Jacob tén han Esaú apweteykekxa pók
1 Apxegákxeyk axta makham Jacob, apkelántekkek axta han apmonye' Dios apkelásenneykha. 2 Xama axta apkelwet'a Jacob xa énxet'ák nak, aptáhak axta s'e: “Dios sẽlpextétamo apagkok xa.” Apteméssessek axta han ekwesey Mahanaim xa yókxexma nak.
3 Apkelaphássek axta Jacob apseykekxa amya'a m'a Seír, cham'a yókxexma Edom, yaqwayam eltennássekxak Esaú peya ewaták aphakxa m'a apyáxeg. 4 Axta aptáhak apkeláneya s'e: “Kólteme sa' kólának eyapma Esaú s'e: ‘Apkeltamhók xeyk kóltennaksek Jacob aphama Labán apxagkok, ekwokmoho makham se'e kaxwo' nak, apxénchek han elyahakxoho', hakte apchásenneykha m'a, 5 apxénchek han ekha m'a weyke, yámelyeheykok, nepkések, tén han ma'a apkelásenneykha apkelennay'a, tén han kelwán'ák. Eyáphássessek ko'o Esaú xa amya'a nak, hakte émeñeyk kataqmalmakha apwáxok hélano'.”
6 Apkelwákxeyk axta makham ma'a apseykha nak amya'a, aptáhak axta apcháneya Jacob se'e:
—Nélwákxeyk xeyk negko'o aphakxa m'a apepma Esaú, apxegakmek han yaqwayam emok takha' exchep, yetlo cuatrocientos énxet'ák apkelxegexma.
7 Apkekawók apagko' axta Jacob apleg'a, yetnakha'awók axta apwáxok. Yetlókok axta han apkexpánchesso apqánet apkelyaqyeyáseyak énxet ektáha axta apkelxegexma'a, tén han ma'a nepkések, weyke, yányátnáxeg, 8 hakte axta entáhak élchetamso apwáxok se'e: “Apketamokmek sa' agkok Esaú xama apyaqyesso nak énxet'ák ahagkok, keñe sa' ma'a mók apyaqyesso nak, yenyahagkok elxeganmok.” 9 Keñe axta aptáha apkelmaxneya s'e: “Wesse' ahagkok, Dios apagkok nak ma'a áta' Abraham tén han ma'a táta Isaac, apkeltémo axta amyekxak makham ma'a seyókxa, apheykegkaxa nak énámakkok, apkeltémo axta kataqmelek sekweynchámeykha. 10 Megkapayhawok ko'o kataqmalmakha apwáxok hélano', megkapayhawok hépetchaha chá'a. Ekyeykheykekxeyk axta ko'o wátsam Jordán meyke sekseykha xama aqsok, wánxa aqsa sektasqapeykha, keñe kaxwók sekteméssesa ánet apkelyaqyeyáseyak énxet'ák ahagkok. 11 ¡Nágyoho yaqwánxa hetnéssesek ma'a eyapma Esaú! Tamháha ko'o ewáxok hektámegmak keñe elnápok ma'a kelán'ák, tén han sakcha'áletkók nak. 12 Apxeyenmeyk axta exchep hetaqmelchessesek sekweynchámeykha, tén han exámekxak ma'a étawán'ák netámen, ekweykenxal'a ekxámokma xapop ánek ma'a neyáwa wátsam ekwányam, magmowána nak ólyetsetek.”
13 Aptenchek axta han Jacob axta'a m'a, apkelyésáha axta han apnaqtósso yaqwayam elmések aqsa m'a apepma Esaú, 14 doscientos yát'ay apkelwán'ák, veinte axta m'a yát'ay apkelennay'awo, doscientos nepkések apkelwán'ák, tén han veinte m'a apkelennay'awo, 15 treinta yányátnáxeg yetlo m'a apketkók nak, cuarenta weyke, keñe diez weyke yágkelwán'ák, veinte yámelyeheykok kelwán'ák nak, tén han diez ma'a kelennay'awo nak. 16 Keñe axta apkelmésa chá'a apkeláneykha élánamáxkoho chá'a apnaqtósso apkexpánchesso, aptáhak axta apkeláneya s'e:
—Kólxeg sa' kélmonye'e, makhawók kélmók sa' eyke kóltéhek kélpakhéyak kélnaqtósso.
