Jesús apteme apkeláneykekxa axnagkok ekhémo mók nélpaqhetchásamáxkoho Dios
1 Akke ekyágwánxa agkok ektaqmela neyseksa aqsok nenxeyenma nak chá'a negko'o apyetnama Apkemha Apmonye' apkelmaxnéssesso Dios énxet'ák apagkok, cham'a apheykekxo axta m'a néten, ekpayhókxa nak nélya'assamakxa nekha m'a Dios aptaháno. 2 Apkeláneyak nahan aptamheykha apteme apkelmaxnéssesso Dios énxet'ák apagkok ma'a ekpagkanamaxchexa ekmámnaqsoho agko' nak, ektáha axta apkelane m'a Wesse' egegkok, háwe m'a énxet.
3 Apyókxoho apkelámha apmonye'e nak chá'a apkelmaxnéssesso Dios énxet'ák apagkok apteme kélyéseykha yaqwayam egkések Dios ma'a aqsok kélmésso naqsa nak, tén han kélnaqtósso ektekyawa, ékeso éñamakxa eyéméxko nak han keytek aqsok apmésakxa m'a Jesucristo. 4 Kaxtemeyk axta apha náxop ma'a, metnehek axta apkelmaxnéssesso Dios énxet'ák apagkok, hakte apheykha apkelmaxnéssesso Dios énxet'ák apagkok se'e, apkelméssamól'a chá'a Dios ma'a aqsok kélmésso naqsa, éltémo nak chá'a m'a Moisés segánamakxa apagkok. 5 Hakte cháxa apkelmaxnéssesso nak Dios énxet'ák apagkok apkeláneykegkek chá'a apkeltamheykha apcheykmassáseykegkoho m'a aqsok ekheykegko nak néten, tén han nát aqsa. Negya'ásegkók nahan ekteme kéleykmassáseykegkoho ektémakxa, hakte cham'a, apmáheyo axta elának Moisés tegma appagkanamap, axta aptemék apkenagkama Dios se'e: “Etaqmelchesho sa' apkelányo, exnésho sa' nahan apkelane m'a sektémakxa axta sekxekmósso exchep néten egkexe nak.” 6 Tásók agko' eyke m'a apxawáya axta apteme apkelmaxnéssesso Dios énxet'ák apagkok ma'a Apkemha apmonye' nak apkelmaxnéssesso Dios énxet'ák apagkok egagkok, senlánekxésso nak chá'a ekhémo mók nélpaqhetchásamáxkoho ektaqmalma nápaqtók Dios, megkaxnawok ma'a mók axta, ektekkesso nak ektaqmalma m'a sempekkencháseykekxa nak appeywa Dios, peya nak kayágwomhok sempasmo.
7 Kaxtemék axta ekmowána kalának eyánémaxchexa axta kalának ma'a émha amonye' axta ekhémo mók nélpaqhetchásamáxkoho Dios, megkólmenyeyk axta katépekxak mók ekhémo mók nélpaqhetchásamáxkoho Dios. 8 Apweteyak axta eyke Dios megkápéwomo apkeltémakxa xa énxet'ák nak. Tén axta aptéma s'e:
“Kammok sa' ekhem yaqwánxa
alánekxak makham axnagkok
sélpaqhetchásamáxkoho m'a
énxet'ák Israel,
tén han ma'a Judá.
9 Cháxa ekhémo mók
nélpaqhetchásamáxche nak,
megkaxók sa' ma'a
sélánéssama axta m'a
apyapmeyk nano',
sélmoma axta apmék
sélántekkessama m'a
yókxexma Egipto;
éxakhamchek axta ko'o m'a,
hakte axta eláneykegkok ma'a
ekhémo mók
nélpaqhetchásamáxkoho
ahagkok, axta aptemék
Wesse' egegkok.
10 Sa' katnehek ko'o sélánésso
ekhémo mók
nélpaqhetchásamáxkoho
énxet'ák Israel
natámen sa' xa ekhem nak,
axta aptemék Wesse' egegkok:
Apekkenchesek sa'
segánamakxa ahagkok ma'a
élchetámeykegkaxa nak
apkelwáxok,
anaqtáxéssesagkok sa nahan
ma'a apkelwáxok.
Ko'o sa' hetnehek
Dios apagkok,
keñe sa' ko'o atnehek
énxet'ák ahagkok ma'a.
11 Kamaskok sa' kaxwók elxekmósek pók,
cham'a apchókxa xamo' nak,
essenhan ma'a apnámakkok
apancha'awo nak
yaqwayam enxoho
elya'asagkohok
Wesse' egegkok,
hakte hey'asagkohok sa' ko'o
m'a apyókxoho énxet,
cham'a meyke nak kéláyo
ekweykekxoho m'a
ekyawe nak kéláyo.
12 Mayaqmagkásekxeyk sa' ko'o
aqsok ekmaso apkeláneyak,
megkaxénwakxók sa' chá'a
kaxwók ewáxok ma'a
melya'assáxma nak.”
13 Apxeyenmeyk axta Dios ma'a axnagkok ekhémo mók nélpaqhetchásamáxkoho, hakte apxeyenmeyk axta ektéma ápak ma'a émha amonye' axta; keñe m'a ekteme nak ápak tén han ekmasse kélmeykha, ketók ekmassegweykenxa.
© © Enxet Lengua Sur Bible © Paraguayan Bible Society, 2015.