Kélnaqtósso életsapma Egipto
1 Keñe axta Wesse' egegkok aptáha apcháneya Moisés se'e:
—Emyekxa sa' aphakxa faraón, sa' etnehek yának se'e: ‘Exchek aptáhak appeywa Wesse' egegkok, aptáha nak hebreos Dios apagkok se'e: Yoho elxog énxet'ák ahagkok, yaqwayam enxoho hélpeykesho'. 2 Sa' agkok ya'awok elxog, apkelenxanakmoho enxoho makham apmássesséyak yaqwayam elxog, 3 etegkesek sa' apmopwána Wesse' egegkok neyseksa m'a apnaqtósso élleykha nak yókxexma, katyapok sa' nahan negmasse ekyentaxno agko'. Eletsapok sa' ma'a yátnáxeg, yámelyeheykok, yányátnáxeg, weyke tén han ma'a nepkések. 4 Mexnésók sa' eyke Wesse' egegkok apteméssesakxa aqsok kélnaqtósso nak Israel ma'a apteméssesakxa sa' ma'a aqsok kélnaqtósso nak Egipto, yaqwayam sa' megkatsephek xama enxoho aptósso m'a israelitas.’
5 Appekkenchek axta nahan ekhem yaqwánxa katnehek Wesse' egegkok xa. Aptáhak axta s'e:
—Saka sa' ko'o alának xa.
6 Mók ekhem axta nahan entáhak, apkelanak axta Wesse' egegkok ma'a aqsok apxeyenma elána'. Keletsekkek axta ekyókxoho apnaqtósso m'a egipcios, keñe axta m'a israelitas apnaqtósso méko axta xama enxoho étsapma. 7 Apkeltamhók axta kólteyánegkessekxohok faraón ma'a kélnaqtósso nak Israel, wetáxcheyk axta nahan méko xama enxoho étsapma kéltósso m'a. Apyennaqtéssek axta aqsa makham apwáxok, maxta ya'awok elxog ma'a israelitas.
Énxet'ák Egipto kélhe tasqapma
8 Keñe axta Wesse' egegkok aptáha apkeláneya Moisés tén han Aarón:
—Kólma sa' táhap xama táxa axagkok, xama kélmek sa' chá'a kóltéhek, tén sa' Moisés yexpánchesek ekxák néten nápaqtók ma'a faraón. 9 Ánek agko' sa' katnekxak ma'a táhap nak, kasawhekxohok sa' ekpánma m'a ekyókxoho kañe' apchókxa, kalántekkesek sa' nahan apyempe'ék tasqapma m'a apyókxoho énxet'ák tén han aqsok kélnaqtósso m'a Egipto.
10 Apkelmágkek axta táhap xama táxa axagkok ma'a Moisés tén han Aarón, keñe apkelxega apteyánegwákxoho m'a faraón. Yetlókok axta nahan apkexakha néten Moisés ma'a táhap, kelántépegkek axta nahan apyempe'ék tasqapma m'a énxet'ák tén han ma'a aqsok kélnaqtósso. 11 Keñe m'a énxet'ák apmopwancha'a axta nahan chá'a etekkesek aqsok, mopwancha'ak axta apmako elanagkok nápaqtók ma'a Moisés, hakte hawók axta nahan ektáhakxa m'a apyókxoho nak egipcios, tamhágkek axta nahan tasqapma. 12 Wesse' egegkok axta eyke nahan apyennaqtéssesso apwáxok ma'a faraón, tén han meltémo elyahakxohok ma'a Moisés tén han Aarón, ekhawo m'a aptémakxa axta chá'a apkeltennasso Wesse' egegkok Moisés yaqweykenxa chá'a katnehek.
Yegmen élyennaqte élyawe ektéyam Egipto
13 Aptáhak axta Wesse' egegkok apcháneya makham Moisés se'e:
—Exatakha sa' axto'ók agko', tén sa' exog etnehek yának faraón se'e: ‘Exchek aptáhak appeywa apcháphássesso Wesse' egegkok, aptáha nak hebreos Dios apagkok se'e: Yoho elxog énxet'ák ahagkok, yaqwayam sa' hélpeykesho'; 14 hakte keso kaxwo nak, aláphaksek sa' ko'o ekyókxoho mók ektémakxa aqsok nenlegeykegkoho aphakxa exchep, tén han ma'a apkeláneykha, ekweykekxoho m'a énxet'ák apagkok, yaqwayam sa' ey'asagkohok xép, méko pók sekhawo ko'o ekyókxoho nak keso náxop. 15 Kaxtemék ko'o sélenxanmeykegkoho sekxekmósso sekmowána tén han seklegassáseykegkoho exchep, tén han ma'a énxet'ák apagkok seyheykekxa chá'a m'a xama aqsok ekmaso nenlegeykegkoho nak, nanók axta kamassegwók kélwetamaxche keso náxop; 16 eyhayók eyke aqsa ko'o apha makham xeyep se'e kaxwo' nak yaqwayam enxoho étak chá'a m'a ekwánxa sekmowána, tén han yaqwayam kaxénaxchek chá'a sekwesey ekyókxoho keso náxop. 17 Apkelenxanmeykegkok eyke makham xeyep apkelmasma m'a énxet'ák ahagkok, megyahayók nahan elxog. 18 Saka sa' ko'o wának katyamok yegmen élyennaqte élyawe agko', megkótémaxko nak makham kaxhok ektéyam ma'a kañe' Egipto. Sa' kaxhok nahan se'e ekwánxa nak ekhem. 19 Yána sa' kaxwók kólyáqkassekxak apnaqtósso m'a kóneg tegma yaqwayam sa' kalyexanmok, tén han ma'a ekyókxoho élleykha nak ma'a yókxexma, hakte teyekmek sa' agkok ma'a yegmen élyennaqte, kalnápok sa' apyókxoho énxet tén han aqsok kélnaqtósso élleykha nak yáxña'akxoho, keñe sa' ma'a élyáqto nak kóneg tegma méko sa' katnehek.’
