Israelitas apyaqmagkáseykekxa mók kélteméssessamakxa'
1 Tén axta apyókxoho israelitas apchaqnákxo m'a Mispá, nápaqtók Wesse' egegkok, eyeynmo m'a Dan ekweykekxoho m'a Beerseba, keñe han ma'a Galaad, xama appasmeykekxa axta aptamhákxa'. 2 Apkelwokmek axta apyókxoho apkelámha apmonye'e nak Israel, nepyeseksa nak chá'a énxet'ák apagkok, apchaqnákxeyk axta han cuatrocientos mil Dios énxet'ák apagkok, cham'a sẽlpextétamo apkelxegámo nak náxap'ák. 3 Apkelleg'ak axta amya'a Benjamín énxet'ák apagkok apchaqnákxo pók israelitas ma'a Mispá. Apkelmaxneyáha axta israelitas ma'a levita, ektémakxa axta aqsok ekmaso agko' apwete. 4 Aptáhak axta m'a levita, atáwa' axta m'a kelán'a étsapma nak:
—Ekwa'akteyk axta ko'o yetlo kelán'a sekmeykha naqsa m'a tegma apwányam Guibeá, apheykegkaxa nak Benjamín énxet'ák apagkok, yaqwayam enxoho atyenek axta'a m'a. 5 Keñe axta xa axta'a nak, apwakhékxo tegma m'a énxet'ák apheykha axta m'a tegma apwányam nak apmako heyaqhek ko'o, aptawásegkok apagko' axta han apteméssessekmoho exma m'a kelán'a sekmeykha naqsa, keñe étsapa. 6 Tén axta ko'o sekmákxo m'a ápak keñe sélyaqtennágko, séláphasa chá'a nekha'a étkók ekyókxoho yókxexma negheykegkaxa nak, yaqwayam kólya'asagkohok ekyókxoho Israel se'e aqsok ekmaso agko' nak élánamáxche'. 7 Kéxegke kaxwo' payhawók kólxének eyeyméxchexa kalanaxche', hakte kéxegke israelitas.
8 Apyókxoho axta apkelchampákxak néten aptáha apkelpaqmeta s'e:
—Méko sa' enxama emyekxak ma'a appakxanmakxa nak, tén han apxagkok. 9 Tásek antawaksek sekxók xama aqsok, yaqwayam agya'asagkoho', yaqsa kapayhohok kaktamagkok ma'a Guibeá. 10 Xama énxet sa' chá'a kólyetnakhaksek nepyeseksa m'a diez énxet'ák, ektáhakxa nak chá'a aphawóxama apagko', yaqwayam etegyesha chá'a aptéyak ma'a sẽlpextétamo; keñe sa' ma'a apyókxoho nak elmahagkok Guibeá, etnéssesek ma'a ekpayhawo nak etnéssesek aplegassáseykegkoho, eñama apkeláneyak aqsok ekmaso agko' ma'a kañe' Israel.
11 Apyókxoho axta apchaqnákxak israelitas, xama appasmeykekxa axta aptáhak, yaqwayam ektamagkok ma'a tegma apwányam nak. 12 Apkeláphássek axta chá'a apkelseykha amya'a m'a ekyókxoho yókxexma apheykegkaxa nak Benjamín énxet'ák apagkok, yaqwayam enxoho etnehek chá'a yának se'e: “¿Yaqsa aqsok ekmaso apkelánegko nak kélnápakha kéxegke? 13 Hẽlmés negko'o m'a énxet'ák élmasagcha'a apkeltémakxa nak Guibeá yaqwayam ólnápok, tén han agáxñásekxak apkeltémakxa ekmaso m'a Israel.”
Axta eyke elyahákxak apnámakkok israelitas ma'a Benjamín énxet'ák apagkok, 14 apchaqnákxeyk axta aqsa Benjamín énxet'ák apagkok ma'a Guibeá, apheykha nak apyókxoho tegma apkelyawe, yaqwayam elnapakpok ma'a pók israelitas nak. 15 Veintiséis mil axta apyókxoho sẽlpextétamo appencháseyak axta aptamhágkaxa yaqwayam yempakha', apkeleñama axta m'a tegma apkelyawe apagkok nak Benjamín, keñe han setecientos énxet'ák ektáha axta kélyéseykha apkeleñama m'a Guibeá. 16 Yetneyk axta setecientos nepsagqalwa'a nepyeseksa xa apyókxoho énxet'ák nak, apmoplensa'a axta mélwakto, megyetsagkasso axta eyenhek meteymog xama kélwa'. 17 Apchánchesákxeyk axta han cuatrocientos mil israelitas kempakhakma yapmeyk éltámeyeykegko nak apkelempakhe.
