Wesse' egegkok élseyéxma apagkok ektaxnegweykta makham tegma appagkanamap
1 Éntamákxeyk axta átog ekpayho nak teyapmakxa ekhem ma'a énxet nak, 2 ekwet'ak axta ekxegakmo Israel Dios apagkok élseyéxma apagkok ma'a ekpayho nak teyapmakxa ekhem. Nenleg'awók axta nahan éxtegyawa ekyennaqte agko', máxa axta m'a wátsam ekyennaqtél'a ekpáwà awáxok yegmen ényé, keñe axta m'a xapop nak keltátchessek axta. 3 Hawók axta nahan sekweteya axta ko'o xa aqsok nak, cham'a apkexyeykmo axta Wesse' egegkok apmáheyo émasséseták ma'a Jerusalén, tén han sekweteya axta m'a nekha wátsam Quebar nak. Éltekxekkek axta etapnák xapop ekwokmoho sektekxeya ekpayhakxa nahát xapop, 4 taxneyk axta Wesse' egegkok élseyéxma apagkok ma'a tegma appagkanamap, ekpayho nak átog teyapmakxa ekhem.
5 Émpásekxeyk axta néten ma'a Dios apmopwána, éntamákxeyk axta m'a étkok apwáxok nak tegma, ekwet'ak axta Wesse' egegkok élseyéxma apagkok eklanawo m'a kañe' tegma appagkanamap. 6 Apkenmáha axta ekpayhókxa ko'o sénmágkaxa m'a énxet nak, ekleg'ak axta nahan sepaqhetchesa ko'o Wesse' egegkok ma'a kañe' nak tegma appagkanamap, 7 aptáhak axta seyáneya s'e: “Keso ekyetnamakxa ko'o sektaháno ekyawe ektaqmalma s'e, sektémakxa chá'a wesse' apwányam; sa' axek chá'a nepyeseksa énxet'ák Israel meyke néxa s'e. Metwasha sa' chá'a kaxwók sekwesey ektaqmalma m'a, tén han ma'a kelwesse'e apkelwányam apagkok nak, eñama seyamasma: kamaskok sa' elánésagkok chá'a takhaxpop apagkok ma'a kelwesse'e apkelwányam apagkok, cham'a apkeletsapa enxoho chá'a, 8 essenhan elánésagkok chá'a tegma apkelyawe apagkok yaqwayam enxoho kaxnagkohok chá'a xamók atña'ák apagkok ma'a apatña'ák nak ma'a tegma appagkanamap ahagkok, wánxa aqsa xama nápakha m'a nepyeseksa nak. Aptawáseykha sekwesey ektaqmalma m'a, apkeláneykegko m'a aqsok megkaleklamakxa nak ko'o ewáxok; cháxa keñamak séltaqnaweykegko nak ko'o m'a tén han sélnápeykekxo. 9 Sa' agkok ko'o heyenyáwak kaxwo' tén han meláneságko enxoho kaxwók takhaxpop apagkok ma'a kelwesse'e apkelwányam apagkok, axek sa' chá'a ko'o nepyeseksa meyke néxa m'a. 10 Xép akke énxet, eltennasha israelitas ektáhakxa apwete m'a tegma appagkanamap, tén han ma'a ekwánxa appayhakxa tén han apwenaqte, yaqwayam sa' kalmegqaksek ma'a apkeltémakxa melya'assáxma. 11 Kelmegqássek sa' agkok ma'a ekyókxoho aqsok apkelánéyak nak chá'a, eltennés sa' aptémakxa m'a tegma appagkanamap tén han aqsok ekhéyak nak ma'a, cham'a nenteyapmakxa nak tén han ma'a nentaxnamakxa nak chá'a, tén han ma'a ekyókxoho apwánxa nak apyawe, ekhawo nahan ma'a segánamakxa eyeyméxko nak chá'a elanagkok. Eleykmássessesha sa' ekyókxoho s'e yaqwayam sa' kataqmelek apkelya'áseykegkoho aptémakxa, tén sa' elanagkok. Enaqtáxéssesák sa' nahan ekyókxoho m'a segánamakxa yaqwayam sa' elepwának elanagkok. 12 Keso segánamakxa apagkok tegma appagkanamap se'e: Katnehek sa' ekpagkanamaxchexa m'a xapop ekwakhaya nak nepyáwa m'a tegma appagkanamap, cham'a néten egkexe nak.”
