Ẽlpaqhetchessegkek axta negko'o Dios eñama apchásenneykekxa m'a Apketche
1 Hágkaxwe axta elpaqhetchesek Dios ẽlyapmeyk nano', cham'a nanók axta, xámók axta nahan aptémakxa chá'a apkelpaqhetchesso, apkelásenneykekxo axta elxének ma'a apkellegasso axta appeywa. 2 Keñe so kaxwo nak, eyágketwokmo nak ektemegwánxa néxa ekhem, sẽlpaqhetchessama apchásenneykekxo m'a Apketche, apkeláneya axta ekyókxoho aqsok ekheykegko nak eñama xa Apketche nak, apteméssessama nak han yaqwayam etnehek apagkok ma'a ekyókxoho aqsok. 3 Cha'a apteme nahan apcheymákpoho ektaqmalma nak ma'a Dios, tén han aphémo apagko' ma'a Dios, tén han apkelméyak ekyókxoho aqsok eñama m'a appeywa ekha nak ekmowána. Apheykekxeyk axta néten ekpayhókxa nak nélya'assamakxa nekha m'a Dios aptaháno, cham'a natámen axta segáxñassáseykekxa nentémakxa mólya'assáxma, 4 néten axta aptemék nepyeseksa m'a Dios apkelásenneykha, hakte apxawáyak axta ektaqmela agko' apwesey megkaxnémo m'a ektémakxa nak apkelwesey m'a Dios apkelásenneykha.
Dios Apketche apteme néten nepyeseksa Dios apkelásenneykha
5 Hakte axta etnék yának Dios xama enxoho apchásenneykha s'e:
“Xép apteme hatte;
sakhem ko'o exchep
aptáha apyáp ko'o.”
Axta nahan etnék exének xama enxoho apchásenneykha s'e:
“Apyáp sa' ko'o hetnehek ma'a,
keñe sa' ko'o etnehek
hatte m'a.”
6 Keñe axta apcháphassama Apketche apteme nak wánxa xama keso náxop, aptéma appeywa s'e:
“Apyókxoho Dios
apkelásenneykha sa'
elpeykesho'.”
7 Keñe axta apkelásenneykha aptéma apkelxeyenma Dios se'e:
“Apkeltémok axta etnahagkok
ekho éxchahayam ma'a
apkelásenneykha nak,
keñe ekho táxa eyáléwe m'a
apkelapháseykha nak.”
8 Keñe axta Apketche aptéma apxeyenma s'e:
“Dios, megkatnégwomek xép
néxa apteme
Wesse' apwányam,
elanha sa' chá'a
énxet'ák apagkok
yetlo ekpéwomo aptémakxa.
9 Yásekhohok xép
aqsok ektaqmela,
etaqnawhok eyke m'a
aqsok ekmaso nak;
axta keñamak
apkelyéseykencha'a exchep
ma'a Dios,
cham'a Dios apagkok nak,
apyánchessessamók agko'
axta anhan apmésso
ekpayheykekxa apwáxok
axta kaxnémók ma'a
apkelxegexma'a nak.”
10 Axta aptemék nahan appeywa s'e:
“Xép Wesse' egegkok,
apkeláneyak axta exchep
xapop ma'a sekxók agko' axta;
xeyep apagko' axta anhan
apkelane m'a néten.
11 Kalmassegwók sa' eyke
ekyókxoho xa,
memassegwomek
eyke chá'a exchep.
Apák sa' nahan katnahagkok xa
ekyókxoho nak
ektémól'a apáwa
etnehek aphápak;
12 eyaqsásekxak sa' xép
nentémól'a agyaqsásekxak
nentaxno,
eyaqmagkasek sa' mók,
aptémól'a énxet eyaqmagkasek
pók aptaxno.
Meyaqmagkassemek eyke chá'a
aptémakxa exchep;
megkamassegwomek sa' nahan
apweynchámeykha.”
13 Hakte axta etneyk yának Dios xama enxoho apkelásenneykha s'e:
“Exa ekpayhókxa nak
sélya'assamakxa',
ekwokmoho seknegkenchesa
kóneg apmagkok ma'a
apkelenmexma.”
14 Hakte apyókxoho Dios apkelásenneykha apteme espíritu apkeltamheykha chá'a m'a aphakxa nak Dios, kéláphasso nak chá'a yaqwayam epasmok ma'a énxet'ák kélpagkanchesso nak yaqwayam elwagkasakpok teyp.
© © Enxet Lengua Sur Bible © Paraguayan Bible Society, 2015.