1 Apkeletsekkek agkok ma'a énxet
meyke nak apkeltémakxa
méko keytnakhaksohok awáxok;
apmassegwokmek agkok nahan ma'a
énxet éltaqmalma nak apkeltémakxa,
méko kay'asagkohok
apkeletsapa apkelmallana m'a
aqsok ekmaso
2 tén han ekyetna kaxwók ma'a
meyke ektáhakxa apkelwáxok.
Apkelyetlamchek axta
ámay ekpéwomo
keñe kaxwók apkellókasa
apkelyampe m'a kañe'
takhaxpop apagkok.
Apkeltaqnómap apkelpeykessamo nak chá'a kéleykmássesso
3 Kólchaqnágwatámho s'e,
kéxegke, kéltamhéyak nak chá'a
kelyohóxma,
kélteme nak énxet aptawáseykha
élyamhopma aptawán'ák neptámen
tén han kelán'a
ekyaqmagkáseyak pók énxet
ekpathetéyak ekma chá'a ekyánmaga:
4 ¿Yaqsa kélasmésa kéxegke?
¿Yaqsa kélántekkessáseyncha'a
kélaqta'ák kélwanyawo?
¿Yaqsa kélántekkessáseyncha'a
kélaxkok?
Mólya'assáxma étchek kéxegke,
énxet'ák apkelmopwancha'a amya'a;
5 kélláneykegkek chá'a
kéltémakxa ekmaso megkólmasexta'a m'a
kóneg nak yenta'a robles
tén han ma'a ekyókxoho yenta'a élyawe
élyentaxno nak pessesse agkok,
kélnapmeyk nahan chá'a sakcha'a
kélméssama aqsok kéleykmássesso m'a
nekhaw'ék yegmen ényé nak,
élpatyapeykegkaxa nak ma'a meteymog.
6 “Énxet'ák Israel,
kélmenyeyk kéxegke kólpeykeshok ma'a
meteymog éláxñeyo
éleñama nak neyseksa yegmen ényé,
hakte yetneyk xama kélhamakxa
kéltaqmelchessesso kéxegke m'a.
Kólexpaqheykha chá'a vino
kélmésso naqsa kélagkok ma'a,
kólmések chá'a m'a aqsok aktek
nentómo nak ekyexna.
¿Kapayhekxaya sa' ko'o ewáxok
natámen sekwete ekyókxoho xa
aqsok nak?
7 Kélnegkeneykegkek
néten egkexe netnók ma'a
kélyetnamakxa néten nak,
cha'a kélmeyeykekxexa nahan chá'a
kóllánegwakxak
aqsok ektekyawa kélmésso m'a.
8 Kélnegkeneykegkek teyp
átog kélagkok ma'a
kéleykmássesso kélagkok
élmasagcha'a nak.
Massegkek ekxeyenma kélwáxok ko'o,
kélhaxyawáseykegkek kélnaqta,
kélheykegkek ma'a
kélyetnamakxa néten ekyawe nak;
kélpaqhetchásamáxkók chá'a m'a
kélmáheyo nak chá'a kólpathetagkok,
kóllanok chá'a m'a
aqsok kéláyókxa nak.
9 “Kólnaqtémagkokxohok axta chá'a
kólsakxések pexmok égmenek ma'a
dios Mélec
tén han ekxámokma agko' ma'a
sokmátsa;
kéláphassegkek axta nahan chá'a
apseykha amya'a
ekweykmoho m'a makhawók agko' nak,
kélwagkassamók axta chá'a m'a
apkelmaheykegkaxa nak chá'a
apkeletsapma.
10 Kélyampayak axta
eñama ekxámokma kélxega,
axta eyke kólya'áseykegkok
ekteme eyaqhémo xa
ekyókxoho nak.
Yetneyk axta eyke m'a
ekpasmo nak chá'a,
axta keñamak
kélweteykekxo chá'a kélyennaqte.
