Xama énxet apkelyelqamap kéltaqmelchesseyam
1 Apkelmeyeykekxeyk axta tegma appagkanamap Pedro tén han Juan las tres taxnám, ektamhomaxchexa axta chá'a nempeywa nélmaxnagko. 2 Aphegkek axta nahan xama énxet apkelyelqamap ma'a tegma appagkanamap eyeynamo axta ekteme apkelyelqamap ma'a apyetnamakxa axta egken awáxok. Kólsakxohok axta chá'a yókxoho ekhem ma'a, kólpekkenwakxak axta chá'a m'a nekha átog éltamhomaxchexa axta Ektaqmalma, yaqwayam enxoho elmaxneyha chá'a aqsok énxet'ák ektáha axta chá'a apkelántaxnegweykekxa m'a. 3 Xama axta apweteya énxet apkelyelqamap apkelxegeykmo m'a Pedro, tén han Juan, peya elántexek ma'a kañe' tegma appagkanamap, apkelmaxnagkamchek axta aqsok. 4 Apkelányók axta Pedro tén han Juan. Keñe axta Pedro aptéma apkenagkama s'e:
—Henlano negko'o.
5 Apsekheykekxók axta apkelányo xa énxet nak, apkenagkama kólmáheyók kólmések aqsok. 6 Axta eyke aptemék Pedro apkenagkama s'e:
—Méko ko'o selyaqye, tén han ma'a sawo ekyátekto ekmomnáwa nak, sa' eyke aqsa agkések xép se'e aqsok ekyetna nak ko'o: yetlo sekxeyenma Jesucristo apkeñama nak Nazaret apwesey ektáhak seyáneya exchep, etnamha, exeg.
7 Xama axta aptéma apkenagkama Pedro xa, apmomchek axta apmek apkelya'assamakxa, apkempáseykekxeyk axta néten, yetlómók axta nahan élyenneykekxa élyettetakxa apmagkok. 8 Apnextegmeyk axta apkempeykekxo néten xa énxet apkelyelqamap nak, yetlómók axta nahan apxega; apkelyetlamchek axta nahan apkelántaxnama m'a kañe' tegma appagkanamap, apnextegeykegkek axta néten apxegama, apkelteméssessegkek axta apcheymákpoho Dios. 9-10 Kelpelakkassamók agko' axta anhan apkelweteya ektémakxa m'a apyókxoho énxet'ák apkelwete axta ektáhakxa apxegeykekxo, tén han apkelteméssessama apcheymákpoho m'a Dios, apkeláyak axta anhan, hakte apkelyekpelchémók axta m'a énxet nak, apkelya'áseykegkók axta anhan aphama axta chá'a elmaxneyha aqsok énxet ma'a átog nak tegma appagkanamap, cham'a átog kéltéma axta Ektaqmalma.
Pedro apkeltenneykha kóneg tegma kéltéma axta Salomón apagkok
11 Axta ekxeykekxak Pedro tén han Juan ma'a énxet kaxwe axta kéltaqmelchesseyam. Kelpelakkassegkek axta apkelweteya apyókxoho énxet'ák, apnaqtémeykegkek axta apkelmaheykegko m'a kóneg tegma appagkanamap ekwesey axta Salomón tegma apagkok, cham'a apheykegkaxa axta Pedro tén han Juan. 12 Xama axta apweteya Pedro xa, axta aptemék apkelanagkama énxet'ák se'e: “Israelitas: ¿Yaqsa ektáha élpelakkasa nak kélwet'a kéxegke xa? ¿Yaqsa ektáha senlano nak negko'o? Máxa ẽltemessásak negko'o egagko' la'a nentaqmelchesseyam se'e énxet nak tén han nenxegkáseykekxa eñama m'a negmowána egagko' nak, essenhan ekpéwomo nentémakxa'. 13 Apméssegkek axta ekyawe agko' apcheymákpoho meyke ekhémo apkeláneykha apwesey Jesús ma'a Abraham nak Dios apagkok, tén han Isaac, tén han ma'a Jacob, cham'a Dios apagkok nak ma'a ẽlyapmeyk nano' axta, kélméssama axta kéxegke m'a énxet'ák ekyawe nak kéláyo, tén han kéltaqnagkama axta kéxegke, apmáheyo axta eykhe eyenyekxak ma'a Pilato. 14 Kéltémók axta kéxegke kólyenyekxak ma'a énxet ekmaso axta aptémakxa keñe megkóltémo kólyenyekxak ma'a apteme axta appagkanamap, tén han appéwomo. 15 Cháxa ektémakxa axta kélaqhama kéxegke m'a énxet segméssamo nak ekyennaqte egnények. Dios axta eyke apxátekhásseykmok, negko'o nahan ektáha negweteykegkoho xa. 16 Magya'ásseyam Jesús apwesey keñamak ekmeyáseykxo apyennaqte xa énxet nak, kélwet'a nak kéxegke, tén han kélyekpelchawo nak. Cháxa ektaqmelchessekmo agko' nak énxet xa magya'ásseyam nak Jesús, cháxa ektáhakxa nak kélwete kélyókxoho kéxegke.