17 Tén axta aptáha apcháneya apmonye' apxega axta s'e:
—Aptahanya'ak sa' agkok ma'a eyapma Esaú, apkelmaxneyáha sa' agkok yaqsa wesse' apagkok, háxko apmahágkaxa, yaqsa eknaqtósso xa kélpakhégko nak, 18 etne sa' yátegmowágkok se'e: Xeyep apkelxawe naqsa s'e wesse' ahagkok Esaú, Jacob apkelaphássesso, aptáha nak xép apchásenneykha, apxegakmo nak nentámen.
19 Aptáhak axta han apkeláneya m'a axayók axta apkeláphasso, cham'a apyókxoho appakhéyak axta kélnaqtósso:
—Kélwet'ak sa' agkok Esaú, sa' kóltéhek han kólának ma'a, 20 kólteme sa' han kólának se'e: Apxegakmek nentámen negko'o m'a Jacob, aptáha nak xép apchásenneykha.
—Hakte axta entáhak élchetamso apwáxok Jacob se'e: “Amasséssesek sa' ko'o aplo séláphássesa m'a sélmésso naqsa nak, keñe sa' óthok ahagko'. Keñe sa' tásek katnehek sema takha'.” 21 Amonye' axta kelxegak ma'a aqsok apkeláphasso apkelmésso naqsa, aptenchek axta eyke axta'a m'a appakxanma nak.
Jacob apkelnápomap Dios apchásenneykha
22 Apxatakha'ak axta Jacob xa axta'a nak, apnaqlókek axta m'a ánet apnaqteyegka'a nak tén han ma'a ánet apkelásenneykha kelwán'ák nak, yetlo m'a once apketchek, apkelyeykhásekxeyk axta m'a wátsam Jaboc, éttakhexa nak, 23 yetlo m'a ekyókxoho aqsok ekyetnakxa nak. 24 Apxakko' axta aphákxak Jacob ma'a, apwa'ak axta han aphakxa xama énxet, apkelnápeykpek axta ekwokmoho élsaka, 25 xama axta mexnawo Jacob ma'a énxet nak, aptekpagkassek axta awhak apyók, leyáxkok axta han awhak apyók ma'a Jacob neyseksa apkelnápomap. 26 Keñe axta énxet aptáha s'e:
—Heyenyekxa', kelsake'.
—Mayenyekxék eyke m'a mexéna enxoho hepasmok, —axta aptáhak Jacob apchátegmowágko.
27 —¿Háxko apwesey exchep? —axta aptáhak ma'a énxet nak.
—Jacob ko'o sekwesey —axta aptáhak apchátegmowágko m'a.
28 Keñe axta énxet aptáha apcháneya s'e:
—Kamaskok sa' kaxwók xép apteme apwesey Jacob. Israel sa' kaxwók xép etnehek apwesey, hakte apkelnápeykpek Dios, tén han ma'a énxet'ák, apyeykhássekmók han apyennaqte.
29 —Héltennés kaxwók xép apwesey —axta aptáhak apkelmaxneyáncha'a Jacob.
Aptáhak axta énxet apchátegmowágkokxo s'e:
—¿Yaqsa ektáha sélmaxneyáncha'a nak sekwesey?
Yetlókok axta han apxeyenma kataqmelek apha m'a. 30 Penuel axta aptemessásak ekwesey Jacob xa yókxexma nak, hakte axta aptáhak se'e: “Ekwet'ak ko'o Dios ahaqta'ák ahagko', makke watsapak.”
31 Tekkek axta ekhem apxega Jacob apkeñama m'a Penuel; apyaqteyágkek axta eyke apxega eñama ekleyamaxche awhak apyók. 32 Cháxa keñamak meteykegko nak énxet'ák Israel aqsok áhak eywok, ekwokmoho makham se'e kaxwo' nak, hakte kéltekpagkassegkek axta Jacob xa ekpayhókxa nak.
© © Enxet Lengua Sur Bible © Paraguayan Bible Society, 2015.