Énxet'ák Israel apkelnápomap Benjamín énxet'ák apagkok
18 Apkelmahágkek axta israelitas ma'a Betel, apkelpaqhetcháseykpók axta Dios ma'a yaqwayam enxoho elya'asagkoho', yaqsa énxet'ák ektamagkok apmonye' m'a Benjamín énxet'ák apagkok. Apchátegmowágkek axta Wesse' egegkok apxéna Judá énxet'ák apagkok ektamagkok apmonye'. 19 Axto'ók agko' axta apnaqxétekhágko m'a israelitas, apkelpakxenwokmo m'a Guibeá. 20 Apkelxegkek axta apyo'ókmo Benjamín énxet'ák apagkok, apchaqnágwokmek axta m'a ekpayho nak Guibeá yaqwayam yempakha'. 21 Apkelántekkek axta eyke tegma apwányam apagkok ma'a Benjamín énxet'ák apagkok apkelanyexakmo, cháxa ekhem nak aptekyawakxa axta veintidós mil israelitas. 22-24 Axta keñamak apkelmeyákxo israelitas ma'a Betel, peya ellekxagwaha nápaqtók Wesse' egegkok ekwokmoho ekyáqtésa, keñe axta apkelpaqhetchásekpoho apkelmaxneya, apwanchek kexa ektamagkokxak makham ma'a Benjamín énxet'ák apagkok, cham'a appeywomo xamo' nak. Apkelyennákxók axta makham, hakte apkeltamhók axta ektámegkokxak ma'a Wesse' egegkok, keñe axta mók ekhem, peya yempakhekxak makham ma'a Benjamín énxet'ák apagkok, cham'a apkelnápékpexa axta han ma'a sekxók axta. 25 Apkelanyexánteyk axta eyke makham apketámento Benjamín énxet'ák apagkok apkeleñama m'a Guibeá, apkelnápekxeyk axta makham dieciocho mil sẽlpextétamo israelitas. 26 Keñe axta apyókxoho sẽlpextétamo Israel tén han apyókxoho énxet'ák, apkelmeyákxo m'a Betel, peya ellekxagwaha nápaqtók Wesse' egegkok. Axta etókagkok aptéyak xa xama ekhem nak, apkelméssek axta Wesse' egegkok aqsok apkelwatno, tén han aqsok apkelnapma segwetassamo nak nélásekhamaxchekxoho.
27-28 Yetnegkek axta yántéseksek ekhémo mók nélpaqhetchásamáxkoho Dios ma'a Betel ektéma axta xa, cham'a aptémakxa axta apkelmaxnéssesso Dios énxet'ák apagkok ma'a Finees, Eleazar axta apketche, ektáha axta aptaqmelchesso, Aarón axta aptáwen. Apkelpaqhetchásekpók axta Wesse' egegkok ma'a israelitas: “¿Egwancheya agketamagkokxak makham negko'o nempeywomo xamo' Benjamín nak énxet'ák apagkok, ólwátésagkok enxeykel'a aqsa?” Aptáhak axta apkeláneya Wesse' egegkok se'e: “Kólchetamagkokxa sa' makham, saka sa' agkések yaqwayam kólmallánek.”
29 Tén axta apkelyexánegwokmo nápakha sẽlpextétamo israelitas ma'a nepyáwa nak tegma apyawe Guibeá, 30 keñe axta m'a nápakha nak apkelxega, cham'a ektáhakxa axta ántánxo ekhem, peya elenmexek Benjamín énxet'ák apagkok, apchaqnágwokmek axta m'a ekpayho nak Guibeá yaqwayam yempakha', ekhawo m'a aptamhágkaxa axta m'a sekxók axta. 31 Apkelántépeykxeyk axta makham tegma apwányam apagkok ma'a Benjamín énxet'ák, makhawók axta apyenyáwak yaqwayam elnapakpok ma'a israelitas. Apkelnapchek axta han treinta israelitas ma'a ámay ekmahéyak nak Betel tén han Guibeá, keñe han ma'a yókxexma nak, 32 apkeneykek axta yenyahágkok apmonye'e m'a israelitas, ekhawo m'a ektáhakxa axta sekxók axta apkelwáteságko. Makhawók tegma apwányam axta eyke apkelmahágkok ma'a israelitas, yaqwayam enxoho emenxenek ma'a apkelenmexma, ekweykmoho m'a ámay nak. 33 Yetlókok axta han apkelánteyapma israelitas ma'a aphágkaxa axta, apchaqnágwokmek axta m'a Baal-tamar apkelánekxo aptamhágkaxa yaqwayam yempakha'; keñe axta m'a apkelyexánegwayam axta m'a ekpayhegweykenxa nak pa'at, nepyáwa nak ma'a Guibeá, apkelántepa m'a apkelyexanmakxa axta, 34 apketámegkek axta m'a tegma apwányam nak. Diez mil israelitas kempakhakma yapmeyk apkelyennaqte axta m'a apketámegko axta Guibeá. Kayhók agko' axta han apkelnápomap, axta han elya'ásegkok peya esawhakpok ma'a Benjamín énxet'ák apagkok. 35 Wesse' egegkok axta apkelmallahanchásak israelitas nepyeseksa m'a Benjamín énxet'ák apagkok, veinticinco mil cien sẽlpextétamo axta apkelnápak israelitas xa ekhem nak, cham'a Benjamín nak énxet'ák apagkok. 36 Apkelyekpelchágwokmek axta han apsawheykpo m'a Benjamín énxet'ák apagkok.
