Segánamakxa ekxeyenma nak negyaqmagkáseykekxa mók aqsok nentawassáseykha egmók
1 “Apmeñexchek agkok xama énxet wey essenhan xama nepkések, keñe m'a apchaqha enxoho essenhan apyenyawa enxoho ekha ekyánmaga, eyánmagkasek sa' cinco weyke ekyaqmageykekxa m'a xama wey nak, keñe sa' cuatro nepkések ma'a xama nepkések nak.
2 “Kélwetágkók agkok nahan apmenyexakxa xama énxet apmenyexmo nak chá'a, kélyensássek agkok keñe yetsapok, mexénakpek sa' ektáha apmatñà m'a apketsapa enxoho. 3 Eyke m'a ekhem agko' enxoho ekteme xa ektáha nak, exénakpok sa' ektáha apmatñà.
“Eyánmagkasek sa' nahan ekwánxa enxoho ekyánmaga apmeñexma m'a ektáha nak apmenyexma. Méko sa' agkok selyaqye apagkok ma'a, eyenyawakpohok sa' apagko' yaqwayam eyánmagkasek ma'a aqsok apmeñexma.
4 “Wetáxcheyk sa' agkok nahan kéltósso ekmeñexamaxche apyáqkasso m'a apxagkok, tén han megyaqha enxoho, ánet apyánmagkáseykekxoho sa' etnehek, xama wey sa' eykhe katnehek, essenhan yámelyeheykok, essenhan xama nepkések.
5 “Apkexeykxeyk agkok nahan apnaqtósso xama énxet yaqwayam katawagkok pa'at xama yókxexma essenhan ma'a émhakxa nak anmen yámet, keñe ektáswokmo enxoho pa'at apnaqtósso m'a pók énxet yókxexma apagkok nak, kéméxcheyk eyánmagkasek ekyaqmageykekxa ektawassáseykha yókxexma apagkok ma'a ektaqmelakxa agko' nak yókxexma apagkok essenhan ma'a apkeneykekxexa nak anmen yámet apagkok.
6 “Apkelwatneyk agkok nahan táxa xama énxet, keñe ényaha enxoho táxa m'a nepyeseksa pegke, elmétek ma'a hótáhap apaqtek kéláncheseykekxa nak, essenhan ma'a ketók kélnakxamakxal'a apaktek, essenhan ma'a ekyókxoho kélcheneykekxa nak, cháxa énxet nak, eyánmagkasek sa' ekyánmaga ektawáseykha aqsok ma'a táxa.
7 “Apméssek agkok nahan pók énxet eltamhok etaqmelchessesek selyaqye essenhan ma'a aqsok ekmomnáwa nak, keñe kélmeñexchesa enxoho apxagkok xa énxet nak, ánet apyánmagkáseykekxoho sa' etnehek ma'a ektáha nak apmenyexma, kélwetákxo enxoho; 8 sa' agkok kólwetákxak ma'a ektáha nak apmenyexma, kólyentemekxak sa' nápaqtók Dios ma'a ektáha nak apxagkok ma'a tegma, yaqwayam sa' kólya'asagkohok naqsók memenyexchesa pók aqsok ma'a apkeltémo etaqmelchessesek.
9 “Yetneyk sa' agkok nahan xama énxet apkeltemégwayam aqsa chá'a aptósso xama wey, yámelyeheykok, essenhan nepkések essenhan ma'a xama apáwa nentaxno nak, essenhan ma'a mók aqsok élxegányam nak chá'a, keñe apxéna enxoho xama ektáha apagkok ma'a aqsok nak, kólnaqlakxak sa' nápaqtók Dios xa apqánet énxet nak, keñe sa' ekpehewayam enxoho apteme xa, ánet apyánmagkáseykekxoho sa' etnehek egkések ma'a pók nak.
10 “Apméssek sa' agkok nahan pók xama énxet yának elánesha yámelyeheykok aptósso, essenhan wey essenhan ma'a xama nepkések, essenhan ma'a mók aqsok aptósso nak, keñe étsapa enxoho xa aqsok kéltósso nak, essenhan ekyensa enxoho, essenhan ekmenyexáxko enxoho meyke apweteykegkoho xama énxet enxoho, 11 cháxa énxet nak, egkések sa' appeywa ekmámnaqsoho agko' ma'a ektáha nak ótep, yetlo apxeyenma Wesse' egegkok apwesey sa' eltennaksek memenyexchesa aqsok apkeltémo elánesha m'a pók. Elyahakxohok sa' nahan aptáhakxa appeywa m'a ektáha nak ótep, keñe sa' ma'a pók nak meyánmagkasek xama enxoho. 12 Eyke m'a apwetágkoho enxoho ekmenyexáxko nápaqtók ma'a kéltósso nak, eyánmagkasek sa' egkések ma'a ektáha nak ótep. 13 Aqsok nawhak eklo sa' agkok nahan eyaqhe m'a xama aqsok kéltósso, elsakxak sa' axchakkok éleymomáxche exekmóssekxak ma'a ótep, yaqwayam enxoho meyánmagkase'.
