1 Apyókxoho apkelámha apmonye'e nak apkelmaxnéssesso Dios énxet'ák apagkok, apteme kélyéseykha nepyeseksa énxet'ák, apkelyésamap chá'a yaqwayam elanaksek aqsok énxet'ák nápaqtók Dios, tén han apmésso chá'a aqsok apmésso naqsa Dios tén han apkelnapma chá'a aqsok kélnaqtósso yaqwayam kólmasséssesek chá'a apkeltémakxa melya'assáxma énxet'ák. 2 Apwanchek nahan kapyóshok elanok apkemha apmonye' apkelmaxnéssesso Dios énxet'ák apagkok ma'a énxet'ák melya'áseyak nak aqsok, tén han ma'a megyaqhémo nak chá'a apkeltémakxa, hakte hawók ektémakxa apyelqamákpoho m'a énxet'ák nak, 3 kéméxcheyk nahan chá'a egkések aqsok apkelnapma Dios ma'a apkemha apmonye' nak apkelmaxnéssesso Dios énxet'ák apagkok, yaqwayam enxoho kólmasséssesek aptémakxa mey'assáxma, hakte apyelqákpók nahan ma'a, ekhawo nak han ektémakxa chá'a melya'assáxma m'a énxet'ák. 4 Méko xama énxet apwanchek etnéssesakpohok apagko' apkelmaxnéssesso Dios énxet'ák apagkok, Dios akke apwánxa apagkok chá'a apteme apwóneykha, tén han apmésso chá'a xa ektéma nak aptamheykha, ektéma axta m'a Aarón. 5 Ekhawo nak han ektémakxa m'a Cristo, háwe axta aptemessásamap apagko' apkemha apmonye' apkelmaxnéssesso Dios énxet'ák apagkok, Dios axta eyke apmésso xa ektémakxa nak aptamheykha, hakte Dios axta m'a aptéma axta apkenagkama s'e:
“Xép apteme hatte;
sakhem ko'o exchep
aptáha apyáp ko'o.”
6 Axta aptemék nahan apkenagkama ekyetnama nak mók nekha eknaqtáxésamaxche s'e:
“Xép apteme
apkelmaxnéssesso
Dios énxet'ák apagkok
megkatnégwayam néxa,
ekhawo ekweykenxa axta
aptamheykha m'a
Melquisedec.”
7 Apyennaqtéssegkek axta chá'a appeywa Cristo apkelmaxnagkama yetlo apkelekxagweykha apwóneykencha'a Dios, aphamakxa axta keso náxop, cham'a Dios apmopwána nak emyók emátog; apháxenmók axta nahan chá'a Dios, eñama ekha apkelyaheykekxoho. 8 Apya'ásegweykmek axta Cristo ektémakxa nélyaheykekxoho neyseksa aplegeykegkoho, aptáhakxoho eykhe Dios Apketche. 9 Xama axta apsawhegweykmo apchánémakpexa etnehek ma'a Cristo, aptemegkek axta éñamakxa apkelwagkásamap teyp megkatnégwayam néxa m'a apyókxoho ektáha nak chá'a apkelyaheykekxoho, 10 keñe axta Dios apteméssessama apkemha apmonye' apkelmaxnéssesso Dios énxet'ák apagkok, ekhawo ekweykenxa axta aptamheykha m'a Melquisedec.
Sẽlésso ólwataksek magya'ásseyam
11 Xámok eykhe makham yaqwayam anxének xa amya'a nak, askehek eyke ampékásekxak ektémakxa, hakte yehémek chá'a kólya'asagkohok kéxegke ektémakxa. 12 Nanók axta eykhe kéxegke kóltamhagkok kélxekmósso kélnámakkok, hakte wenaqtegke'; kéméxcheyk eyke kóltennásekxohok makham kéxegke m'a aqsok ekmanyehe nak agya'asagkoho', nélxekmowásamáxche eñama nak Dios. Kélyelqamáxchekxeyk aqsa makham, weyke nam'agkok apyegmenek aqsa kéméxcheyk kólyenagkok, megkólwanchek makham kóltawagkok ma'a kélto ekyennaqte nak. 13 Énxet ektáhakxa enxoho apyà makham weyke nagkeygmenek, máxa m'a sakcha'a apteykegkohol'a neme, megkamopwánal'a ékpelkohok aqsok ektaqmela tén han aqsok ekmaso. 14 Eyke aptéyak chá'a nento élyennaqte m'a metnaha nak apketkók, cham'a apmopwancha'a nak chá'a elyekpelkohok aqsok, hakte keltámeyeykegkek apkelyekpelchémo m'a aqsok ektaqmela nak, tén han ma'a aqsok ekmaso nak.
© © Enxet Lengua Sur Bible © Paraguayan Bible Society, 2015.