Babilonia ekxénamaxche yaqwánxa kólteméssesek
1 Keso amya'a ekxénamaxche axta yaqwánxa katnehek kéllegassáseykegkoho m'a Babilonia, apxawe axta eñama kélxekmósso m'a Isaías, Amós apketche nak:
2 “¡Kólchexen néten egkexe eyáxñeyo
xama apáwa magkenatchesso
peya kólempakha'!
¡Kólána' ektamagkok ma'a
sẽlpextétamo!
¡Kólya'ásses néten
kélmék yaqwayam sa'
elántaxnegwók ma'a kelwesse'e
nak atña'ák apagkok!
3 Élwóneyha ko'o m'a
énxet'ák ahagkok
apkelyennaqte nak,
ekméssek nahan sekpeywa m'a
kempakhakma yapmeyk ahagkok
sélyéseykha nak,
élpayheykekxoho nak
chá'a apkelwáxok
atnessásekxak kóneg
ma'a sélenmexma,
yaqwayam enxoho
elanagkok chá'a m'a
ektémakxa ko'o
séllegassáseykegkoho.”
4 Legáxcheyk élpayheykha
kélatña'ák ma'a
néten meteymog
élekhahéyak nak,
máxa m'a ektémól'a
énxet apxámokma.
Legáxcheyk apyennegkessóxma
ekyennaqte m'a
pók aptémakxa nak chá'a énxet'ák,
cham'a énxet'ák
apchaqneykekxa nak.
Apteyánegwákxók
sẽlpextétamo apagkok
appencheséyák nak
aptamhágkaxa yaqwayam
yempakhak ma'a Wesse'
ekha nak apyennaqte.
5 Apkeleñamak ma'a xama apkelókxa
makhawók agko' nak,
cham'a teyp agko' nak
ma'a néxa xapop.
Wesse' egegkok neykhe m'a,
yetlo m'a apkelmeykha nak chá'a
apkenchesso aplo,
apxegakmo nak
yaqwayam emasséssók
ekyókxoho keso náxop.
6 Kalpayheykha kélatña'ák,
hakte chágketwa'ak ma'a
Wesse' egegkok ekhem apagkok,
máxa apkelyekpexchetma sa'
katnehek kawak ma'a
Ekha nak Apyennaqte.
7 Keñe sa' kalyelqaxchek
apaktegák ma'a
apyókxoho énxet,
kamaskok sa' élyennaqte
apkelwáxok ma'a apyókxoho,
8 elyegwáwhok apagko' sa'.
Káhapwak sa' ekyawe agko'
apkelyegwakto
tén han apkellegeykegkoho
ekmáske,
máxa sa' etnahagkok elpexyawha m'a
ektémól'a kelán'a káskok awáxok
kamáwhok katnehek naqláwa.
Égweyk sa' aqsa chá'a
elanok ma'a pók,
kalyexwásekxak sa' nápaqta'a
apkelmegqakto.
9 Wa'ak kaxwók Wesse' egegkok
ekhem apagkok,
ekhem apagkok ekmaso agko',
tén han aplómo apagko',
cham'a peya sa' katnessásekxak
meyke xama aqsok keso náxop,
tén han kamasséssók ma'a énxet'ák
melya'assáxma
apheykha nak ma'a kañe'.
10 Kamaskok sa' elápogwátek yaw'a
tén han yaw'a apkelyawe
apchaqneykekxa
nak chá'a m'a néten;
kapeysamok sa' nahan
ektepa enxoho m'a ekhem,
megyápogwátek sa' nahan ma'a pelten.
11 Aptáhak Wesse' egegkok se'e:
“Allegássesagkohok sa' ko'o
apyókxoho énxet'ák
eñama apkeltémakxa élmasagcha'a,
keñe sa' ma'a énxet'ák
élmasagcha'a agko'
nak apkeltémakxa
allegássesagkohok eñama m'a
apkelánéyák aqsok ekmaso agko'.
