1 “Kélwet'ak sa' agkok chá'a kélxama kéxegke weyke aptósso ekxegányam ma'a kélókxa xamo' nak essenhan ma'a nepkések aptósso, nágkólteme aqsa chá'a hó magya'asagke', kólyentemekxés sa' chá'a m'a kélókxa xamo' nak. 2 Háwe sa' agkok apkeñama ketók aphakxa m'a ótep essenhan megkatnaha enxoho apweteykxa, éntemekxak sa' apxagkok ma'a aqsok kéltósso nak, eyáqkasek sa' nahan ma'a ekwokmoho apketama m'a apchókxa xamo' nak; keñe sa' egkeyásekxak makham. 3 Sa' etnéssesek nahan apwetákxo enxoho m'a yámelyeheykok, essenhan kélaqlamaxche, essenhan ma'a mók aqsok apagkok ekxegányam nak chá'a m'a xama énxet, tén han apwetákxo enxoho chá'a kélxama kéxegke. Nágkólteme chá'a hó magya'asagke' kélwet'a enxoho chá'a aqsok.
4 “Kélwet'ak sa' agkok chá'a kélxama kéxegke yámelyeheykok ekyaqnenma m'a ámay essenhan weyke aptósso m'a kélókxa xamo' nak, nágkólyeykha aqsa chá'a, kólpásem chá'a kólheyásekxak néten.
5 “Megkeymexchek chá'a kalmaha kelán'a m'a apkenna nak chá'a apkelnaqta, tén han énxet megkeyméxchek chá'a elmaha m'a kelán'a élnaqta nak, hakte megkalchek apwáxok Wesse' egegkok elanok ekteme nak chá'a xa ektéma nak.
6 “Apwet'ak sa' agkok chá'a kélxama ámay apagkok náta étkok axagkok néten ma'a yámet ekyawe essenhan ma'a náxop nak, yetlo enxoho m'a étkók essenhan ma'a appok, tén han élpathetéyak enxoho m'a yapmok, megkeyméxchek emok chá'a m'a yapmok nak tén han ma'a étkók nak; 7 kéméxcheyk elmok aqsa wánxa m'a étkók nak tén ma'a yapmok nak yohók aqsa kaxog. Keñe sa' tásek chá'a katnehek apha exchep, ahóxek sa' nahan katnehek apweynchámeykha.
8 “Apkelanak sa' agkok chá'a kélxama kéxegke xama apxagkok aphaxnagkok, kéméxcheyk enegkenagkok chá'a meteymog élámha nélmeykegkaxa nak chá'a m'a nekhaw'ék nak néten apxagkok; keñe sa' megkaphemmek chá'a amya'a aphawóxama eyaqhe ekyetna enxoho chá'a étsapma ektéyam ma'a néten apxagkok nak.
9 “Nágkólchenekxa aqsa chá'a neyseksa anmen yámet kélcheneykekxa m'a mók aqsok aktek nak, yaqwayam enxoho megkatwássesha chá'a kélmeykha m'a aqsok kélcheneykekxa nak chá'a, ekhawo nak han ma'a ekyókxoho kélnakxo nak chá'a m'a anmen yámet ekyexna.
10 “Nágkólpeynchem aqsa xapop namyep kélagkok ekyetlómo kéltéteykekxa xama weyke m'a xama yámelyeheykok.
11 “Nágkólántaxnekxa aqsa chá'a m'a apáwa kélótma kélpáxaqteyáseyak nak nepkések apwa' tén han ma'a apáwa apkeláxñél'a.
12 “Kólnegkenák sa' apkelmakheykha m'a cuatro napwe'ék nak ma'a kélaqlamaxche kéltaxneykekxa nak chá'a.