Ekwatnamáxchexa aqsok
13 Keso ekweykenxa axta ekyawe m'a ekwatnamáxchexa nak aqsok, kélhéssamok axta m'a ekweykenxa axta m'a nano' nak. Máxek axta nahan yetnók nekhaw'ék ma'a ekwatnamáxchexa nak aqsok, náxet metro axta nahan élmattawóneg ma'a tén han náxet metro m'a ekpayhakxa, cham'a élyephagweykmoho axta nahan nekhaw'ék yókxexma veinticinco centímetros ekmahéyak ma'a néten. Axta entemék awhak ekwatnamáxchexa nak aqsok se'e: 14 xama metros axta ekmahéyak néten eyeynamo m'a kañe' máxek nak ekweyktámho m'a nekhaw'ék yókxexma nak awhak. Náxet metro axta nahan yephagweykmohok néten ma'a yókxexma nak. Keñe m'a neyseksa ekyetno nak ekweykmo nahan ánet metros ekwenaqte m'a néten, náxet metro axta nahan yephagweykmohok ma'a néten. 15 Keñe m'a néten nak, kélwatnamakxal'a chá'a m'a aqsok kélnaqtósso ektekyawa, ekweykmo ánet metros ekwenaqte ekmahéyak ma'a néten. Cuatro élámha élmahantakcha'a axta nahan kelámhak ma'a néten nak. 16 Cuatro nekhaw'ék axta nahan ma'a néten nak ekwatnamáxchexa aqsok, seis metros axta chá'a m'a xama nekha. 17 Keñe axta nahan cuatro nekhaw'ék ma'a neyseksa ekyetno nak, siete metros axta chá'a m'a xama nekha. Keñe m'a máxek ekyetno axta m'a nekhaw'ék, ektáha náxet metro m'a ekpayhakxa, keñe m'a nekhaw'ék élámha axta, ektáha veinticinco centímetros ma'a ekpayhakxa. Teyapmakxa ekhem axta nahan heykegkok ma'a nélyetlamakxa néten nak negchántamakxa m'a ekwatnamáxchexa aqsok.
18 Keñe axta aptáha seyáneya Wesse' egegkok se'e: “Wokmek sa' agkok ekhem yaqwánxa kalanaxchek ma'a ekwatnamáxchexa nak aqsok, tásek sa' kalanaxchek se'e segánamakxa nak: Kólwatnek sa' néten ekwatnamáxchexa aqsok ma'a xama aqsok kéltósso, yaqwayam kólteméssesek aqsok ekwatnamáxche, keñe sa' kólexpaqheykha éma m'a ekwatnamáxchexa nak aqsok. 19 Keñe sa' ma'a appasmo nak apkelmaxnéssesso Dios énxet'ák apagkok Leví énxet'ák apagkok, Sadoc aptawán'ák neptámen nak, apmopwancha'a nak chá'a ko'o hépetchegwakxohok elanagkok apkeltamheykha m'a sekhakxa, kólmések sa' xama weyke kennawók étkok yaqwayam etnéssesek aqsok ektekyawa ekyaqmageykekxa nak megkólya'assáxma. Ko'o séltémo, sektáha nak Wesse'. 20 Keñe sa' natámen emok ketsék éma agkok, elexpaqheykha sa' ma'a cuatro élámha élmahamtakcha'a nak, cham'a cuatro máséyak nak ma'a ekyetno nak neyseksa tén han ma'a ekyókxoho nekhaw'ék élmahéyak nak néten. Keñe sa' yáxñásekxak chá'a ekyókxoho m'a ektémakxa nak megkólya'assáxma. 21 Keñe sa' natámen emok ma'a weyke kennawók étkok kélmésso nak ekyaqmageykekxa megkólya'assáxma, ewatnegwók sa' ma'a yókxexma teyp nak tegma appagkanamap, kéllánessamakxa axta chá'a yaqwayam kalanaxchek xa ektéma nak. 22 Keñe sa' mók ekhem egkések kéltósso ektekyawa ekyaqmageykekxa megkólya'assáxma m'a xama yát'ay apketkok meyke nak ekmaso apyókxa, keñe sa' appasmo apkelmaxnéssesso Dios énxet'ák apagkok etnehek emópeyásekxak néten ekwatnamáxchexa aqsok ma'a apteméssesakxa exchek ma'a weyke kennawók étkok éma agkok nak. 23 Appenchessek sa' agkok apkelane xa kélaxñáseykekxa nak kéltémakxa megkólya'assáxma, emok sa' xama weyke kennawók étkok tén han xama nepkések apkennawo', meyke nak ekmaso ekyókxa xama xa ánet nak, 24 keñe sa' hélmések. Elexpaqheykha sa' yásek ma'a appasmo nak apkelmaxnéssesso Dios énxet'ák apagkok tén sa' elwatnek, etnéssesek sa' aqsok élwatnamáxche ahagkok ko'o. 25 Yókxoho ekhem sa' chá'a egkések kéltósso ekmatñá ekyaqmageykekxa nak megkólya'assáxma m'a xama yát'ay apketkok, ekweykmoho siete ekhem, tén han ma'a xama weyke kennawók étkok tén han ma'a nepkések apkennawo', meyke nak ekmaso ekyókxa m'a ekyókxoho nak. 26 Emópeyásekxak sa' chá'a ekyókxoho appasmo nak apkelmaxnéssesso Dios énxet'ák apagkok ma'a ekwatnamáxchexa nak chá'a aqsok, yókxoho ekhem ekweykmoho siete ekhem, yaqwayam sa' etnéssesek chá'a kélmeykha ekpagkanamaxche'. 27 Sa' etnéssesek chá'a ekweykmoho siete ekhem xa ektáha nak, keñe sa' ma'a ektáha enxoho ocho ekhem, yeynhok chá'a elmések ma'a kélnaqtósso yaqwayam nak chá'a kólwatnek tén han ma'a kélnapma nak chá'a ekyaqmageykekxa m'a nélásekhamaxchekxoho. Keñe sa' almok ko'o takha' kéxegke yetlo ekleklamo ewáxok. Éltennássek ko'o xa sektáha nak Wesse'.”
© © Enxet Lengua Sur Bible © Paraguayan Bible Society, 2015.