1 Egmenye nak la'a
negko'o elyeptek néten,
keñe eweywenták
kalpexyennók nápaqtók ma'a
meteymog élekhahéyak nak,
2 katnehek ma'a ektémól'a táxa
kalwatnek ma'a yámet aktegák apák
enxeykel'a nahan ma'a ektémól'a
katnetchásegmak ma'a yegmen.
Keñe elya'asagkohok apwesey m'a
apkelenmexma nak
elpexyennók nahan nápaqtók ma'a
pók aptémakxa nak chá'a énxet'ák.
3 Kelpexyennegkek axta exchep
nápaqtók meteymog élekhahéyak,
apweywento axta apkelana m'a aqsok
segyegwakkassamo nak agweta'
mólhaxanma axta katnehek.
4 Axta kañamaxchek
xama enxoho amya'a;
axta nahan kóteyamaxchek xama enxoho
mók aqsok kéláyókxa élane xa
ektéma nak aqsok,
élánésso m'a ektáha nak chá'a
apcháyo.
5 Emhohok xép takha' m'a
énxet
apkelane nak chá'a aqsok ektaqmela
yetlo ekpayheykekxa apwáxok,
megkalwagqayam nak chá'a
elának ma'a
apmopmenyého nak chá'a exchep.
Aplamchek axta exchep,
hakte nenláneykegkek axta
negko'o mólya'assáxma;
nanók agko' axta nenlókáséyak.
6 Neghémók negko'o
negyókxoho m'a énxet
ekmanyásal'a apyempe'ék,
máxa apáwa aphápak
apmanyásal'a m'a ekyókxoho aqsok
éltaqmalma nak chá'a nenlánéyak;
nempalleykmek negko'o negyókxoho,
ektémól'a m'a yámet áwa' élyamayél'a,
máxa éxchahayam entemék
sẽlchampassama m'a nentémakxa
élmasagcha'a agko' nak.
7 Méko eyke
ekwóneykencha'a exchep,
méko nahan
ekwasqápeykekxoho enxoho
yaqwayam keypetchegwakxak;
cháxa keñamak
senxegánegkessama nak
negko'o exchep
tén han segkexakhama
eñama m'a nentémakxa élmasagcha'a.
8 Wesse',
xép akke apteme
negko'o egyáp;
yelpa' negko'o,
keñe exchep ma'a
senlane nak chá'a;
¡negyókxoho negko'o nenteme
senlane apagko' xép!
9 Wesse',
ná elwoho apagko' aqsa,
nágkaxénwakxoho chá'a
apwáxok ma'a
nentémakxa élmasagcha'a nak.
¡Negko'o nenteme énxet'ák apagkok!
10 Yókxexma meykexa énxet
tamheykekxak ma'a
tegma apkelyawe
apkeltaqmalma apagkok nak,
apmopso aptamheykekxak ma'a
Jerusalén,
kélmassésseykmek nahan.
11 Massesseykmek táxa m'a
tegma appagkanamap egagkok
apcheymákpoho,
apkelpeykessamókxa axta chá'a
exchep ma'a ẽlyapmeyk nano'.
¡Kelesagchawók agko'
ekyókxoho m'a aqsok
negmámenyého egagko' nak chá'a
negko'o!
12 Wesse',
¿Melañeya sa' aqsok xép
apwet'a enxoho ektáha xa ektáha nak?
¿Ewanmaya sa' aqsa?
¿Eyánchessamhoya sa' aqsa
sẽllegassáseykegkoho?
© © Enxet Lengua Sur Bible © Paraguayan Bible Society, 2015.