Moisés aptéyam
1 Apmomchek axta xama kelán'a apkelenyémeyo xamók nepyeseksa Leví énxet'ák apagkok xama énxet. 2 Lósók axta nahan entemék ma'a, wet'ak axta nahan xama étche apkenna'. Xama axta élanawo aptáha aptaqmalma apagko' ma'a sakcha'a nak, póssek axta ekweykmoho apqántánxo pelten; 3 massék axta eyke nahan eyewagko ekpósa ekwenaqte agko', tén axta ekma xama hówenaq apxagkok étkok élánamáxche axta ekho', kelápeyha axta nahan ekyókxoho élyagqáxeykha m'a meteymog égmenek ekpésyam eyéweykegkohol'a ekteyapmakxa agko' nak yókxexma yaqwayam enxoho megkatxek yegmen. Tén axta ekpekkena sakcha'a m'a kañe' hówenaq apxagkok étkok nak, pekkenwokmek axta m'a neyseksa ekho', neyáwa nak ma'a wátsam Nilo; 4 tén axta ekxéna nahan kaxnamok yámmakhawók apyáxa m'a sakcha'a nak, éltamho katagkohok yaqwánxa katnehek. 5 Yáma néwók axta nahan natámen, wákxeyk axta nahan faraón apketche ekmako kayaqpaksek yegmen ma'a wátsam, kelweynchámeyha axta nahan sekxók éláneykha m'a neyáwa wátsam nak, wetágwokmók axta nahan xama hówenaq apxagkok étkok ekyetna neyseksa ekho' m'a faraón apketche. Tén axta eyáphasa xama eyásenneykha éltamho kay'ágkasek, tén han kasantagkasek. 6 Xama axta ekmeykesa m'a hówenaq apxagkok étkok nak, wet'ak axta xama sakcha'a apyetna apwana m'a kañe', apyósek axta élano m'a faraón apketche. Tén axta ektáha s'e:
—Hebreo sakcha'a s'e.
7 Tén axta ekya'awa faraón apketche apyáxa m'a sakcha'a nak. Axta entáhak eyáneya s'e:
—¿Háxko katnehek xeye' ategyesha xama hebreo kelán'a, yaqwayam kássesagkok nam'agkok se'e sakcha'a nak?
8 —Tén axta Faraón apketche ektáha eyátegmowágkokxo s'e: Kaxeg, kategyaha.
Xegkek axta m'a kelán'a étkok nak, ya'aweykxeyk axta m'a ektáha axta egken ma'a sakcha'a, 9 tén axta faraón apketche ektáha eyáneya s'e:
—Kama sa' se'e sakcha'a nak, hewánegkesses sa', ayánmagkasek sa' eyke ko'o exche' ekyánmaga ektamheykha.
Sákxeyk axta egken ma'a sakcha'a nak, wánegkessek axta anhan, 10 apwányam axta aptemék, tén axta ekmeyáseykekxo makham ma'a faraón apketche, étche agko' axta nahan temék ma'a faraón apketche, teméssessegkek axta nahan apwesey Moisés, hakte axta entemék chá'a ekxeyenma s'e:
—Ko'o axta seklekwayam ma'a neygmen.
Moisés apxegányam Egipto
11 Xama axta aptéma apwányam ma'a Moisés, apxegkek axta xama ekhem apmahágko aptáha meyk'a m'a apheykegkaxa axta appeywomo xamo', apwetágwokmek axta anhan ektémakxa apkeltamheykha ekyentaxno agko', ñohok axta anhan apwetágkoho xama egipcio aptekpagancha'a m'a xama apyáxeg aptémo xamo' nak hebreo. 12 Aptaqmelchásawók axta nahan sekxók apsawhencha'a exma, apwet'ak axta méko xama énxet enxoho m'a, apchaqhak axta m'a egipcio nak, apkelápekxeyk axta aqsa nahan yagkamex apchátawanya. 13 Mók ekhem axta entáhak apxegákxo makham, keñe apwetágkoho apkelnápeykpo makham apqánet hebreo. Tén axta apkelmaxneyáncha'a m'a ektáha axta aptekpageykha m'a pók. Aptáhak axta apcháneya s'e:
—¿Yaqsa ektáha aptekpageyncha'a nak appeywomo xamo'?
