Kelán'a éleñama mók apkelókxa kélántekkesso
1 Apwakhegwokmek axta apxámokma israelitas énxet tén han kelán'ák, sakcha'a apkellekxagweyncha'a, neyseksa apkelmaxnagko Esdras, tén han apkelekxagweykha apxéna apkeltémakxa m'a énxet'ák, tén han neyseksa apkeltekxekxo aptapnák ma'a apmonye' nak Dios tegma appagkanamap apagkok. 2 Keñe axta Secanías, Jehiel axta apketche, Elam axta aptáwen neptámen, aptáha apcháneya Esdras se'e: “Mólyaheykekxak negko'o m'a Dios egagkok, hakte nélmeykegkek nentamheykegko ennaqteyegka'a m'a kelán'a megkatnaha nak nempeywomo xamo', éleñama nak apheykegkaxa m'a énxet'ák melya'áseyak nak Dios. Yetneyk eykhe makham yaqwayam kólásekhekxohok ma'a israelitas. 3 Óltennaksek sa' Dios ólántekkesek ekyókxoho m'a kelán'ák yetlo étchek, megkatnaha nak nempeywomo xamo', keñe sa' kalanaxchek ma'a segánamakxa, sẽltennassama nak chá'a exchep, tén han ma'a apkelyeheykekxoho nak chá'a Wesse' egegkok segánamakxa apagkok. 4 Yempekxa néten, hakte cháxa ekpayhémo nak xép yaqwayam elának xa, ampasmok sa' negko'o. Ewasqápekxoho, elána aptamheykha.”
5 Apkempákxeyk axta néten Esdras, apkeltamhók axta elanagkok aqsok apmáheyo elanagkok ma'a apkelámha apmonye'e nak apkelmaxnéssesso Dios énxet'ák apagkok, tén han levitas, tén han apyókxoho israelitas, apkelxénchek axta han elanagkok. 6 Tén axta Esdras aptepa m'a Dios tegma appagkanamap apagkok nak, apmeyákxo m'a kañe' aphakxa axta Johanán, Eliasib axta apketche, aptenakxa axta han axta'a meyke apto, tén han apyá xama enxoho, hakte kelapwokmók agko' axta apwáxok eñama melyaheykekxa Dios ma'a apkelweykta axta makham kélnaqleykekxa axta megkatnahakxa apkelókxa.
7 Keñe axta kélwónencha'a apyókxoho m'a apheykha axta Judá, tén han Jerusalén, yaqwayam yaqnekxak apyókxoho Jerusalén ma'a apkelweykta axta makham kélnaqleykekxa megkatnahakxa apkelókxa'. 8 Keñe axta apkelámha apmonye'e tén han appasmeykha nak chá'a apkeltamheykha, apxéna kólyementók chá'a xapop ma'a apyókxoho mewayam nak chá'a ántánxo ekhem ma'a, keñe han kólántekkesek apheykegkaxa m'a apkelweykta axta makham kélnaqleykekxa megkatnahakxa apkelókxa. 9 Apchaqnákxeyk axta apyókxoho apkelennay'a apkeleñama nak Judá, tén han Benjamín ma'a Jerusalén, ekhem veinte, aptáhakxa axta nueve pelten, cham'a eksawheyxchexa axta ántánxo ekhem. Apháha axta apyókxoho m'a eyáxñe nak Dios tegma appagkanamap apagkok, apkelpexyenegkek axta apkelaka m'a ektáhakxa axta apkellege, tén han eñama ekmámeye. 10 Keñe axta apkempákxo néten ma'a Esdras, apteme axta apkelmaxnéssesso Dios énxet'ák apagkok, aptáhak axta apkeláneya s'e:
—Kélláneykegkek kéxegke megkólya'assáxma kélmeykegko m'a kelán'a megkatnaha nak kélpeywomo xamo', kélyánchessáseykegkók apkelsexnánémap ma'a énxet'ák Israel. 11 Kólya'ásegwakxoho kéxegke kélteme kélsexnánémaxche s'e nápaqto' nak Wesse' egegkok, Dios apagkok nak kélyapmeyk, kóllána chá'a m'a apmopmenyého nak Wesse' egegkok, nágkólpaxqaha kaxwók ma'a énxet'ák melya'áseyak nak Dios, tén han se'e kelán'ák megkatnaha nak kélpeywomo xamo'.
12 Aptáhak axta apkelyennaqtésawo apkelpeywa apkelátegmowágko apyókxoho énxet'ák se'e:
—Anlának sa' ma'a apkeltamhókxa nak antéhek. 13 Nenxámok eyke negko'o, megkamassak han ekmámeye, mogwanchek negko'o aghakha aqsa s'e meykexa nak negyexanmomakxa, háwe han yaqwatakxoho s'e nenlana nak, hakte nenxámok negko'o nenlánéyak nak se'e mólya'assáxma nak. 14 Tásek eyke ko'óneyk elhekxak apkelámha apmonye'e egagkok nak negko'o s'e, yaqwayam enxoho henlánekxések negko'o amya'a, keñe sa' apyókxoho apheykha nak tegma apkelyawe egagkok, tén han apkelméyak nak kelán'ák megkatnaha nak apkelpeywomo xamo', elmeyenták ekhem ekxénáxchexa enxoho, yetlo apkelxegexma'a m'a apkelámha apmonye'e nak chá'a tegma apwányam apagkok, tén han ma'a énxet'ák segyekpelchémo, ekwokmoho ekmassa sẽltaqnawéyak negko'o m'a Dios egagkok, eñama nenlane xa.
