1 Tén axta aptáha seyáneya s'e: “Xép aptáha nak énxet, etow sa' se'e eknaqtáxésamaxche nak, tén sa' exog elpaqhetchessók ma'a énxet'ák Israel.”
2 Ekmayhak axta ko'o, keñe seyágko m'a weykcha'áhak eknaqtáxésamaxche nak. 3 Tén axta aptáha seyáneya s'e: “Enaqsep kaxwók se'e weykcha'áhak ekpeywa sekmésa nak, elanaksohok sa' apwokmo eyaqkanmoho'.”
Ektókek axta ko'o m'a, atsók agko' axta nahan sektawa, hawók axta ekmátsa m'a ekweykenxal'a yányawhéna' apyegmenek. 4 Keñe axta aptáha seyáneya s'e: “Exeg, eltennés sa' énxet'ák Israel se'e séltamho nak eltennaksek. 5 Magwaphásak ko'o exchep yaqwayam emhagkok ma'a xama apchókxa apheykegkaxa nak énxet magya'áseyak ektémakxa apkelpeywa essenhan ma'a ekmáske nak agya'asagkohok ektémakxa, akke eyáphásak ko'o exchep ma'a énxet'ák Israel apchókxa nak. 6 Magwaphásak ko'o exchep yaqwayam emhagkok ma'a apheykegkaxa nak énxet'ák apxámokma, apkelpaqmeyesma nak nempeywa magya'áseyak ektémakxa tén han ekmáske nak agya'asagkoho', megkapwagko nak xép. Megkeyxek eyke nahan elyahakxohok xeyep, seyáphasa enxoho ko'o nepyeseksa xa énxet'ák nak. 7 Keñe m'a énxet'ák Israel megkalyaqwomagkehek sa' elyahakxohok xeyep, hakte megkalyaqwámeykegkok ko'o hélyahakxohok ma'a. Kalyéha'ak apkelwáxok ma'a apyókxoho énxet'ák Israel, megyeyxók nahan amya'a. 8 Axnéshok sa' eyke ko'o exchep aptamheykegkaxa nak élyennaqte apkelwáxok ma'a tén han megyaháxenmo amya'a. 9 Eynnaqtések sa' ko'o exchep, axnéshok sa' ma'a ekweykenxal'a ekyennaqte meteymog ektaqmalma ekyennaqtél'a, ekyeykhágweykmohol'a ekyennaqte m'a meteymog agko' nak. Nágye' aqsa, ná égwe aqsa m'a megyésa enxoho elano', hakte kalyéha'awók agko' apkelwáxok ma'a.”
10 Tén axta aptáha seyáneya s'e: “Etaqmelchesho apháxenmo ekyókxoho sekmako nak altennaksek, epekken sa' apwáxok. 11 Etyánegwakxoho sa' apkelenyémeyo xamo' apheykencha'a nak ma'a yókxexma meykexa énxet, lapmaxcheyk sa' kexa elyahakxoho' essenhan melyahakxe'. Sa' etnehek elának se'e: ‘Keso aptáhakxa exchek appeywa Wesse' egegkok se'e.’”
12 Tén axta sémpásekxo néten ma'a Dios apmopwána, ekleg'ak axta nahan éxtegyawa ekyennaqte agko' ma'a netámen, máxa axta m'a ektémól'a xóp ekyawheykha, ekmeyákxo néten ma'a Wesse' egegkok élseyéxma apagkok. 13 Axta kextegyawásak éltekpagákxo chá'a mók apxempenák ma'a apho nak énxet, tén han ma'a ekho yátnáxeg apyenyawasso amagkok ekhéyak axta nápakhaw'ék; hawók axta éxtegyawà m'a ektémól'a xóp ekyawheykha ekyawe. 14 Émpásekxeyk axta néten ma'a Dios apmopwána, etekkessek axta m'a, ekxegkek axta ko'o yetlo ekmayósa ewáxok tén han eklo, apmágkek axta ekyennaqte agko' émek ma'a Wesse' egegkok. 15 Ekwokmek axta m'a Tel Abib, neyáwa nak ma'a wátsam Quebar, apheykegkaxa axta m'a énxet'ák Israel kélántekkesso apkelókxa, siete ekhem axta nahan sekha nepyeseksa m'a, meyke sekya'áseyak aqsok yaqwayam alána' tén han axének.