17 “Élyáxeg, ekya'ásegkók ko'o kéxegke tén han apkelámha apmonye'e kélagkok kélaqhama axta Jesús, kélláneya neyseksa megkólya'áseyak aqsok kéllane. 18 Apkeláneyak axta eyke Dios xa apxeyenma axta nano', apkelásenneykekxo axta elxének ma'a apkellegasso axta appeywa, aptéma axta s'e: megkatnehek megyetsapma m'a Mesías egagkok. 19 Kólyo'ókxa makham kéxegke m'a Dios, kólyaqmagkas kélwáxok, yaqwayam sa' meyaqmagkásekxeyk ma'a kéltémakxa megkólya'assáxma, 20 tén han yáphássesek Wesse' egegkok ma'a axnagkok kélyennaqte, yáphássesek ma'a Jesús, apkelyéssáseykencha'a axta kéxegke yaqwayam etnehek Mesías kélagkok ma'a sekxók eyeynamókxa axta. 21 Kéméxcheyk eyke exek aqsa makham sekxók Jesucristo m'a néten ekwokmoho appenchesa apkeláneykekxa ekhéyak Dios ma'a ekyókxoho aqsok, ekhawo aptémakxa axta appeywa, apkelásenneykekxo axta elxének ma'a Dios appeywa apkellegasso apkelpagkanamap apheykencha'a axta nano'. 22 Axta aptemék Moisés apkelanagkama ẽlyapmeyk nanók se'e: ‘Dios Wesse' kélagkok sa' etekkesek kélnepyeseksa kéxegke xama Dios appeywa aplegasso sekhawo nak ko'o. Kólyahakxoho sa' chá'a ekyókxoho aptáhakxa enxoho apkeláneya kéxegke, 23 hakte apyókxoho ektáhakxa enxoho chá'a melyaheykekxoho xa Dios appeywa aplegasso nak, kóltekkesek sa' nepyeseksa aphawóxama.’
24 “Apyókxoho Dios appeywa apkellegasso axta anhan apkelxeyenmak ektémakxa nak se'e negwánxa nak, eyeynamókxa axta m'a Samuel axta. 25 Kéxegke kélteme kélxaweykekxa xa appekkeneykekxa axta appeywa Dios, apkelxeyenma axta m'a Dios appeywa apkellegasso, kéxegke anhan kélxaweykekxa m'a ekhémo mók nélpaqhetchásamáxkoho nak Dios, apkelánésso axta Dios ma'a ẽlyapmeyk nano'. Hakte axta aptemék Dios apkenagkama Abraham se'e: ‘Apkeleñémo sa' kólteméssesagkok apyókxoho énxet'ák apheykha nak keso náxop eñama m'a aptawán'ák neptámen nak xép.’ 26 Xama axta apxátekhásseykmo Apketche m'a Dios, kéxegke axta sekxók apcháphássessók kélmonye'e m'a kélheykegkaxa, yaqwayam enxoho etnéssesek kéleñémo, yának chá'a kólyenyekxak kélxama m'a kéltémakxa nak kéllane aqsok ekmaso.”
© © Enxet Lengua Sur Bible © Paraguayan Bible Society, 2015.