20 Apkelakak axta nahan nápakha faraón apkeláneykha apkelleg'a aptáhakxa appeywa apchésso m'a Wesse' egegkok, apkelya'ásekxeyk axta chá'a apkelásenneykha naqsa m'a kóneg tegma tén han ma'a apnaqtósso; 21 yetneyk axta eyke nahan chá'a nápakha metnéssesso naqsók ektáhakxa amya'a apkellege, apcha'awók axta aqsa apkelweynchámeyncha'a apkelásenneykha naqsa m'a yókxexma tén han ma'a apnaqtósso. 22 Tén axta Wesse' egegkok aptáha apcháneya Moisés se'e:
—Ey'és sa' apmek néten, yaqwayam sa' katyamok yegmen élyennaqte nepyeseksa énxet'ák tén han aqsok kélnaqtósso m'a ekyókxoho kañe' Egipto, tén han neyseksa m'a aqsok kélcheneykekxa apkelchéyak nak ma'a egipcios.
23 Apya'ássek axta apmek néten Moisés, tén axta Wesse' egegkok apcháphasa takha', yetlo apkelyenma tén han ma'a yegmen élyennaqte neyseksa xa xapop nak. Axta aqsa nahan aptegkásak yegmen élyennaqte m'a ekyókxoho kañe' Egipto. 24 Meyke néxa axta nahan entáhak ektéyam ma'a yegmen élyennaqte nak tén han ma'a takha' aplo. Maxta nahan kaxnémok chá'a ektéyam Egipto m'a ekwánxa axta ektéyam yegmen élyennaqte élyawe ekyennaqte agko'. 25 Tawáseyha axta ekyókxoho aqsok ekhéyak kañe' Egipto m'a yegmen élyennaqte nak: kelnapchek axta m'a énxet tén han ma'a aqsok kélnaqtósso, tén han ma'a ekyókxoho kélcheneykekxa m'a yókxexma. Kelekkexchek axta nahan ekyókxoho yenta'a élyawe m'a apchókxa nak. 26 Keñe axta m'a Gosen, apheykegkaxa axta m'a israelitas, maxta katyekmok xama enxoho yegmen élyennaqte.
27 Keñe axta faraón apkeltamho kólyentawakxések ma'a Moisés tén han Aarón. Aptáhak axta apkeláneya s'e:
—Ekya'ásegwokmek kaxwók eyesagko sektémakxa. Ko'o keñamak sektémakxa tén han ma'a énxet'ák ahagkok nak, háwe eñama m'a Wesse' kélagkok. 28 Hẽlmaxnésses sa' negko'o kéxegke Wesse' kélagkok yaqwayam enxoho emasseksek se'e takha' apxámokma nak, tén han se'e yegmen élyennaqte ekxámokma negwet'a nak negko'o, tén sa' kamaskok sélmeyawa kéxegke, wohok sa' aqsa kaxwo' kólxog.
29 Aptáhak axta Moisés apchátegmowágkokxo s'e:
—Ektekkek sa' agkok ko'o s'e tegma apwányam nak, alya'aksek sa' néten emék almaxnak ma'a Wesse' egegkok. Tén sa' kamaskok yegmen élyennaqte, kamaskok sa' nahan apha m'a takha', yaqwayam sa' ey'asagkohok xeyep Wesse' egegkok ektáha apagkok xapop. 30 Ekya'ásegkók eyke ko'o makham kéxegke, xép tén han ma'a apkeláneykha nak megkóleka makham ma'a Dios Wesse' egegkok.
31 Sawhéxkók nahan életsapa m'a kélcheneykekxa nak lino yámet, tén han ma'a apho nak hótáhap. Kaxwók axta eykhe apyexnak ma'a apho nak hótáhap, kaxwók axta eykhe nahan kelyapwa'ak ma'a lino yámet. 32 Keñe axta m'a hótáhap apagko' nak tén han ma'a centeno, méko axta ektáhakxa, hakte yehémek chá'a eltektépok ma'a.
33 Xama axta aptepa Moisés ma'a tegma apwányam natámen axta apye'eykekxa m'a faraón, apkelya'ássek axta néten apmék appaqhetchesa Wesse' egegkok. Yetlókok axta anhan ekmasse m'a yegmen élyennaqte, tén han ma'a ekmámeye nak, massék axta nahan apha m'a takha'. 34 Xama axta apwet'a makham faraón ekmassa m'a ekmámeye, tén han ma'a yegmen élyennaqte nak, tén han ekmassa apha m'a takha', apkelánekxeyk axta makham aptémakxa ekmaso. Háwe axta nahan apxakkók apyennaqtésa apwáxok ma'a, apyókxoho axta nahan ma'a énxet'ák ektáha axta apkeláneykha. 35 Apyennaqtéssek axta apwáxok ma'a faraón, maxta ya'awok elxog ma'a israelitas, ekhawo m'a aptémakxa axta apkeltennasso Wesse' egegkok sekxók axta yaqweykenxa chá'a katnehek, apchásenneykekxo axta m'a Moisés.
© © Enxet Lengua Sur Bible © Paraguayan Bible Society, 2015.