14 Tén axta m'a énxet, ektáha axta aptekpageykha pók, aptáha apchátegmowágkokxo s'e:
—¿Yaqsa ekpekkenma exchep yaqwayam etnehek apkemha apmonye' tén han segyekpelchémo negyeseksa negko'o? ¿Xénchek enxeykel'a apwáxok ko'o xa heyaqhek, ektáha axta apchaqha m'a egipcio?
Xama axta apleg'a Moisés aptáha apcháneya xa, apchekak axta, hakte xénchek axta apwáxok kélya'ásegkoho ektáha apchaqhe m'a xama egipcio. 15 Xama axta anhan apleg'a faraón Moisés ektáha apchaqhe m'a xama egipcio, apkeltamhók axta kólchetagkasek yaqwayam yaqhek; apxeganakmek axta eyke m'a Moisés. Apmahágkek axta aphakmo m'a xama yókxexma ekwesey axta Madián. Aphakmek axta anhan nekha yámelchet ma'a.
16 Siete axta nahan ekyókxoho apketchek kelwán'ák énxet apwesey axta Reuel, apteme axta apkelmaxnéssesso Dios énxet'ák apagkok ma'a yókxexma Madián. Chaqhawók axta nahan ekhem élmeyeykekxexa axta chá'a kalyekwagkok yegmen ma'a yámelchet nak yaqwayam kallánesagkok chá'a m'a meteymog ekyeneykegkaxa nak kélnaqtósso tén han kalagkok chá'a yegmen ma'a yáp apnaqtósso nak nepkések, 17 apkelwa'ak axta eyke nahan apkeláneykha nepkések tén axta apkelántekkesa'a m'a nekha yámelchet nak. Keñe axta m'a Moisés apkempákxo néten apya'awa m'a énxet'ák nak apkelmeyawa m'a kelán'ák, apkelágkek axta nahan yegmen ma'a nepkések. 18 Xama axta élwákxo makham aphakxa yáp xa kelán'a étkók nak, apkelmaxneyáha axta. Aptáhak axta apkeláneya s'e:
—¿Yaqsa ektáha ényahamo nak kélwa'akto sakhem?
19 Tén axta ektáha élátegmowágkokxo s'e:
—Xama egipcio ẽlwagkásak negko'o teyp, ẽlántekkessa'ak eykhe nekha yámelchet ma'a apkeláneykha nepkések nak, tén sẽlyekweyásegko nahan negko'o m'a yegmen, apkelágkek nahan yegmen ma'a nepkések.
20 Tén axta Reuel aptáha apkeláneya s'e:
—¿Háxko aphakxa m'a énxet nak? ¿Yaqsa ektáha kélyenyawa nak aqsa apxakko'? ¡Kóltennásekxa', etáswaták sa' apto s'e!
21 Apkelyahákxók axta nahan Moisés apcháneyákpo exnamok ma'a Reuel apxagkok. Tén axta apmésa nahan xama apketche m'a Reuel, ekwesey axta Séfora yaqwayam etnehek aptáwa'. 22 Wet'ak axta nahan xama étche apkenna' m'a, cham'a apteméssessama axta apwesey Moisés ma'a Guersón, hakte axta aptemék chá'a appeywa s'e: “Ko'o sekteme séñama mók apkelókxa, cham'a xapop megkatnahakxa nak seyókxa.”
23 Kelyekheykegkek axta nahan ekhem, tén axta apketsapa nahan ma'a wesse' apwányam Egipto, keñe axta m'a israelitas, maxta elwáteseykegkok apkelpaqméteykha élleklámeykegko m'a ektémakxa kélásenneykha naqsa, hakte yentexek axta m'a ektémakxa apkeltamheykha. Aplegayók axta nahan Dios ma'a ektémakxa apkelápagqánamap, 24 appasmomchek axta nahan ma'a ektémakxa apkelpaqméteykha, ekxénweykekxoho apwáxok ma'a appeywa apméssama axta m'a Abraham, Isaac, tén han ma'a Jacob. 25 Apkelanawók axta Dios ma'a israelitas, apya'ásegwokmek axta anhan ektémakxa apkellegeykegkoho.
© © Enxet Lengua Sur Bible © Paraguayan Bible Society, 2015.