11 “¿Yaqsa xa aqsok kéláyókxa
kéláya nak chá'a kéxegke
tén han kéláyo nak chá'a,
yaqwayam enxoho
hélyensók ko'o sélyetleykha
tén han kamassegwomhok agko'
ekxeyenma kélwáxok ko'o?
Ekwanmagkamchek axta aqsa ko'o
mehéláyo axta,
máxa malweteya axta ektemék.
12 Axének sa' eyke ko'o kaxwók
kéltémakxa kéxegke,
kélanagkamchek chá'a kéxegke
kataqmalmak kéltémakxa.
13 Kélpáxamáha sa' agkok
kóltegyaha ekpasmo,
megkapasmehek sa' ma'a
kéleykmássesso kélagkok nak,
megkalwagkasek sa' teyp.
Éxchahayam sa' kalsók ekyókxoho xa;
xama ekwátekhapma sa' kamasséssók.
Keñe sa' ma'a
ektáha nak chá'a ko'o seyáyo
exek sa' chá'a m'a apchókxa,
exek sa' chá'a m'a egkexe
ekpagkanamaxchexa ahagkok nak.”
Énxet'ák Israel kéllegassáseykegkoho tén han kéltaqmelcháseykekxa makham
14 Keñe sa' kañexchek katnehek
kalpaqmetaxchek se'e:
“Kóllána sa' xama ámay éláxñeyo agko',
kólyetnakhés sa' ma'a aqsok
élhaxtaméyak nak chá'a ámay
yaqwayam sa' elyeykhak ma'a
énxet'ák ahagkok.”
15 Hakte aptáhak appeywa
Meyke nak Ekhémo s'e,
memassegwayam nak
apwesey nak aptaqmalma:
“Ekhegkek ko'o m'a netno' nak,
ekpagkanamaxchexa nak,
ekhegkek eyke nahan
nepyeseksa m'a énxet'ák
apkelyelqamákpoho nak
tén han ma'a apkellegeykegkoho nak
ekyentaxno apkelwáxok,
yaqwayam enxoho
alwasqakkásekxohok chá'a
tén han agkeyásekxak chá'a
apkelyennaqte.
16 Malxénchásekxók sa' chá'a ko'o
kaxwók apkeltémakxa
m'a énxet'ák ahagkok
maltaqnaweygkek sa' nahan chá'a
yókxoho ekhem;
hakte elyelqakpok katnehek
nahaqtók ko'o m'a énxet'ák
ektáha axta sélane.
17 Énxet'ák Israel
melya'assáxma axta eyke keñamak
seklama ko'o yaqwatakxoho,
éllegassáseykegkók axta ko'o m'a,
éxakhamchek axta nahan;
énmexeykekxeyk axta eyke ko'o m'a,
apkelyeheykekxók axta m'a
ektémakxa axta ekmámenyého
apkelwáxok elanagkok.
18 Ekweteyak ko'o apkeltémakxa m'a,
altaqmelchásekxak sa' eyke,
agkések sa' yaqwayam
ellókasagkok apkelyampe
tén han ektaqmalma agko' apheykha.
Alpeykessásekxak sa' ko'o
apkelwáxok ma'a
élyaqhápeykha nak chá'a apkelwáxok.
19 Sa' atnehek alának apyókxoho s'e:
‘¡Tásek sa' katnehek kélheykha
kélheykha nak makhawo',
tásek sa' katnehek kélheykha
kélheykha nak keto'!
¡Altaqmelchásekxak sa' ko'o m'a
énxet'ák ahagkok!’
20 Máxa eyke wátsam ekwányam
ekyéhál'a yegmen ma'a énxet'ák
élmasagcha'a nak apkeltémakxa
megkamowánal'a
kalánekxak ekyetno,
élnextegkessamól'a yelpa' m'a
élyaqyahayam agkok
tén han ekmanyása.
21 Méko ektaqmalma
apheykha m'a énxet'ák
élmasagcha'a nak apkeltémakxa.”
Dios apxeyenma xa.
© © Enxet Lengua Sur Bible © Paraguayan Bible Society, 2015.