Anlanok hana wánxa m'a Jesús
1 Cháxa keñamak eyeyméxko nak negko'o agyetnakhasek ekyókxoho aqsok sẽlya'assama nak exma tén han mólya'assáxma sẽlpextehetma nak, tén han ónyahagkok yetlo nélwasqápeykekxoho m'a nélteyásamáxche ekyetna nak egmonye', hakte apxámok énxet negyáwa negko'o apxekmóssamo nak apteme melya'ásseyam. 2 Ónmexhok ma'a aphakxa nak Jesús, hakte cha'a éñamakxa magya'ásseyam ma'a, tén han apteméssesso m'a ekpayhawo nak katnehek. Apkelenmáxamákpók axta Jesús néten aqsok ektegyésso, meyke apkenmexmo m'a ektémakxa axta apketsapma, segmegqassamo nak hẽlteméssesek, hakte apya'ásegkók axta peya étak ekpayheykekxa apwáxok natámen aplegeykegkoho; tén axta apheykekxo m'a ekpayhókxa nak nélya'assamakxa nekha Dios aptaháno.
3 Ékeso éñamakxa eyéméxko nak kalchetagkasha kélwáxok ma'a aptémakxa axta Jesús, apkelenmáxamákpoho axta aptaqnaweykha m'a énxet'ák melya'assáxma nak; cháxa keñamak eyéméxko nak megkólyampágwomek kéxegke tén han megkalleklágwome'. 4 Megkólenmexak eykhe makham kéxegke ektémakxa nak mólya'assáxma ekwokmoho kéltekyawa, 5 kelwagqámeykegkek nahan kéxegke m'a aptémakxa axta apmésso appeywa Dios, kéxegke kélteme nak máxa apketchek. Temék eknaqtáxésamaxche weykcha'áhak se'e:
“Hatte, ná etaqnaw aqsa m'a
ektémakxa nak
sempékessáseyak
Wesse' egegkok,
nágkaleklágwom nahan ma'a
apkeltennáseykxoho enxoho
chá'a eyesagko aptáhakxa
exchep.
6 Hakte epékessásekxoho chá'a
aptáhakxa Wesse' egegkok ma'a
ektáha nak chá'a apchásekhayo,
elyekpexchethok eyke chá'a m'a
apma nak chá'a takha'
apteme máxa apketche.”
7 Kéllegeykegkók chá'a kéxegke yaqwayam enxoho kóllánekxések chá'a kélxega; máxa apketchek aptemék kéxegke m'a Dios. ¿Yetneyk enxeykel'a énxet mepékessáseyak nak apketche? 8 Agkok epékessásegkok kéxegke Dios, aptémól'a epékessesagkok ma'a apyókxoho apketchek, megkóltéhek kéxegke Dios apketchek apancha'awo'. 9 Hempékessesagkohok axta chá'a negko'o ẽlyapmeyk apheykha nak keso náxop, ólyahakxohok axta nahan chá'a. Ekyágwánxa agkok ektaqmela ólyahakxohok ma'a Egyáp apha nak néten, yaqwayam enxoho agwetak ekyennaqte egnények. 10 Hempékéssesagkok axta chá'a negko'o yaqwatakxoho ẽlyapmeyk keso náxop, cham'a ekxéna enxoho apwáxok ekpayhawo henteméssesek; hempékessesagkok eyke chá'a negko'o Dios, yaqwayam enxoho katnehek ekmámnaqsoho sempasmo, tén han henteméssesek nélpagkanamaxche ekhawo ektémakxa nak apteme appagkanamap. 11 Naqsók mehempeykessásekxék egwáxok sẽllegassásegkoho enxoho, cham'a nenxaka enxoho, askehek aqsa katnehek; apya'ásegwokmek agkok enxama ektémakxa kélxekmósso, meyke ektáhakxa apwáxok etnehek, tén han ekpéwomo aptémakxa.
Sẽlésso antaqnók Dios appeywa
12 Kólmeyásekxa makham élyennaqte kélmék élyampágwayam nak tén han kéltapnák élyelqamáxche nak, 13 kólchetam ma'a ámay ekpéwomo nak, yaqwayam sa' kataqmelekxak ma'a kélmenek ektaqhe nak, tén han kamaskok ekleyamaxche'.
