Ekxeyenma egwáxok
1 Ko'o Pablo, sekteme nak Cristo Jesús apchápháseykha, seyáphásamáxche nak eñama apmopmenyého m'a Dios, ekhawo m'a ektémakxa axta sempekkencháseykekxa appeywa Dios apxeyenma hegmések ekyennaqte egnények ekyetna nak negko'o, eñama negyepetcheykekxa m'a Cristo Jesús, 2 eyáphássessek ko'o ekxeyenma ewáxok ma'a Timoteo, apteme nak máxa hatte seyásekhayo. Dios Egyáp tén han Cristo Jesús Wesse' egegkok sa' egkések xép ma'a ektémakxa nak segmésso naqsa ektaqmeleykha apwáxok henlano' tén han ma'a ektémakxa nak apmopyósa henlano' tén han meyke ektáhakxa egwáxok apagkok nak.
Negmésso ekxeyenma egwáxok Dios
3 Agkéshok chá'a ko'o ekxeyenma ewáxok Dios ekxéna enxoho chá'a ko'o ewáxok xép neyseksa sekteme nempeywa nélmaxnagko ekhem tén han axta'a, cham'a Dios sekyetleykencha'a nak chá'a ko'o yetlo eyáxñeyo ewáxok, aptamheykegko axta nahan chá'a apkelyetleykencha'a m'a élyapmeyk nano'. 4 Kaxénhok chá'a ko'o ewáxok ma'a ektémakxa axta chá'a apkelekxagweykencha'a, émenyeyk nahan óteyekxak xép yaqwayam enxoho kayáwhok agko' ekpayheykekxa ewáxok. 5 Hakte xénweykekxók ko'o ewáxok ekyetnama exchep ekmámnaqsoho mey'ásseyam. Apyáma' Loida axta nahan sekxók ekteme amonye' megkay'ásseyam, tén han ma'a Eunice, egken nak xép, naqsók nahan ko'o ekteméssessók ekyetnama exchepxa magya'ásseyam.
6 Cháxa keñamak séltémo nak ko'o exchep exátekhásekxak ma'a apmopwána apxawe axta eñama apmésso m'a Dios, cham'a seknegkenma axta emék apqátek xép. 7 Hakte axta hegméssók negko'o Dios ma'a yaqwayam nak antéhek eyeye egwáxok, wánxa axta aqsa segméssama m'a megkaye nak egwáxok, nélásekhamaxkoho, tén han ektaqmalma élchetámeykha egwáxok. 8 Ná emegqè' aqsa eltennaha m'a Wesse' egegkok apwesey; ná emegqè' aqsa nahan ko'óxa hélano', sélhésseykmo axta kañe' sẽlpextétamakxa eñama sekyetleykha m'a Wesse' egegkok. Yoho kawakxohok xépxa m'a nenlegeykegkoho eñama nak nenlegasso ektémakxa m'a amya'a ektaqmela, yetlo apwasqápeykekxoho apmésso nak chá'a exchep ma'a Dios. 9 Ẽlwagkassegkek axta negko'o teyp Dios, ẽlwóneykha axta yaqwayam antamhagkok énxet'ák apkelpagkanamap, háwe eyke eñama m'a aqsok nenlane axta, apmopmenyého apagko' axta eyke m'a Dios, tén han eñama ektaqmeleykha apwáxok senlányo negko'o eyeynamo m'a sekxók axta, eñama negyepetcheyo m'a Cristo Jesús. 10 Enxekmowásamáxkók kaxwók negko'o m'a segásekhayo eyeymáxkoho nak, eñama m'a Cristo Jesús apteme nak Sẽlwagkasso teyp, apmasséssama axta ekmowána m'a nétsapma, tén han appekkeneykekxo axta neyseksa élseyéxma m'a negyennaqte megkamassegwayam, eñama m'a amya'a ektaqmela nak.
11 Dios axta ko'o setnéssesso yaqwayam añeksek se'e amya'a nak, eyáphassegkek axta nahan yaqwayam atnehek apchápháseykha, tén han sélxekmósso énámakkok. 12 Cháxa keñamak seklegeykegkoho nak ko'o ekyókxoho xa aqsok nak. Makke ko'o amegqaktók seklegassama xa, hakte ekya'ásegkók ko'o m'a may'ásseykmo nak chá'a; naqsók nahan ko'o ekteméssessók ekyetnama apmopwána yaqwayam hetaqmelchessesek ekweykmoho m'a néxa ekhem sepekkenchessamakxa axta yaqwayam alána'.
13 Étlow sa' xép ma'a nélxekmowásamáxche ektaqmela apxawáya axta exchep eñama ko'o, ná elwátéssem apteme mey'ásseyam tén han apkelásekhamakpoho ekyetnama nak negko'o eñama segmésso negyepetcheykekxa m'a Cristo Jesús. 14 Etaqmelches sa' xép ma'a nélxekmowásamáxche ektaqmela apchánémakpo axta exchep elána', yetlo appasmo m'a Espíritu Santo aphama nak egwáxok negko'o.
15 Apya'ásegkók xép seyamasma ko'o apyókxoho m'a énxet'ák apheykha nak yókxexma Asia; weykekxók nahan ma'a Figelo tén han ma'a Hermógenes. 16 Kapyóshok sa' elanok Wesse' egegkok ma'a ekheykha nak Onesíforo apxagkok, hakte hepeykessásekxohok axta chá'a ewáxok ma'a, axta nahan emegqaktók sélhésseykmo axta ko'o m'a sẽlpextétamakxa. 17 Appéweykentamók axta aqsa sétamseykto meyke apkellókasso apyampe apweykto axta Roma, ekwokmoho séteyeykekxo. 18 Wesse' egegkok sa' yohok éteyekxak ektémakxa nak apmopyósa henlanok ma'a ekhem nélyekpelchamáxchexa sa'. Apya'ásegkok xép, xámok axta sempasmo m'a Éfeso.
© © Enxet Lengua Sur Bible © Paraguayan Bible Society, 2015.