Moisés apmeneykmasso
1 Tén axta Moisés apmeneykmasa yetlo israelitas se'e negmeneykmasso nak, apkelsawassásawo m'a Wesse' egegkok. Aptáhak axta apkelmeneykmasso s'e:
“Anneykmássesek sa' ko'o
Wesse' egegkok,
cham'a apmallana axta nepyeseksa
apkelenmexma apkelweykeságko
kañe' wátsam ekwányam ma'a yátnáxeg
tén han ma'a apheykha nak apkap'ák.
2 Wesse' egegkok keñamak
sekmeneykmasso, hakte cham'a
sénnaqtésso m'a, tén han sewagkasso teyp.
Cham'a apteme Dios
ahagkok ma'a, alpeykeshok sa';
táta Dios apagkok ma'a,
atnéssesek sa' apcheymákpoho.
3 Wesse' egegkok apteme xama
kempakhakma yáp apwányam apagko'.
Wesse' egegkok apwesey xa.
4 Apkelweykásegkek axta Wesse' egegkok
wátsam ekwányam ma'a
yátnáxeg apkelyenyawasso tén han ma'a
faraón sẽlpextétamo apagkok;
¡kelnapchek axta Wátsam Ekwányam
Ekyexwase m'a sẽlpextétamo
ektáha axta apkelyéseykha!
5 Appallénteyk axta ekweykmoho m'a
kañók agko', máxa axta aptamhágkok
ma'a ektémól'a meteymog kapallenta',
chápekxeyk axta m'a wátsam
ekwányam ekmattawóneg nak.
6 Wesse' egegkok,
kayhek xép apmek
apkelya'assamakxa,
ekmowána nahan eghak,
cham'a éltepelchawo axta m'a
katnaha egnámakkok.
7 “Yetlo ekyawe apmopwána axta exchep
apkeltekpagágkok ma'a
ektáha axta apkenmexeykekxa;
aplókók apagko' axta exchep,
apkelmetchek axta nahan ma'a,
máxa axta aptamhágkok ma'a
ektémól'a pa'at apák kalmétek.
8 Apwátekhapchek axta exchep
ekyennaqte agko', tén axta
eyánchásekxo m'a yegmen;
máxa axta entáhak meteymog
kélhaxtal'a élmeyákxo néten
ma'a élyaqyahayam nak;
¡tén ma'a neyseksa nak
wátsam ekwányam ekmattawóneg,
yetneyk axta aqsa meyke éltaqheheykha!
9 Keñe m'a ektáha axta sẽlenmexma
ektáha élchetamso apwáxok se'e:
‘Agmenxenek sa' ekwokmo néltahanyékxo,
agmelaskok sa' nahan ma'a
aqsok nélyementaméyak enxoho,
ekwokmoho élpayhékxo egwáxok.
Ólhexyawasagkok sa'
sawo élwenaqte egagkok,
tén sa' egmék kamasséssók
ma'a apyókxoho.’
10 Apwátekhapchek axta eyke exchep,
tén axta élweykeságko m'a
wátsam ekwányam nak;
máxa axta aptamhágkok
apkelweywegko m'a ektémól'a
meteymog kapallenták neygmen
aphagwokmo m'a
kañók agko' nak wátsam.
11 “Wesse' egegkok,
¡méko pók dios egwanchek
aghéshok xép!
¡Méko apwányam aphawo nak xeyep!
¡Xeyep apkelane chá'a m'a
aqsok ekpelakkasso nak agweta'
tén han ma'a ekpexchessamo nak
egyempehek agweta'!
¡Payhawók xeyep kólteméssesek
apcheymákpoho!
12 ¡Apyenyenteyk axta exchep apmopwána
tén axta eksawhawo eyápeykxo
xapop ma'a énxet'ák!
13 Yetlo apkelásekhayo exchep
apnaqleykha s'e énxet'ák apagkok
apkelwagkasa nak teyp;
yetlo apmopwána nahan
apnaqleykekxak ma'a yókxexma
ekpagkanamaxchexa apagkok nak.
14 Elpexyennók sa' chá'a
apkelleg'a enxoho m'a ekyókxoho
apheykegkaxa nak chá'a énxet'ák,
elektakpok sa' ellegagkohok
ekmáske m'a filisteos,
15 meyke apkelwasqapma sa'
etnahagkok eñama apkelaye m'a
apkelámha apmonye'e nak
sẽlpextétamo yókxexma Edom,
elpexyennók sa' apkelaye m'a
apkelámha apmonye'e nak
kempakhakma m'a yókxexma Moab,
kamaskok sa' apkelyennaqte
m'a apyókxoho énxet'ák Canaán.
