Yegmen ekteyapma kañe' meteymog
(Nm 20.1-13)1 Apyókxoho israelitas axta apkelántépak ma'a yókxexma meykexa énxet ekwesey nak Sin, apkelxegákxo makham meyke ekpekhe, apkelyeheykekxoho chá'a m'a apkeltémókxa axta etnahagkok ma'a Wesse' egegkok. Apkelpakxenwokmek axta makham ma'a yókxexma ekwesey nak Refidim, méko axta eyke yegmen yaqwayam enxoho énagkok ma'a énxet'ák nak, 2 tén axta m'a énxet'ák appaqhetchásekxo makham ekyennaqte ma'a Moisés. Aptáhak axta apkelpaqmeta s'e:
—¡Hegmés negko'o yegmen yaqwayam agyenagkok! Tén axta Moisés apchátegmowágkokxo. Aptáhak axta apkeláneya s'e:
—¿Yaqsa ektáha sélpaqhetchessa'akto nak ko'o ekyennaqte? ¿Yaqsa ektáha kélyepkeyna nak Dios? —axta aptáhak apkeláneya.
3 Hem axta eyke kelnápak ma'a énxet'ák, apkelpaqméteyha axta makham apxéna ekmaso m'a Moisés. Axta aptáhak apcháneya s'e:
—¿Yaqsa axta ektéma sẽlántekkessama m'a Egipto? ¿Apkeltémok enxeykel'a exchep hẽlnápok hem sẽlnapma, yetlo egketchek tén han ma'a aqsok nennaqtósso nak?
4 Keñe axta m'a Moisés apwóneyncha Wesse' egegkok. Aptáhak axta apcháneya s'e:
—¿Háxko atnéssesek ko'o s'e énxet'ák nak? ¡Kaxwók sa' hélyetnak meteymog heyaqhek!
5 Keñe axta m'a Wesse' egegkok apchátegmowágkokxo. Aptáhak axta apcháneya s'e:
—Etnegwakxa sa' apmonye'e énxet'ák, yána sa' nahan elyetlók pók xam'a m'a apkelámha apmonye'e nak Israel. Eswoho sa' nahan ma'a yámet kéltasqapeykha aptekpaga axta m'a wátsam, tén sa' exog. 6 Axek sa' eyke ko'o aleyxek ma'a néten egkexe Horeb. Aptekpogkek sa' agkok ma'a meteymog, katyapok sa' yegmen eñama m'a kañe' nak, yaqwayam enxoho énagkok ma'a énxet'ák.
Aptemék axta nahan Moisés xa ektáha nak, nápaqta'awók ma'a apkelámha apmonye'e Israel. 7 Apteméssessegkek axta nahan ekwesey Meribá xa yókxexma nak, hakte axta élyenneykegkaxa chá'a apkelpeywa israelitas ma'a, Masá axta nahan apteméssessók ekwesey ma'a, hakte cham'a apmáheyókxa axta nahan chá'a épkeynek Dios ma'a, aptéma axta chá'a apkelpaqmeteykencha'a s'e: “¿Aphéya negyeseksa negko'o Wesse' egegkok, enxeykel'a exnak?”
Israelitas apkempakhe amalecitas
8 Apkelxegakmek axta amalecitas apkelmeyókmo m'a yókxexma Refidim, yaqwayam elnapakpok ma'a israelitas. 9 Tén axta Moisés aptáha apcháneya Josué s'e:
—Elyésha sa' pók xam'a énxet, tén sa' exog elnapakpok ma'a amalecitas. Sa' eyke ko'o axek saka m'a egkexe néten nak, yetlo sekmeykha yámet kéltasqapeykha ektáha nak Dios apagkok.
10 Aptemék axta nahan Josué m'a apkeltamhókxa axta etnehek ma'a Moisés, tén axta aptepa apkelnápekpo m'a amalecitas. Neyseksa ekteme axta xa, apkelchenátweykxeyk axta Moisés, Aarón, tén han ma'a Hur ma'a netno' nak egkexe. 11 Xama axta apkelya'asa néten apaktegák ma'a Moisés, apnaqtawásegkók axta apkelenmexma m'a israelitas, maxta exnawo'; keñe axta apkelweykásento makham, ekpehewákxo apkelyennaqte m'a amalecitas. 12 Apkelmeyk axta nahan xama meteymog appekkenchesa apkeltamho exek néten ma'a Moisés, hakte kelyampa'ak axta apaktegák apkelya'asso néten. Keñe axta m'a Aarón tén han Hur, apkelmassásegko chá'a m'a apaktegák, xama axta m'a xama apaktog, tén axta nahan pók ma'a mók apaktog nak. Axta keñamak élyenna apaktegák Moisés ekwokmoho ektaxna ekhem xa. 13 Apnaqtawásegkók axta Josué m'a sẽlpextétamo amalecita yetlo apkelmeykha sawo élwenaqte.
14 Tén axta Wesse' egegkok aptáha apcháneya Moisés se'e:
—Etaxés sa' xép xama weykcha'áhak se'e, yaqwayam enxoho kaxénwakxohok chá'a kélwáxok. Eltennés sa' nahan Josué sekmako ko'o amasseksek apyókxoho m'a amalecitas.
15 Apkelanak axta nahan Moisés xama ekwatnamáxchexa aqsok, cham'a apteméssesa axta nahan ekwesey: “Wesse' egegkok apteme bandera ahagkok séxanmól'a néten”, 16 tén axta aptáha:
“¡Wesse' egegkok bandera apagkok sekméyak émek!
¡Peyk elnapakpok Wesse' egegkok ma'a énxet'ák Amalec
megkatnégwayam néxa!”
© © Enxet Lengua Sur Bible © Paraguayan Bible Society, 2015.