Segánamakxa ekxeyenma nak kelán'a meyke kélteméssesseykmohoxma
13 “Apmeyk agkok xama kelán'a énxet yaqwayam etnehek aptáwa', keñe appenchesa enxoho appathetéyak, etaqnawágwók, 14 exénmakha nanók kélteméssesseykmohoxma, etekkessesha ekwesey ekmaso etnehek exének se'e: ‘Ekmomchek axta ko'o yaqwayam atnehek etáwa' s'e kelán'a nak, keñe neyseksa sekpathetéyak sekweteya ko'o nanók kélteméssesseykmohóxma’. 15 Keñe sa' ma'a chána nak kelán'a étkok, kamok ma'a apáwa ektaháno nak kelán'a étkok eltexnémaxche m'a éma agkok, kasakxak ma'a sẽlyepelchémókxa apheykegkaxa nak apkelámha apmonye'e m'a tegma apwányam, 16 sa' etnehek yáp kelán'a étkok yának apkelámha apmonye'e s'e: ‘Ekméssegkek ko'o hatte yaqwayam etnehek aptáwa' s'e énxet nak, aptaqnawágwokmek eyke kaxwo', 17 apxénchek nanók éltámeye énxet, apxénáha hatte megkatnaha meyke kélteméssesseykmohoxma. Keso magkenatchesso ekteme ko'o hatte meyke kélteméssesseykmohoxma s'e seksánto nak.’ Keñe sa' epeykesek apáwa ektaháno apmonye'e m'a apkelámha apmonye'e nak, 18 keñe sa' apkelámha apmonye'e yának emakpok ma'a énxet nak, eñássesagkohok sa' nahan, 19 yának sa' eyánmagkasek cien sawók selyaqye élmope ekmomnáwa, yaqwayam sa' egkések ma'a yáp nak kelán'a étkok eñama aptekkessáseykha ekwesey ekmaso xama kelán'a étkok meyke kélteméssesseykmohóxma m'a Israel. Aptáwa' sa' nahan chá'a etnehek ma'a, mopwanchek sa' eyenyók neyseksók apha makham.
20 “Naqsók sa' agkok nanók kélteméssesseykmohóxma m'a kelán'a étkok nak, 21 kólchenegkesseták sa' ma'a átog nak ma'a yáp apxagkok, keñe sa' ma'a énxet'ák apheykha nak tegma apwányam elyetnak meteymog yaqhek, eñama élane xama aqsok ekmaso agko' ma'a kañe' Israel, tén han ekpathetéyak énxet neyseksa ekha makham ma'a yáp apxagkok. Keñe sa' kólmasséssók aqsok ekmaso ekteyapma kélnepyeseksa kéxegke.
22 “Apwetákpek sa' agkok nahan xama énxet appathetéyak xama kelán'a apha atáwa', kólának sa' nahan katekyewekxak xa ánet nak. Keñe sa' kólmasséssók kéxegke aqsok ekmaso ekteyapma m'a kañe' Israel.
23 “Yetneyk agkok nahan xama kelán'a étkok meyke kélteméssesseykmohóxma apha ekpagkanma xama énxet yaqwayam katnehek atáwa', keñe apwet'a enxoho pók énxet ma'a tegma apwányam nak, epathetagkok, 24 kólnaqlakxak sa' ánet ma'a sẽlyekpelchémókxa nak tegma apwányam, cham'a yaqwánxa sa' nahan kólnápekxak kólyetnak meteymog ma'a: eñama megkapayheykha átog kategyaha ekpasmo nepyeseksa tegma apwányam ma'a kelán'a étkok nak, keñe m'a énxet nak eñama appathetcháséyak ma'a pók appagkanma. Keñe sa' kólmasséssók aqsok ekmaso ekteyapma kélnepyeseksa kéxegke.
25 “Keñe sa' ma'a xama énxet apwetágwayam nak yókxexma xama kelán'a apha ekpagkanma m'a pók énxet, apyennaqtéssek sa' agkok apyempehek etnéssessamhóxma neyseksa megkalyeheykekxa', wánxa sa' aqsa nahan ematñekxak ma'a énxet ektáha nak apteméssesseykmohoxma m'a kelán'a nak. 26 Keñe sa' ma'a kelán'a étkok nak megkamatñekxeyk sa', hakte megkalanak xama enxoho m'a aqsok ekmaso ekpayhawo nak yaqwayam kamatñekxa'; hakte kaxhok sa' ma'a ektémakxal'a énxet apketámeyak la'a pók keñe yaqhek; 27 hakte axakkók apwetágwayam yókxexma kelán'a étkok ma'a énxet nak, wehéseyha axta kexa eykhe nahan ma'a, méko eyke xama enxoho yaqwayam kawagkasek teyp.
28 “Apwet'ak agkok nahan xama énxet kelán'a étkok meyke nak kélteméssesseykmohóxma tén han meyke nak makham ekmáheyo kategyaha atáwa', keñe énnaqtések apyempehek etnéssessamhóxma, tén ma'a kélwetágkoho enxoho, 29 keñe sa' ma'a énxet nak egkések sa' cincuenta sawók selyaqye élmope ekmomnáwa m'a yáp nak kelán'a étkok; emhohok sa' nahan etnehek aptáwa', eñama apteméssesseykmohoxma, mopwanchek sa' nahan chá'a eyenyók neyseksa apha enxoho makham.
30 “Méko sa' xama énxet enxoho apwanchek etnéssessamhóxma m'a apyáp aptáwa', hakte awanhek sa' katnehek apmegqasso apyáp aptáha enxoho xa ektáha nak.
© © Enxet Lengua Sur Bible © Paraguayan Bible Society, 2015.