1 Keso amya'a apkeltennasa axta Wesse' egegkok ma'a Oseas, Beerí axta apketche, apyennaqtamakxa axta m'a Ozías, Jotam, Ahaz tén han Ezequías, kelwesse'e apkelwányam axta m'a Judá, tén han Jeroboam, Joás axta apketche, wesse' apwányam axta m'a Israel.
Oseas aptáwa' tén han apketchek
2 Apcheynawók axta Wesse' egegkok apkeltennasa amya'a apmako axta eltennaksek eñama apchásenneykekxa m'a Oseas: “Máxa kelán'a ekyaqmagkáseyak pók énxet ekpathetéyak ektegye selyaqye aptamheykegkok seyamasma ko'o m'a énxet'ák Israel. Exeg, ema sa' yaqwayam etnehek aptáwa' xama kelán'a ekyaqmagkáseyak pók énxet ektegye selyaqye, etés sa' nahan étchek ma'a; etnahagkok sa' kelán'a ekyaqmagkáseyak pók énxet ektegye selyaqye étchek.”
3 Apmeyk axta Oseas yaqwayam etnehek aptáwa' m'a Gómer, Diblaim axta apketche, lósók axta han temék, wetássek axta xama apketche apkenna'. 4 Keñe axta Wesse' egegkok aptáha apcháneya Oseas se'e: “Etnésses sa' apwesey sakcha'a Jezreel, hakte kaxwók sa' ko'o allegássesagkohok ma'a aptawán'ák nak wesse' apwányam Jehú, eñama apkelnapma apnámakkok ma'a ekpayho nak Jezreel. Amasséssók sa' ko'o m'a aptémakxa nak wesse' apwányam ma'a kañe' Israel. 5 Amasseksek sa' ko'o ektémakxa nak apkelyennaqte sẽlpextétamo Israel xa ekhem nak, cham'a xóp ekyapwate nak Jezreel.”
6 Lósók axta makham tamheykekxak ma'a Gómer, wet'ak axta étche kelwána. Aptáhak axta Wesse' egegkok apcháneya Oseas se'e: “Etnésses sa' ekwesey sakcha'a Lo-ruhama, hakte megkayóshek sa' ko'o kaxwók alanok ma'a apchókxa Israel. Magwásekhekxók sa'. 7 Sa' aqsa wásekhekxohok ma'a apchókxa nak Judá: ko'o ahagko' sa' awagkasek teyp, sektáha nak Dios Wesse' apagkok. Háwe sa' eyke kempakhakma yaqwayam alwagkasek teyp, meyke yágke sa' atnehek tén han sókwenaqte, tén han meyke yátnáxeg, tén han ma'a énxet apkelchánte nak yátnáxeg.”
8 Tamheykekxeyk axta makham lósók Gómer, natámen axta ekyamasma neme m'a Lo-ruhama, wetákxeyk axta makham étche apkenna'. 9 Keñe axta Wesse' egegkok aptáha apcháneya Oseas se'e: “Etnésses apwesey sakcha'a Lo-amí, hakte háwe ko'o kaxwók kéxegke énxet'ák ahagkok, háwe han ko'o kaxwók Dios kélagkok.”
Énxet'ák Israel kéltemessáseykekxa makham ma'a ektémakxa axta apheykha nano'
10 Xama ekhem sa'
exnágwakxohok makham
apxámokma israelitas ma'a
ektémakxa nak ekxámokma
yagkamex ma'a neyáwa
nak wátsam ekwányam,
méko sa' kawának
kay'asagkohok apwánxa,
tén han kalyetsetek.
Megkatnehek sa'
kólának kaxwók se'e:
“Háwe kéxegke
kaxwók énxet'ák ahagkok.”
Sa' etnehek
elának Dios se'e:
“Kéxegke kélteme
apketchek ma'a Dios
memassegwayam nak.”
11 Keñe sa' épetchekxak
makham énxet'ák Judá
m'a énxet'ák Israel,
elyésha sa' xama
apkemha apmonye'
wánxa xama,
elmeyenták sa'
Jerusalén ma'a énxet'ák
apkeleñama ekyókxoho yókxexma.
¡Awanhók agko' sa'
katnehek ma'a ekhem
apagkok nak Jezreel!
© © Enxet Lengua Sur Bible © Paraguayan Bible Society, 2015.