14 Kóllenxánem chá'a kóltéhek meyke ektáhakxa kélwáxok kélyókxoho, tén han kóltéhek kélpagkanchásamáxche Dios; hakte méko kawának kótak Wesse' egegkok ma'a megkólpagkanchásexko enxoho Dios. 15 Kóllenxánem chá'a megkólyensemek ma'a ektémakxa nak segmésso naqsa ektaqmeleykha apwáxok senlányo m'a Dios, yaqwayam enxoho megkóltéhek kélxama m'a ektémakxal'a yámet egkepmenák ekmáske, eknaqtawáseykencha'awól'a énxet, tén han ekwayól'a. 16 Nágkólmésaxche aqsa kélxama enxoho kéxegke m'a ekmeyámáxchexa nak antéhek negmeykha mansexta, nágkóltaknaw nahan ma'a aqsok ekpagkanamaxche nak; hakte cháxa aptémakxa axta Esaú xa, apyenyeykekxo axta apteme kélketche átnaha apketkok wánxa ekyaqmageykekxa xama sokpayhe nento. 17 Kélya'ásegkok kéxegke ektémakxa axta natámen, aptaqhessamo axta apyáp apkeltémo eykhe elmaxnéssesek aqsok éltaqmela; apchaqhamakpek axta eykhe apwóno, mopwanchek axta eyke elánekxak ma'a ektémakxa axta.
18 Axta eyke kólyepetchegweykmohok kéxegke m'a aqsok negmowána nak ampaknegwomho' tén han eyáléweykegkaxa axta, ektéma axta m'a Israelitas, cham'a ekyaqtéssamakxa agko' axta exma, tén han éxchaheykenxa axta ekyennaqte; 19 axta kóllegeyk nahan ekpáwà m'a kélaqkahasso, tén han appeywa m'a Dios. Axta nahan eltémók kalenxanmohok chá'a élpaqhetchesso kélpeywa m'a ektáha axta apkellege xa kélpeywa nak, 20 hakte mopmenyeyk axta elmok takha' m'a apkelánémakpexa axta chá'a etnahagkok ektéma nak se'e: “Énxet ektáhakxa enxoho aptamhomakpoho s'e egkexe nak, kólyetna sa' meteymog kólaqhekxa', essenhan kólyetxák sawhéwa, kawakxohok sa' nahan ma'a aqsok nawhak.” 21 Kelyegwakkassamok agko' axta énxet'ák ma'a ektémakxa axta apkelwete, aptéma axta appeywa Moisés se'e: “Élpexyennegkek ko'o seyeye.”
22 Keñe kéxegke kélyepetchegweykmoho m'a énmakxa nak egkexe Sión, tén han ma'a Dios memassegwayam nak tegma apwányam apagkok, cham'a Jerusalén apyetnama nak néten, apchaqneykekxexa nak apxámokma apagko' Dios apkelásenneykha yaqwayam elpeykesho'. 23 Kélyepetchegweykmók nahan ma'a apchaqneykekxexa nak Dios apketchek átnaha apketkók, eknaqtáxésamaxko nak apkelwesey m'a néten. Kélágketchesseykmek nahan aphakxa m'a Dios, apteme nak apkelyekpelchémo apyókxoho énxet, tén han ma'a apheykegkaxa nak énxet éltaqmela nak apkeltémakxa, apkeletsapma axta, apteméssessama axta apkelpéwomo m'a Dios ekpayhawo nak etnéssesek, 24 kélyepetchegweykmók nahan ma'a aphakxa nak Jesús, apteme nak apkelane m'a axnagkok ekhémo mók nélpaqhetchásamáxkoho Dios, tén han ma'a éma sẽlexpaqheykencha'a nak sẽlteméssessama eyáxñeyo nentémakxa, cham'a sẽltennassama nak hegmések aqsok éltaqmela agko', megkaxnawo nak ma'a ektémakxa axta Abel éma apagkok.
25 Kóllanagkoho sa' kéltáhakxa, nágkólteme megkólháxenmo m'a ektáha nak appaqmeyesma. Hakte axta elegketamakpok ma'a énxet'ák aptaqnagko axta Dios appeywa, cham'a apkeltennassama axta ekmasagko aptamheykegkaxa neyseksa apheykha keso náxop. Negko'o sa' eyke ekyágwánxa agkok mogwanchek ólegketaxche', maghaxnawo enxoho sempaqhetchesso m'a apha nak néten. 26 Yawheyáseykha axta xapop appeywa Dios xa ekhem nak, keñe kaxwók aptéma appeywa s'e: “Ayawhésha sa' makham, háwe sa' eyke ekwánxa agkok ma'a xapop, néten sa' nahan.” 27 Xama axta ektéma “xama sa' makham” cháxa ekteme magkenatchesso peya kólyaqmagkasek mók ma'a aqsok élánamáxche axta, cham'a kélmowána nak kóltaqhésha, yaqwayam enxoho kaxnagkok aqsa m'a megkólmowána nak kóltaqhésha. 28 Megkólwanchek kóltaqhésha m'a aptémakxa nak Wesse' apwányam Dios segméssama nak negko'o. Cháxa keñamak eyeyméxko nak agmések ekxeyenma egwáxok Dios, tén han ólpeykeshok yetlo nempagkanchásamáxche, tén han negáyo, ekleklamókxa nak apwáxok antéhek. 29 Hakte Dios egagkok apteme táxa ekmassesseykmoho agko' la'a aqsok.
© © Enxet Lengua Sur Bible © Paraguayan Bible Society, 2015.