Ekyókxoho aqsok ekha ekhem agkok
1 Ekyókxoho aqsok ekha ekhem agkok keso náxop; yetneyk chá'a ekhem agkok xama aqsok, cham'a ekmakókxa enxoho chá'a katnehek:
2 Yetneyk ekhem
nentéyeykemxa',
tén han nétsapmakxa'.
Yetneyk ekhem
negkeneykekxexa aqsok,
tén han nennakxamakxa ekyexna
aqsok negkeneykekxa'.
3 Yetneyk ekhem
nénnapmakxa',
tén han nentaqmelchesseykenxa'.
Yetneyk ekhem
néletsagkassamakxa aqsok,
tén han nenláneykekxexa aqsok.
4 Yetneyk ekhem
nenlekxagweykegkaxa',
tén han néktegmeykegkaxa'.
Yetneyk ekhem
senlapweykenxa',
tén han ekpayheykekxexa egwáxok.
5 Yetneyk ekhem
néxpánchessamakxa' meteymog,
tén han negáncháseykekxexa'.
Yetneyk ekhem
nélpathetamaxchexa,
tén han néxpánchesamaxchexa'.
6 Yetneyk ekhem
nenlenxáneykenxa',
tén han nélwatéssamakxa'.
Yetneyk ekhem
nentaqmelchessamakxa',
tén han negyamasmakxa'.
7 Yetneyk ekhem
nélyeptamakxa',
tén han nélyetnaqtamakxa'.
Yetneyk ekhem
mampaqmésmakxa',
tén han nempaqmésmakxa'.
8 Yetneyk ekhem
negásekhayókxa,
tén han nentaqnagkamakxa'.
Yetneyk ekhem
kempakhakma,
tén han meyke ektáhakxa negha.
9 ¿Yaqsa aqsok kataksek yaqhakpok aptamheykha énxet? 10 Ekyekpelchágweykmek ko'o Dios yentexek apteméssessamakxa énxet, yaqwayam enxoho elyaqhakkassessamhok chá'a apkelwáxok. 11 Dios axta apkelane amonye' aqsok éltaqmela, appekkenchessegkek axta han apwáxok énxet néltémo nak agya'asagkohok yaqwánxa katnehek egmonye' tén han nentámen meyke néxa, neyseksa mey'áseyak eykhe m'a ekyókxoho aqsok ekyawe apkelane nak Dios, tén han ma'a apmáheyo nak chá'a elána'.
12 Ekya'ásegkók eyke ko'o ektaqmela etnehek énxet kapayhekxak apwáxok, tén han kataqmelchessesha apwáxok aqsok neyseksa apha, 13 hakte nentókek agkok chá'a nento, tén han negyena enxoho chá'a negyá, tén han ekpeykáseykxo enxoho chá'a egwáxok ma'a aqsok éltaqmela nenlane nak eñama nentekkesso nentamheykha, cháxa eñama Dios segmésso xa. 14 Ekya'ásegkók nahan ma'a ekyókxoho Dios axta apkelane megkamassegwomek chá'a. Méko han kawának kalánekxoho', tén han kamasseksek; hakte Dios axta apteméssesso xa ektémakxa nak, yaqwayam enxoho chá'a negko'o agáwhok ma'a. 15 Kelánteyepmeyk ma'a élánteyapma axta nano', méko aqsok megkatyapmakxa, megkatyepek nahan chá'a m'a aqsok megkatyapma nak. Dios chá'a yának kalántépekxak ma'a aqsok élánteyapma axta chá'a nano'.
Megkataqmalma sentémakxa negweteyo nak chá'a
16 Ekweteyak nahan se'e náxop ekyetnama nentémakxa ekmaso, tén han magya'assáxma, yaqwayam eykhe keytek nentémakxa ektaqmela, tén han nentémakxa ekpéwomo. 17 Ékeso éñamakxa sekxéna nak ko'o Dios ékpelkohok sa' ma'a énxet meyke nak aptémakxa, tén han ma'a ekmaso nak aptémakxa, hakte yetneyk ekhem ma'a ektémakxa nak chá'a ekyókxoho aqsok, tén han ma'a élánamáxchexa nak chá'a ekyókxoho aqsok.
18 Ekxénchek axta nahan ma'a aptémakxa nak énxet, apkelyekkeynma Dios ma'a énxet'ák nak, yaqwayam enxoho elyekpelchágwók aphémo ma'a aqsok nawha'ák. 19 Hawók mók élmaheykegkaxa énxet, tén han aqsok nawha'ák: kaletsaphok nahan chá'a, hawók mók ekha élennama. Méko ekyeykhamaxche énxet tén han aqsok nawha'ák: ekyókxoho ekteme eyaqhémo agweta', 20 kaxhok chá'a mók ekhagwayam ma'a ekhagweykenxa nak chá'a, xapop axta keleñamak élánamáxche' m'a ekyókxoho nak, xóp sa' nahan katnekxak ekyókxoho. 21 ¿Yaqsa ekya'ásegkoho énxet aphagák ekmeyeykekxo chá'a néten, tén han ma'a ahagák nak aqsok nawhak ekmeyeykekxo chá'a kañe' xapop ekmattawóneg? 22 Ekya'ásegweykmek ko'o énxet ektaqmela agko' kapeykessásekxak apwáxok ma'a aptamheykha nak aptekkesso, hakte cháxa aqsok ektáha ekpehewayam xa, méko keyntementák yaqwayam elanok ektáhakxa m'a natámen apketsapma.
© © Enxet Lengua Sur Bible © Paraguayan Bible Society, 2015.