Kempakhakma segánamakxa agkok
1 “Kélántekkek agkok kéxegke yaqwayam kólempakhak ma'a kélenmexma nak, kólwetak ma'a apkelchánte nak yátnáxeg tén han ma'a yátnáxeg apkelyenyawasso kélanchesso nak kempakhakma, tén han sẽlpextétamo apxámokma apagko' megkólhawo nak kéxegke, nágkóle aqsa, hakte apheyk kélnepyeseksa kéxegke m'a Dios Wesse' kélagkok, ektáha axta apkelántekkesso m'a Egipto. 2 Wokmek sa' agkok yaqwánxa kampakhaxche', elpaqhetchesek sa' sẽlpextétamo m'a apkelmaxnéssesso nak Dios énxet'ák apagkok, 3 sa' etnehek elának se'e: ‘Israelitas, kóleyxho, sakhem sa' kólnapaxchek kéxegke m'a kélenmexma nak. Nágkalyelqaxche aqsa kélwáxok, nágkóle'; nágkólpexyennem kélaye, nágkólyegwe nahan, 4 hakte apheyk kélnepyeseksa kéxegke m'a Dios Wesse' kélagkok; sa' elnapakpok kélenmexma nak kéxegke m'a, sa' elmallahanchesek nahan ma'a.’
5 “Keñe sa' natámen elpaqhetchesek énxet'ák ma'a apkelámha apmonye'e nak sẽlpextétamo. Sa' etnehek se'e: ‘Yetneyk sa' agkok chá'a kélxama kéxegke kéllane kélxagkok aphaxnagkok, megkólhayam nak makham ma'a kañe', tásek sa' kólmeyekxak makham ma'a kélxagkok, hakte kóletsapwók katnehek neyseksa kempakhakma keñe pók énxet etnehek amonye' apxagkok ma'a kélxagkok. 6 Yetneyk agkok nahan kélxama kéxegke kélcheneykekxa anmen yámet megkóltó nak makham ma'a ekyexna, tásek kólmeyekxak makham ma'a kélxagkok, hakte kóletsapwók katnehek neyseksa kempakhakma keñe pók énxet enakxek ma'a ekyexna nak. 7 Yetneyk sa' agkok nahan kélxama ekmáheyo kalyamhápok, megkalyamhopma nak makham, tásek emyekxak makham ma'a apxagkok, hakte yetsapwók katnehek neyseksa apkelnápomap, keñe pók énxet emok ma'a kelán'a apmáheyo nak emok.
8 “Keñe sa' elpaqhetchásekxak makham sẽlpextétamo apagkok ma'a apkelámha apmonye'e nak. Sa' etnehek elának se'e: ‘Yetneyk sa' agkok kélxama apkeye tén han megkeynnaqte apwáxok, tásek etaqhohok makham ma'a apxagkok yaqwayam sa' melyélaqtéssessemek nahan apkelwáxok ma'a apkelxegexma nak.’ 9 Appenchásegkek sa' agkok apkelpaqhetchesso énxet'ák ma'a apkelámha apmonye'e nak, elyésha sa' chá'a yaqwayam exog apmonye'e m'a sẽlpextétamo apagkok.
10 “Kélágketchessekmek sa' agkok kéxegke xama tegma apwányam yaqwayam kólchetamagkok, kéméxcheyk kólmaxnak sekxók melnapakpehe'. 11 Leyawók sa' agkok apkelwáxok kéltáhakxa kéláneya m'a énxet'ák apheykha nak ma'a tegma apwányam, apmésa enxoho yaqwayam kólántexek, kélásenneykha naqsa sa' kóltéhek kéxegke m'a, kólának sa' eltemeykha meyke aptaqhessamo kélpeywa. 12 Sa' agkok elyahákxak kéltáhakxa enxoho kéláneya kéxegke m'a, apmako enxoho aqsa yempakha', kólwakhekxak sa' kéxegke m'a tegma apwányam nak, keñe sa' kólchetamagkok. 13 Dios Wesse' kélagkok sa' egkések kéxegke yaqwayam kólmok ma'a, keñe sa' kéxegke kólnápok apyókxoho énxet apheykha nak ma'a kañe'. 14 Keñe sa' ma'a kelán'ák, sakcha'álétkók, weyke, tén han ma'a ekyókxoho aqsok ekhéyak nak ma'a kañe' tegma apwányam, kéxegke sa' kóltéhek kélagkok; kélwanchek sa' kólmagkok ma'a ekyókxoho aqsok apkelmésso nak Dios Wesse' kélagkok yaqwayam kólyementamagkok ma'a kélenmexma. 15 Sa' kólteméssesek nahan kéxegke apyókxoho tegma apkelyawe apheykegko nak makhawók kélheykegkaxa, megkatnaha nak han apagkok xa énxet'ák apheykha nak ketók kélheykegkaxa. 16 Keñe sa' se'e tegma apkelyawe apagkok nak se'e énxet'ák apmésakxa nak Dios Wesse' kélagkok yaqwayam kóltéhek kélagkok kélagko', megkeymexchek kóleymok xama enxoho énxet essenhan aqsok, 17 kólsawhohok sa' kólmasséssók ma'a hititas, amorreos, cananeos, ferezeos, heveos tén han ma'a jebuseos, ekhawo m'a apkeltamhókxa axta kóltéhek, 18 yaqwayam enxoho melxekmósek kéxegke kéllane ekhawo nak se'e aqsok ekmaso agko' apkeláneykegko nak chá'a elpeykeshok ma'a aqsok apcháyókxa, tén han yának kóllának megkólya'assáxma kólenmexek ma'a Dios Wesse' kélagkok.
19 “Ahóxek sa' agkok chá'a kélwakheykekxa kéxegke amonye' yaqwayam kólmok xama tegma apwányam, nágkólyaqténchesák aqsa chá'a póte m'a yámet élyawe apagkok nak, hakte kólámenyéhok sa' ma'a ekyexna nak yaqwayam kóltawagkok; yámet nahan ma'a, élaqnéyak chá'a m'a yókxexma, háwe énxet apmopwána nak yenmexekxak kelnápomáxche kéxegke. 20 Sa' eyke kélwanchek kólyaqtennagkok ma'a yámet élyawe megkatnaha nak chá'a ekha ekyexna, kélmowána nak chá'a kólmaha kólhaxtegkesek ma'a tegma apwányam kélchetámegkaxa enxoho chá'a, ekwokmoho kélma.
© © Enxet Lengua Sur Bible © Paraguayan Bible Society, 2015.