16 “Wesse' egegkok,
¡elyegwakkas!, ¡yána' yeygkok!
¡tásek exmakha aqsa ektémól'a
kaxnagkok ma'a meteymog
eñama xa apmopwána ekyennaqte nak,
ekwokmoho sa' apkelyeyk'a m'a énxet'ák apagkok,
cham'a énxet'ák apteme nak xeyep apagkok!
17 Wesse' egegkok,
hẽlye'és negko'o yaqwayam
aghamok ma'a egkexe apagkok
ekpagkanamaxche nak,
cham'a yókxexma sẽlyessáseykegkaxa axta
yaqwayam aghamok, apkeláneykxa axta
tegma appagkanamap apagkok.
18 “¡Katnahagkok sa' chá'a apteme
Wesse' egegkok megkatnégwayam ennéxa!”
María ekmeneykmasso
19 Xama axta élántaxna yátnáxeg apkelyenyawasso tén han apkelchánte yátnáxeg apagkok faraón ma'a wátsam ekwányam awáxok, apkeltamhók axta kápekxak yegmen ma'a Wesse' egegkok; tén axta m'a israelitas apkelyeykhákxo aqsa ektémól'a keymáwhok exma xapop ma'a kañe' nak wátsam ekwányam awáxok. 20 Keñe axta m'a kelán'a ekxeyenmo axta chá'a Dios appeywa ekwesey María, apyáxeg axta m'a Aarón, ekma xama kélaqtawáseykha ekyaqyél'a, kelyetlókek axta nahan ekyókxoho m'a kelán'ák, neywegkek axta, kelpáwássek axta m'a aqsok élyaqye nélaqtawáseykha nak. 21 Axta entáhak nahan éláneya neyseksa élmeneykmasso námakkok se'e:
“Kólmeneykmásses Wesse' egegkok,
cham'a apmallana axta
nepyeseksa apkelenmexma,
apkelweykeságko wátsam
ekwányam ma'a yátnáxeg
tén han ma'a apheykha nak apkap'ák.”
Yegmen ekmáske
22 Apkeltamhók axta eyenyók apheykha israelitas Moisés ma'a nekha Wátsam Ekyexwase nak. Tén axta apkelmeyákxo m'a yókxexma meykexa nak énxet ekwesey nak Sur. Ántánxo ekhem axta entáhak apkelxega meyke apkelwetágwayam yegmen. 23 Xama axta apkelwokmo m'a yókxexma ekwesey nak Mará, mopwanchek axta apmako énagkok yegmen ekyetno axta m'a, hakte askohok agko' axta. Axta keñamak éltamhomaxko ekwesey Mará m'a yókxexma nak.
24 Apcheynawók axta nahan apkelpaqméteyncha'a ekmaso énxet'ák apxéna m'a Moisés. Aptáhak axta apkelmaxneyáncha'a s'e: “¿Yaqsa sa' agyenagkok?” 25 Tén axta Moisés apkelmaxneya m'a Wesse' egegkok apkeltamho epasmok, apxekmóssek axta nahan énmakxa xama yámet étkok. Apyenyókek axta neygmen Moisés ma'a yámet étkok nak, keñe axta eyátsékxo m'a yegmen nak.
Cháxa apkelyepkeynakxa axta nahan sekxók Wesse' egegkok israelitas ma'a, apméssek axta nahan xama segánamakxa tén han xama sempékessáseyak nak ektémakxa nenxega. 26 Aptáhak axta apkeláneya s'e: “Kélhaxnawók agkok chá'a kéxegke meyke kéltawásseyo kóleyxhok ma'a sektáhakxa enxoho chá'a séláneya, ko'o sektáha nak Wesse' Dios kélagkok, tén han kéllana enxoho chá'a m'a ekpeykeseykekxoho nak chá'a ko'o ewáxok, kélyahákxoho enxoho nahan chá'a m'a séltémókxa nak chá'a kóltéhek, tén han kéllana enxoho chá'a m'a segánamakxa ahagkok nak, magwáphaksek sa' ko'o xama enxoho m'a aqsok ekmaso nenlegeykegkoho, seyáphasa axta ko'o nepyeseksa m'a egipcios, hakte ko'o sekteme Wesse', ektáha nak chá'a apkelmeyáseykekxa kélyennaqte kéxegke.”
27 Apkelwokmek axta m'a yókxexma ekwesey nak Elim, ekheykegkaxa axta nahan doce maxcha'a yegmen ma'a tén han setenta yám'áxa élaqnéyak, apkelpakxenwokmek axta nahan ma'a ekpayhókxa axta ekyetnamakxa m'a yegmen.
© © Enxet Lengua Sur Bible © Paraguayan Bible Society, 2015.