14 “Apkelmaxnakkek sa' agkok nahan pók xama énxet yának emássesha sekxók xama aptósso, keñe étsapa enxoho m'a kéltósso nak essenhan ekyensa enxoho meyke apweteykegkoho m'a ektáha nak ótep, eyánmagkasek sa' eñama aptawassáseykha pók aptósso m'a ektáha nak apkelmaxneyeykha pók aptósso yaqwayam emássesha sekxo'; 15 meyánmagkasek sa' eyke xama enxoho apwetágkoho enxoho m'a ektáha nak ótep. Ekha ekyánmaga sa' agkok kélmassáseykha m'a kéltósso nak, sa' aqsa eyánmagkasek ma'a ekwánxa enxoho ekyánmaga kélmassáseykha.
Mók segánamakxa
16 “Aplekwokmók agkok xama kelán'a étkok meyke kélteméssesseykmohóxma xama énxet, meyke nak makham ekpagkanma, apteméssessekmók agkok exma, kéméxcheyk eyánmagkasek egkések yáp ma'a ekweykenxa nak chá'a kélyánmagkasso yaqwayam kalyamhápok, keñe emok nahan etnehek aptáwa'. 17 Agkok emakók egkések yáp yaqwayam etnehek aptáwa' m'a kelán'a nak, eyánmagkasek sa' ekweykenxa nak chá'a kélmésso ekyánmaga xama kelán'a étkok meyke kéltemessesseykmohoxma.
18 “Kólnáhap chá'a ekyókxoho m'a kelán'a yohóxma nak.
19 “Énxet apteméssesseykmohoxma enxoho xama aqsok kéltósso, yáneykpok sa' ematñekxa'.
20 “Énxet apkelnáhakkasso enxoho chá'a aqsok kélnaqtósso m'a mók aqsok kéláyókxa nak, ekpayhawo nak eykhe wánxa elmések ma'a Wesse' egegkok, yáneykpok sa' ematñekxa'.
21 “Nágkóltawasagkoho chá'a énxet apkeñama nak mók apkelókxa, nágkólyentaxnésses nahan apha, hakte kéxegke axta nahan kélteme kéleñama mók apkelókxa m'a kélheykencha'a axta Egipto.
22 “Nágkólnaqtawasagkoho m'a kelán'ák xentampe'e nak tén han ma'a élyéheykha nak, 23 hakte kélnaqtawásegkok sa' agkok ma'a, keñe sa' sélmaxneya enxoho ko'o kának apasmok, apasmok sa' nahan, 24 yetlo seklómo ahagko' sa' nahan altekpagagkok sókwenaqte alnápok ko'o kéxegke. Xentampe'e sa' katnahagkok ma'a kélnaqteyegka'a nak, keñe sa' kélketchek katnahagkok élyéheykha.
25 “Kélmassáseyha sa' agkok selyaqye kélagkok xama énxet meyke nak aqsok apagkok énxet ahagkok, apha nak kélnepyeseksa kéxegke, nágkóltemésses aqsa m'a aptémakxal'a elának pók ma'a énxet apmassáseykencha'awól'a chá'a pók selyaqye apagkok, nágkóllána eyánmagkásekxohok mók néten. 26 Apméssek agkok apchaqlamap yaqwayam etnehek sekxók ekyánmaga aqsok apmeykha m'a énxet nak, egkeyásekxa sa' makham ma'a ektaxnakmo enxoho, 27 hakte cháxa apchaqlamap nak, wánxa xama apkenchesso m'a apmopsamáge. Méko agkok xa, ¿yaqsa yaqlakpok ma'a aptena enxoho? Apkeltamhók agkok ko'o apasmok xa, ay'ammok nahan apásegwók, hakte apyósek ko'o alanok énxet.
28 “Nágyenmexmakha chá'a Dios, ná eltamho nahan chá'a katnégwomhok exma ekmaso m'a apkeláneseykha nak chá'a apchókxa.
29 “Hélsantagkas chá'a heykxe ko'o m'a ekyókxoho aqsok sélmésso naqsa aqsok apkeneykekxa nak apnakxo, tén han ma'a ekyókxoho anmen yámet égmenek apagkok nak.
“Hegkések sa' ko'o m'a apkemha apmonye' apwete nak apketche, 30 ekhawo nahan ma'a émha amonye' ekwete nak étkók ma'a weyke apnaqtósso tén han ma'a nepkések. Awanchek sa' sekxók kallawha xamo' egken ekweykmoho siete ekhem, keñe sa' ma'a ekwokmo enxoho ocho ekhem ekpalleyam, hélmések sa'.
31 “Kéméxcheyk kóltéhek kéxegke énxet'ák kélpagkanchásamáxche ko'o.
“Nágkóltaw chá'a kéltósso ápetek eyaqhe nak aqsok nawhak eklo m'a yókxexma; kólchexakkas sa' chá'a semheg.
© © Enxet Lengua Sur Bible © Paraguayan Bible Society, 2015.