Dios apteméssesso apkelhaxneykha Ezequiel
(Eze 33.1-9)16 Wokmek axta siete ekhem, ey'aweykteyk axta ko'o m'a Wesse' egegkok, aptáhak axta seyáneya s'e: 17 “Xép, énxet, ekteméssessek ko'o exchep apkeleyxcháseykha m'a énxet'ák Israel. Éltennássek sa' agkok chá'a exchep xama amya'a, ellegaksek sa' chá'a m'a sekpeywa, yaqwayam sa' ellegak chá'a. 18 Ekxénchek agkok ko'o yetsapok xama énxet ekmaso nak aptémakxa; agkok epaqhetchásak xép xa énxet ekmaso nak aptémakxa, tén han mepaqhetchesa enxoho yának eyenyekxak apkelane m'a aptémakxa ekmaso, yaqwayam enxoho elenxanmagkohok apweynchámeykha, yetsapok sa' yetlo mey'assáxma xa énxet nak, keñe sa' ko'o axének xép ektáha apsexnenagko apketsapma. 19 Appaqhetchessek agkok xép ma'a énxet ekmaso nak aptémakxa, keñe meyenyekxék ma'a aptémakxa ekmaso, melwataksek nahan apkelane m'a aqsok ekmaso, yetsapok sa' yetlo apkelane mey'assáxma xa énxet nak, keñe sa' xép ewagkasakpok teyp. 20 Apyensakmek agkok aptémakxa ekpéwomo xama énxet appéwomo, apkelánekxo enxoho aqsok ekmaso; keñe élxegkesa enxoho ko'o atlápagkasek, agkok xép epaqhetchásak, yetsapok nahan xa énxet nak. Megkaxénwakxók sa' nahan ko'óxa ewáxok ektémakxa axta aqsok ektaqmela apkelane, yetsapok sa' eñama mey'assáxma, xeyep sa' eyke axének ektáha apsexnenagko apketsapma. 21 Appaqhetchessek agkok xép yának melánhek mey'assáxma xa énxet nak, agkok elanak ma'a, elenxanmagkohok sa' apweynchámeykha, hakte apkelyahákxók ma'a ektáhakxa appaqhetchesso, tén sa' xép ewagkasakpok teyp.”
Ezequiel ekteme meyke appeywa
22 Axta appekkenak ko'o apmek tekhéxet Wesse' egegkok ma'a. Aptáhak axta seyáneya s'e: “Etnemekxa néten, emhók sa' ma'a ekpayhegweykenxa nak xapop, sa' apaqhetchesek xép ma'a.” 23 Émpákxeyk axta ko'o néten, ekmahágkek axta m'a ekpayhegweykenxa nak xapop yókxexma, ekwetágwokmek axta nahan Wesse' egegkok élseyéxma apagkok ma'a, hawók axta m'a sekwetágwokmo axta neyáwa wátsam Quebar. Ekháxahánteyk axta ekwokmoho sektekxeya ekpayhakxa nahát xapop, 24 taxneyk axta eyke ewáxok ma'a Dios apmopwána, émpásekxeyk axta néten. Tén axta aptáha sepaqhetchesa Wesse' egegkok se'e: “Etaqhoho, etaxnegwakxa sa' kañe' apxagkok, yápekxoho sa' átog. 25 Elano, peyk kóltétek xép táma', yaqwayam sa' megyepwánhek etyapok tén han exek nepyeseksa m'a énxet'ák. 26 Wának sa' nahan ko'o keypetchekxak apaxkok ma'a apaqpehek tén sa' katnehek meyke appeywa. Mopwanchek sa' chá'a elpaqhetchesek, hakte énxet élyennaqte apkelwáxok ma'a. 27 Keñe sa' ma'a sekmako enxoho chá'a ko'o altennaksek xama aqsok, atekkessásekxak sa' chá'a appeywa, tén sa' etnehek chá'a elának se'e: ‘Keso aptáhakxa exchek appeywa Wesse' egegkok se'e.’ Énxet apmáheyo enxoho yeyxho', yeyxhok sa', keñe sa' ma'a memáheyo nak yeyxho', megyeyxók sa'. Hakte énxet élyennaqte apkelwáxok ma'a.
© © Enxet Lengua Sur Bible © Paraguayan Bible Society, 2015.