Amasséssessók sa' ko'o
ektémakxa nak éleymáxkoho
apkelwáxok ma'a énxet'ák
apkeleymákpoho nak,
mékoho sa' ko'o atnessásekxak ma'a
megyésso nak eleykpoho
tén han ma'a
megkalyexnegwayam nak chá'a
apkelpeywa elwanyaha apnámakkok.
12 Apqántawók apagko' sa' ko'o
atnessásekxak ma'a énxet,
mexók sa' ma'a ekweykenxal'a
ekteme ántawók ma'a
sawo ekyátekto éltaqmalma
éleñama nak Ofir.
13 Keñe sa' kalpexyennók ma'a néten,
kaqxegmakha sa' nahan
ekyetnamakxa m'a xapop
seklawa sa' ko'o xa ekhem nak,
cham'a seklawa ahagko' sa'.
14 “Máxa sa' etnahagkok yátapopyet
apmenxenamap la'a m'a énxet'ák
essenhan ma'a aptémól'a
nepkések yexpaqnek,
meykel'a eyáncheseykekxa.
Xama xama sa' chá'a
elmeyekxak ma'a
apkelókxa apagko' nak chá'a,
elyexánegwakxak sa' ma'a
ektáhakxa nak chá'a
xapop apagkok apagko'.
15 Apyókxoho kélweteykekxa
enxoho chá'a,
kólyetxák sa' chá'a sawo,
apyókxoho apkelmomap nak chá'a
etekyók sa'.
16 Nápaqta'awók sa' chá'a
kólyenhaksek xapop ma'a apketchek
apketcheyetse nak;
kólmenyexchesek sa'
aqsok ma'a apxanák,
kólnaqtawássesagkohok sa' ma'a
apnaqteyegka'a.
17 Alyáteyagkohok sa' ko'o
ektamagkok medos ma'a,
cham'a énxet'ák
megkalyetnakhassamo nak
apkelwáxok ma'a
sawo ekmope élmomnáwa,
melányo nak ma'a
sawo ekyátekto élmomnáwa.
18 Yágke sa' elyátak
elnápok ma'a wokma'ák nak.
Megkaleyósek sa' elanok ma'a
sakcha'a kaxwe ekpalleyam nak,
megkaqhek sa' nahan apwáxok
elanok ma'a sakcha'a
apketcheyetse nak.
19 Keñe sa' ma'a Babilonia,
apchókxa ektaqmalma nak
ma'a énxet'ák,
eyaqheykencha'a nak chá'a
apkelwáxok ma'a caldeos,
kaxnágwakxohok sa' ma'a Sodoma
tén han Gomorra,
cham'a sekmassesseykmo axta ko'o.
20 Mexnekxók sa' chá'a énxet ma'a,
méko sa' kaxnekxak
xama enxoho m'a kañe' nak.
Kamaskok sa' elpakxenagkok
énxet'ák Arabia m'a,
mellókassessekxék sa' nahan chá'a
kaxwók apkelyampe
nepkések apnaqtósso
keláneykha nepkések ma'a.
21 Yágqames sa' kallawha m'a,
esawhekxohok sa' nahan apkelyáqto
sawe apkelyawe m'a kañe' tegma,
xápen sa' nahan ellawha m'a,
elnextegmakha sa' nahan néten
yát'ay apketkók ma'a.
22 Kalwónmakha sa'
semheg nawha'ák éllo m'a
kañe' tegma apkelyennaqte nak,
keñe sa' ma'a kañe'
tegma apkelyawe
apkeltaqmalma apagko' nak
kallawha m'a aqsok nawha'ák éllo.
Chágketwokmek ekhem
agkok ma'a Babilonia;
megkólwenaqtéssesagkek
sa' nahan.”
© © Enxet Lengua Sur Bible © Paraguayan Bible Society, 2015.