Tásek antaqmelchesek ektémakxa nak nélwagkásamáxche teyp sẽllegasso
1 Ékeso éñamakxa eyéméxko agko' nak negko'o antaqmelcheshok negháxenmo m'a amya'a nenlege axta, yaqwayam enxoho mólyetnakhágwomek nélyetlo m'a ámay nak. 2 Kayhek axta ektamheykha segánamakxa segméssama axta Dios ma'a nanók axta, apkelásenneykekxo axta m'a apkelásenneykha, kóllegássesagkohok axta chá'a énxet'ák apkelánéyak enxoho melya'assáxma, tén han ma'a melyaheykekxoho enxoho chá'a, cham'a ekpayhókxa axta chá'a kóllegássesagkoho'. 3 ¿Háxko sa' eyke antéhek negko'o ólegketaxchek mantaqmelchesa enxoho m'a nélwagkásamáxche teyp ekteme nak ektaqmela agko'? Hakte Wesse' egegkok apagko' axta apxeyenma apmonye' xa nélwagkásamáxche teyp nak, keñe axta natámen senxekmóssama negko'o ekteme ekmámnaqsoho agko' ma'a ektáha axta apkellege xa amya'a nak. 4 Tén axta nahan Dios senxekmóssama negko'o ekteme ekmámnaqsoho xa, yetlo apkelane m'a aqsok magkenatchesso nak agweta', tén han ma'a aqsok éltaqmela nak, tén han ma'a ekyókxoho ektémakxa nak aqsok sempelakkasso agweta', tén han eñama m'a Espíritu Santo, segméssama nak chá'a apmakókxa enxoho chá'a etnehek segmésso, ekhawo ektémakxa nak chá'a apmopmenyého Dios.
Jesús kélhéssamo apkelyáxeg
5 Axta egkéssók Dios yaqwayam etnahagkok apkelámha apmonye'e apkelásenneykha m'a negheykegkaxa ekxegakmo nak egmonye', cham'a nenxéna exchek. 6 Yetnegkek eyke nekha eknaqtáxésamaxche aptéma appeywa xama énxet se'e:
“¿Yaqsa m'a énxet?
¿Yaqsa m'a apteme nak énxet?
¿Yaqsa ektéma
ekxénweykekxoho nak apwáxok?
¿Yaqsa ektéma
ekyetnakhassamo nak
apwáxok?
7 Yaqwatakxoho axta
apteméssessók xép kónego',
axta exnéssamók ma'a
Dios apkelásenneykha,
apméssegkek axta eyke
apcheymákpoho,
tén han ekyawe kéláyo,
8 apnegkenchessegkek axta
kóneg apmagkok
ekyókxoho aqsok.”
Xama axta apnegkenchessama ekyókxoho aqsok kóneg apmagkok, axta yáyekmok xama aqsok enxoho Dios apnegkenchessama kóneg apmagkok. Makke agwet'ak makham negko'o énxet etnehek apkeláneykha ekyókxoho aqsok. 9 Negya'ásegkók eyke m'a Jesús, apteméssessama axta Dios kónegók yaqwatakxoho nepyeseksa m'a apkelásenneykha, apcheymákpoho eyke kaxwók apteméssessók tén han ekyawe kéláyo, eñama m'a apketsapma axta. Segásekhayo axta keñamak Dios apkeltémo yetsapok Cristo yaqwayam enxoho hempasmok negyókxoho.
10 Apkeláneyak axta ekyókxoho aqsok Dios yaqwayam etnehek apagkok, apkeltémók nahan kawakxohok apyókxoho apketchek ma'a ektémakxa nak apcheymákpoho. Axta keñamak apsawhéssamo Dios ekpéwomo apteméssessamakxa m'a Jesucristo eñama m'a aplegeykegkoho axta, cham'a Apkelwagkasso nak teyp. 11 Apyókxoho apteme nak chá'a apkelpagkanamap tén han ma'a apteméssesso nak chá'a apkelpagkanamap, wánxa xama Apyáp. Cháxa keñamak memegqaktama nak Dios Apketche apkeltéma apkelyáxeg, 12 ekhawo ektémakxa nak appeywa ekyetnama eknaqtáxésamaxche s'e:
“Altennasha sa' ko'o élyáxeg
xép apwesey,
anneykmaksek sa'
alteméssesek apcheymákpoho
neyseksa apchaqneykekxexa
énxet'ák.”
13 Temék nahan appeywa s'e:
“Sa' atnehek ko'o
may'ásseyam ma'a.”
Keñe aptéma nahan appeywa s'e:
“Keso ko'o s'e, yetlo étchek
sélmésso axta Dios.”
14 Cham'a ektémakxal'a kélketchek ekhémo mók aphápetek tén han éma apagkok, cháxa ektémakxa nahan Jesús ekhémo aphápetek tén han éma apagkok ma'a ektémakxal'a énxet, yaqwayam enxoho emasséssók ma'a ekha nak ekmowána hegaqhek, cham'a kelyekhama nak, eñama m'a apketsapma axta. 15 Cháxa aptémakxa axta apkelwagkassama teyp apyókxoho apkelaye axta eletsapok, apkelweynchámeykencha'a axta aptamheykegko máxa kélásenneykha naqsa neyseksa apheykha. 16 Hakte naqsók axta melya'áya yaqwayam epasmok ma'a Dios apkelásenneykha, wánxa axta aqsa m'a Abraham aptawán'ák neptámen. 17 Axta keñamak apheyásamákpoho apagko' ma'a apkelyáxeg, yaqwayam enxoho etnehek Apkemha apmonye' Apkelmaxnéssesso Dios énxet'ák apagkok meyke apyenseyam tén han apmopyósa elanok pók neyseksa appasmeykha aptamheykha m'a Dios, tén han yaqwayam etaksek megkólyaqmagkáseykekxa apkeltémakxa melya'assáxma m'a énxet'ák. 18 Apwanchek han kaxwók epasmok ma'a kélyáteyeykegkoho nak chá'a elának aqsok ekmaso, eñama m'a aplegeykegkoho axta tén han ekyepkónma.
© © Enxet Lengua Sur Bible © Paraguayan Bible Society, 2015.