1 Ékeso éñamakxa, eyéméxko nak negko'o anlanagkohok nentáhakxa ekyetna nak makham negyeseksa m'a sempekkencháseykekxa axta appeywa Dios, yaqwayam ólántexek ma'a yaqweykenxa nak hẽllókassesek nélyampe, hakte megkólántexek katnehek kélnápakha kéxegke. 2 Hakte ẽllegassegkek axta negko'óxa xa amya'a ektaqmela nak, ekhawo nak xa énxet'ák nak; chaqhémok axta eyke kéllegassama xa énxet'ák nak, hakte axta épetcheykekxak aptamhéyak melya'ásseyam ma'a énxet'ák apkelyaheykekxoho axta xa amya'a nak. 3 Negko'o eyke, nenteme nak magya'ásseyam, ólántexek sa' ma'a yaqweykenxa nak hẽllókassesek nélyampe Dios, cham'a apxeyenma axta Dios aptéma appeywa s'e:
“Axta keñamak
sekxeyenma ko'o
neyseksa seklo
peya melántexek ma'a
yaqwánxa nak
allókassesek apkelyampe
énxet.”
Appenchessegkek axta eyke aptamheykha Dios apkeláneya axta keso náxop; 4 nekha eknaqtáxésamaxche nahan temék ekxénamaxche siete ekhem se'e:
“Apkellókassegkek axta
apyampe Dios
ekweykmo siete ekhem.”
5 Axta temék nahan eknaqtáxésamaxche s'e:
“Melántexek sa' ma'a
yaqweykenxa nak allókassesek
apkelyampe énxet.”
6 Yetneyk eyke makham nápakha eyéméxko nak elántexek xa yaqweykenxa nak hẽllókassesek nélyampe, hakte axta elántaxnók ma'a apmonye'e axta kéllegasso eñama melyaheykekxa. 7 Cháxa keñamak appekkeneykekxo nak makham Dios xama ekhem, apkeltéma nak “keso negwánxa nak.” Nano' axta entemék sẽltennassama xa, apchásenneykekxo m'a ektémakxa axta appeywa David, ekyetnama nak eknaqtáxésamaxche ekxénamaxko nak:
“kélleg'ak agkok kéxegke
aptáhakxa appeywa Dios se'e
sakhem nak,
nágkólyennaqtés aqsa
kélwáxok.”
8 Kaxtemék axta apmésso apkellókasso apkelyampe israelitas ma'a Josué, mexének axta Dios epekkenek mók ekhem yaqweykenxa ellókassesek apkelyampe énxet. 9 Yetneyk eyke makham kélpagkanchesso yaqweykenxa ellókasek apkelyampe m'a Dios énxet'ák apagkok; 10 hakte énxet ektáhakxa enxoho apkelántaxno xa yaqweykenxa nak hẽllókassesek nélyampe Dios, kamaskok sekxók elanagkok apkeltamheykha, ekhawo ektémakxa axta apkellókassama sekxók apyampe Dios. 11 Kéméxcheyk chá'a negko'o ólwasqápekxohok yaqwayam ólántexek xa yaqweykenxa nak hẽllókassesek nélyampe m'a Dios, yaqwayam enxoho méko keytlakxak apkeltémakxa axta m'a énxet'ák apkelya'ásseykmo axta.
12 Hakte yetneyk ekyennaqte m'a Dios appeywa, tén han ekmowána. Ahamteyk agko' nahan, yeykhágweykmók ektémakxa élmahantakcha'a m'a sawo élwenaqte ánet nekha ahamtek la'a, kataxnegwomhok nahan ma'a kañók agko' nak egwáxok ekweykmoho m'a ekyetnamakxa nak eghagák, kawomhok nahan ma'a kañók agko' nak apwáxok énxet; kalanok nahan ma'a ektémakxa nak élchetámeykha egwáxok, tén han ma'a ekmáheyókxa nak chá'a kalának egwáxok. 13 Yawanchek nahan keyxánegkesek xama enxoho m'a ektáha axta Dios apkelane; yáxñakxoho nahan katnehek apwete ekyókxoho aqsok ma'a Dios, peya nak negko'o óltennásekxohok ma'a nentémakxa nak chá'a.
Jesús apteme apkemha apmonye' apkelmaxnéssesso Dios énxet'ák apagkok
14 Jesús, Dios Apketche, apteme apkemha apmonye' sẽlmaxnéssesso negko'o, aptaxnegweykekxo axta m'a néten. Ékeso éñamakxa eyéméxko nak anlenxanmohok nélwasqápeykekxoho magya'ásseyam nenxeyenma nak chá'a. 15 Hakte apya'ásegkok ektémakxa nélyelqamáxkoho negko'o m'a apkemha apmonye' sempasmo nak sẽlmaxnéssesso, hakte apyepkónamakpek axta nahan ma'a, ekhawo nak sentémakxa negko'o; axta eyke elaneyk xama enxoho mey'assáxma m'a. 16 Agágketchessekxohok hana m'a aphamakxa nak Dios egagkok segásekhayo yetlo megkatnaheykha egwáxok, yaqwayam enxoho kapyóshok henlanok negko'o, tén han hempasmok yetlo ektaqmeleykha apwáxok senlányo eyaqhawókxa enxoho negámenyéxa.
© © Enxet Lengua Sur Bible © Paraguayan Bible Society, 2015.