Jefté tén han Efraín énxet'ák apagkok
1 Apchaqnákxeyk axta Efraín énxet'ák apagkok, keñe apkeltámeyákxo m'a Jordán apkelmahágko yókxexma nak Safón, tén axta ektáha amya'a apcháneyákpo Jefté s'e:
—¿Yaqsa axta ektáha mehẽltennássekxo apketámegko amonitas yaqwayam enxoho agyetlók? ¡Agwatneyásekxak sa' kaxwo' xép apxagkok, yetlo apha exchep ma'a kañe'!
2 Apchátegmowágkek axta Jefté:
—Nélenmexáxchekxeyk axta negko'o m'a amonitas, ko'o tén han ma'a énxet'ák ahagkok, éláneyeykha axta eykhe ko'o kéxegke, keñe mehelpásegweykto. 3 Xama axta sekwet'a kéxegke mehelya'aweykto yaqwayam hélpásegwata', keñe magweygwákxo sekmahágko eyesagkexa', étámegkek axta m'a amonitas, emallahanchessek axta han Wesse' egegkok. ¿Yaqsa ektáha kélxegakmo nak yaqwayam hélnapaxchek ko'o?
4 Tén axta Jefté apchánchesákxo apyókxoho énxet'ák Galaad, apkelnápekpek axta m'a Efraín énxet'ák apagkok, apmenxenchek axta han. Elxénmakha axta chá'a Efraín énxet'ák apagkok apheykha nak Galaad, apkelánteyapma m'a Efraín, cham'a apheykencha'a axta m'a teyp nak Efraín halep nak Manasés. 5 Apkelyementamomchek axta énxet'ák Galaad, Efraín ma'a apkelmalláneykekxexa axta chá'a Jordán, apwákxeyk axta agkok chá'a xama Efraín énxet'ák apagkok yenyehek ma'a, keñe elmaxneyha chá'a yaqwayam eyeykha', kólmaxneyha axta chá'a, axta katnehek chá'a amya'a yánékpok se'e: háweya exchep Efraín énxet'ák apagkok, keñe aptáha enxoho chá'a háwe', 6 kólának axta chá'a etnehek epaqmétek se'e: “Shibolet”. Aptemék axta agkok chá'a “Sibolet”, hakte mopwanchek etnehek exének xa ektáha nak, emakpok axta chá'a, keñe emátog, cham'a nekha nak chá'a apkelyeykheykekxexa énxet'ák ma'a Jordán. Cháxa ekhem nak aptekyawakxa axta cuarenta y dos mil Efraín énxet'ák apagkok.
7 Seis apyeyam axta apteme apkemha apmonye' apagkok israelitas ma'a Jefté. Xama axta apketsapma, kélátawanyegkek axta m'a Galaad, apchókxa axta.
Pók apqántánxo apkelámha apmonye'e Israel
8 Ibsán axta aptemék apkemha apmonye' apagkok israelitas neptámen ma'a Jefté, apkeñama axta m'a Belén, 9 treinta axta apyókxoho apketchek apkelennay'a, treinta han ma'a kelwán'ák, ekyókxoho axta apkelyamhakkáseykegkok apkelméssama m'a énxet'ák apkeleñama nak mók nekha. Siete apyeyam axta apteme apkemha apmonye' apagkok Israel ma'a Ibsán, 10 keñe axta apketsapma, kélátawanyegkek axta m'a Belén.
11 Elón axta han aptemék apkemha apmonye' apagkok israelitas neptámen ma'a, apkeñama nak nepyeseksa Zabulón énxet'ák apagkok, ekweykmoho diez apyeyam, 12 keñe axta apketsapma, kélátawanyegkek axta m'a Aialón, xapop apagkok axta m'a énxet'ák apagkok.
13 Keñe axta han neptámen ma'a aptéma han apkemha apmonye' apagkok israelitas ma'a Abdón, Hilel axta apketche, apkeñama nak ma'a Piratón, 14 ekweykmoho ocho apyeyam. Cuarenta axta apyókxoho apketchek ma'a Abdón, keñe treinta aptawán'ák, xama xama axta chá'a apkelchánte m'a yámelyeheykok. 15 Keñe axta apketsapma, kélátawanyegkek axta m'a Piratón, ekyetnama axta m'a Efraín énxet'ák xapop apagkok, egkexe élekhahéyak nak Amalec.
© © Enxet Lengua Sur Bible © Paraguayan Bible Society, 2015.