Apkenyahágkek axta apmonye'e Benjamín énxet'ák apagkok ma'a israelitas apkelmahágko makhawo', hakte apkelásenneykxeyk axta m'a énxet'ák apkelyexánegwayam axta yaqwayam ektamagkok ma'a Guibeá. 37 Appelakkassek axta apketámeyak Guibeá xa énxet'ák nak, apkelnapchek axta han apyókxoho apheykha axta tegma apwányam, apkelyetxégko chá'a sókwenaqte. 38 Nanók axta han appenchásegko aphéssamo mók apkelpaqmeyesma pók israelitas ma'a apkelyexánegwayam axta yaqwayam ektamagkok ma'a tegma apwányam, apkeltennasa epánchessesek éten apma enxoho m'a tegma apwányam. 39 Apkelxénchek axta han eltaqhegwók israelitas aptamhéyak axta hó agmenxenaxchek apkelwet'a enxoho éten ekpánma, keñe elnapakpok ma'a Benjamín énxet'ák apagkok.
Apkelnapchek axta han Benjamín énxet'ák apagkok treinta israelitas, axta keñamak ekmassa éltamheykha apkelwáxok, apcháneya esawhák makham apkelnapma, ektáha axta m'a émha amonye' kempakhakma axta; 40 chaqhawók axta han ektepa ekpánma éten ma'a tegma apwányam nak, xama axta apkelpeynchákpo apkelenmexákxoho neptámen ma'a Benjamín énxet'ák apagkok, apkelwet'ak axta táxa eyáléwe tén han éten ekmeyákxo néten ma'a tegma apwányam. 41 Keñe axta israelitas apkeltaqhegwokmo apkelnápekpo, apkelakawók apagko' axta Benjamín énxet'ák apagkok apyekpelcha peya esawhakpok. 42 Apkenyahágkek axta apmonye'e israelitas apkelpéwomo m'a ámay ekmahéyak nak meykexa énxet, mopwanchek axta apmako elxeganmok, hakte apkelántekkek axta han apmonye'e m'a apkelánteyapma axta m'a tegma apwányam nak, keñe apkelnapa. 43 Apwakheykxeyk axta israelitas ma'a Benjamín énxet'ák apagkok, apmenxenchek axta, apkelnáhapweykxeyk axta m'a Menuhá, ekweykekxoho m'a ekteyapmakxa ekhem, teyp nak Guibeá.
44 Dieciocho mil sẽlpextétamo axta aptekyawak ma'a Benjamín nak énxet'ák apagkok. 45 Keñe axta m'a nápakha apkeltaqháwo, apkenyahágkek axta apkelmeyákxo m'a ekpayho nak yókxexma meykexa énxet, apkelpéwo m'a ekpayho nak émhakxa meteymog Rimón, cinco mil axta eyke han aptekyawak ma'a ámay nak. Axta elwáteságkok apmenxenma m'a israelitas, apnaqtawásegkók axta, apkelnapchek axta dos mil énxet. 46 Veinticinco mil sẽlpextétamo apkelyennaqte axta aptekyawak xa ekhem nak, cham'a Benjamín nak énxet'ák apagkok. 47 Seiscientos Benjamín énxet'ák apagkok axta eyke apkelxeganakmok, apkenyahágkek axta apkelpéwo m'a yókxexma meykexa nak énxet, tén axta apkelheykmo cuatro pelten ma'a émhakxa nak meteymog Rimón. 48 Apketámegkokxeyk axta makham israelitas ma'a nápakha nak Benjamín énxet'ák apagkok, sawo axta chá'a apkelyetxeyk apkelnapa énxet'ák ma'a tegma apwányam nak, apkelnapchek axta aqsok kélnaqtósso, keñe han ekyókxoho aqsok apwet'akxa enxoho chá'a, apkelwatneyk axta tegma apkelyawe nak.
© © Enxet Lengua Sur Bible © Paraguayan Bible Society, 2015.