásekxa kéltémakxa, tén han aqsok kéllánéyak nak chá'a.’ 12 Sa' etnehek elátegmowágkok xép se'e: ¡Kaqhok eyke exchep henlenxanmok! Egmenyeyk negko'o anlanagkok ma'a ekleklamókxa nak chá'a egwáxok, tén han ólyennaqtések egwáxok ólyetlakxak ma'a ekxeyenmakxa nak chá'a egwáxok.”
13 Cháxa keñamak aptáha nak
Wesse' egegkok se'e:
“Kólmaxneyha hana m'a
pók aptémakxa nak énxet'ák,
aplegayak kexa
xama xa ektéma nak aqsok.
¡Asagkók agko' apkeláneyak
aqsok ma'a énxet'ák Israel!
14 ¿Emassegwomhoya chá'a
yeyam appok ma'a
naw'ék nak egkexe
meteymog Líbano?
¿Keymawhoya chá'a yegmen
ektaqmalma ekteyapma nak ma'a
néten nak egkexe?
15 Kelwagqámeykegkek eyke ko'o
m'a énxet'ák ahagkok,
apkelméssegkek chá'a
aqsok ánek ekmátsa nak
ekpaqneyam éten agkok ma'a
aqsok kéláyókxa élmowancha'a amya'a nak.
Apkelyetnakhágweykmek ma'a
ámay apagkok nak,
cham'a nanók ámay nak,
apkelyetleykekxeyk ma'a
ámay melya'áseykegkaxa nak.
16 Cháxa apkeltémakxa
aptemessáseykekxo
yókxexma meykexa énxet
ma'a apchókxa nak,
tén han élyamasso
apkelwáxok ma'a énxet'ák.
Elyeykesha sa' chá'a apqatkok
elyegweyk elwetak ma'a ektáhakxa enxoho
chá'a apkelyeykhágwayam ma'a.
17 Máxa sa' ko'o
atnehek éxchahayam
eñama nak ekteyapmakxa ekhem
waxpánchesek ma'a énxet'ák Israel;
wának sa' emenxenek ma'a
apkelenmexma nak.
Wahekxak sa' éyapok,
malanók sa',
cham'a ekwa'a sa' ekhem
séllegassáseykegkoho.”
Kélláneykekxa amya'a yaqwánxa kólteméssesek Dios appeywa aplegasso
18 Aptáhak axta apkelpaqmeta énxet'ák se'e: “Anlánekxak sa' nentáhakxa yaqwayam agmasséssók Jeremías. Megkatnehek eyke chá'a meyke apkelmaxnéssesso Dios énxet'ák apagkok yaqwayam hẽlxekmóssek, apxámok nahan ma'a apkelya'áseyak nak aqsok, yaqwayam hempékessesagkok, tén han Dios appeywa apkellegasso yaqwayam chá'a hẽltennaksek Dios appeywa. Ansexnenak sa', yaqwayam sa' emátog. Mageyxók sa' chá'a m'a aptáhakxa enxoho chá'a sẽláneya.”
Jeremías apkelmaxnagko
19 ¡Wesse', heyeyxho hana!
¡Yeyxho aptáhakxa nak
apkelpeywa m'a sélenmexma!
20 ¿Kólyaqmagkásekxohoya
chá'a aqsok ekmaso m'a
aqsok ektaqmela nak?
¡Apmetmeyk máxek
yaqwayam heyátawanyek!
Kaxénwakxoho apwáxok
sekpaqhetchessa'akto axta exchep,
séltamho epasmok
xa énxet'ák nak,
séltamho axta exchep elwataksek
apkeltaqnawéyak ma'a.
21 ¡Yána kaxwók eletsapok
apketchek meyk élnapma,
essenhan sókwenaqte kélyetxaqxo;
tampe sa' katnahagkok
ma'a apnaqteyegka'a nak,
tén han meyke étchek!
¡Yána kalnápok negmasse m'a
apkelennay'a nak énxet'ák apagkok,
keñe sa' wokma'ák eletsapok
kempakhakma!
22 Elpelakkasses
yahak ma'a énxet'ák
apkelmenyexmo nak;
¡kañexkohok sa' élpayheykha
apatña'ák apkelaye!
Hakte emétegkessegkek máxek
apmáheyo hemok,
epekkenchessegkek kelhanma
sekpéwomókxa nak chá'a.
23 Wesse',
apya'ásegkók eyke
exchep ekyókxoho
aqsok élxeyenma nak
apkelwáxok elanagkok,
apmáheyo ko'o heyaqhek.
¡Eyaqmagkásekxa m'a
aqsok ekmaso apkeláneyak nak,
nágkalwánaqma m'a
melya'assáxma nak!
¡Elyaqnegkesák ma'a
apmonye' nak xép,
ellegássesagkoho yetlo aplo!
© © Enxet Lengua Sur Bible © Paraguayan Bible Society, 2015.