15-16 Apyókxoho axta leyawok apkelwáxok ektáha axta apkelweykekxa makham kélnaqleykekxa axta megkatnahakxa apkelókxa etnahagkok xa ektáha nak, keñe axta Jonatán memako etnehek xa ektáha nak, Asael axta apketche, tén han ma'a Jahazías, Ticvá axta apketche, apkelweyhenákxók axta han ma'a Mesulam, tén han Sabtai, apteme axta levita. Keñe axta apkelmaxnéssesso Dios énxet'ák apagkok Esdras apkelyésencha'a yaqwayam etnehek apkelxegexma'a nápakha énxet, apteme axta chá'a apkelámha apmonye'e apagkok ma'a apnámakkok apagko' nak, apchaqnákxeyk axta han émha amonye' ekhem ma'a aptáhakxa axta diez pelten, cham'a apyókxoho apkelyésamap axta, yaqwayam enxoho elxének yaqwánxa etnéssesek ma'a aqsok élánamáxche nak. 17 Appenchásegkek axta han apkelánéyak amya'a émha amonye' ekhem ektáhakxa axta apkemha apmonye' pelten, apkelxeyenma m'a ektémakxa axta chá'a apkelméyak kelán'ák megkatnaha nak apkelpeywomo xamo' ma'a apyókxoho énxet'ák nak.
18 Keso apkelmaxnéssesso Dios énxet'ák apagkok ekwetamaxche axta apkelméyak kelán'ák megkatnaha apkelpeywomo xamo' se'e:
Maaseías, Eliezer, Jarib, tén han Gueladías, Josué axta aptawán'ák neptámen, Josadac axta apketche, tén han ma'a apnámakkok nak, 19 apkelxeyenmeyk axta ekxeygkok apnaqteyegka'a xa, tén axta apméssama nepkések apkennawo', yaqwayam etnehek apmésso naqsa aqsok eñama melya'assáxma.
20 Hananí, tén han Zebadías, Imer axta aptawán'ák neptámen.
21 Maaseías, Elías, Semaías, Jehiel, tén han Ozías, Harim axta aptawán'ák neptámen.
22 Elioenai, Maaseías, Ismael, Natanael, Jozabad, tén han Elasá, Pashur axta aptawán'ák neptámen.
23 Jozabad, Simí, Quelaías (cham'a Quelitá), Petahías, Judá, tén han Eliézer, apkeleñama axta nepyeseksa m'a levitas aptawán'ák neptámen.
24 Tén han ma'a Eliasib, apkeñama axta nepyeseksa m'a apkelmeneykmassamo nak,
Salum, Télem, tén han Urí, apkeleñama axta nepyeseksa m'a apkeltaqmelchesso nak atña'ák.
25 Keso pók israelitas ekhémo axta han apkeltémakxa s'e: Ramías, Jezías, Malquías, Mijamín, Eleazar, Malquías, tén han Benaías, Parós axta aptawán'ák neptámen.
26 Matanías, Zacarías, Jehiel, Abdí, Jeremot, tén han Elías, Elam axta aptawán'ák neptámen.
27 Elioenai, Eliasib, Matanías, Jeremot, Zabad, tén han Azizá, Zatú axta aptawán'ák neptámen.
28 Johanán, Hananías, Zabai, tén han Atlai, Bebai axta aptawán'ák neptámen.
29 Mesulam, Maluc, Adaías, Jasub, Seal, tén han Ramot, Baní axta aptawán'ák neptámen.
30 Adná, Quelal, Benaías, Maaseías, Matanías, Besalel, Binuy, tén han Manasés, Pahat-moab axta aptawán'ák neptámen.
31 Eliézer, Isías, Malquías, Semaías, Simeón, Harim axta aptawán'ák neptámen, 32 tén han Benjamín, Maluc, tén han ma'a Semarías.
33 Matenai, Matatá, Zabad, Elifélet, Jeremai, Manasés, tén han Simí, Hasum axta aptawán'ák neptámen.
34 Keñe axta Baní aptawán'ák neptámen: cham'a Madai, Amram, Uel, 35 Benaías, Bedías, Queluhu, 36 Vanías, Meremot, Eliasib, 37 Matanías, Matenai, tén han Jaasai.
38 Keñe axta Binuy aptawán'ák neptámen: cham'a Simí, 39 Selemías, Natán, Adaías, 40 Macnadbai, Sasai, Sarai, 41 Azarel, Selemías, Semarías, 42 Salum, Amarías, tén han José.
43 Keñe axta Nebo aptawán'ák neptámen: cham'a Jeiel, Matatías, Zabad, Zebiná, Jadau, Joel, tén han Benaías.
44 Cháxa apyókxoho apkelméyak axta kelán'ák megkatnaha apkelpeywomo xamo', apkexeygkek axta eyke apkeláphassama yetlo étchek.
© © Enxet Lengua Sur Bible © Paraguayan Bible Society, 2015.