Ekxeyenma egwáxok
1 Ko'o Pablo, Silvano, tén han Timoteo. Negaphássessek negko'o ekxeyenma egwáxok énxet'ák melya'ásseyam apheykha nak Tesalónica apkelyepetcheykekxa nak Dios Egyáp tén han Wesse' egegkok Jesucristo. 2 Dios sa' epekkenek kélnepyeseksa kéxegke m'a ektémakxa nak segmésso naqsa ektaqmeleykha apwáxok henlano' tén han ma'a meyke ektáhakxa egwáxok apagkok.
Negmésso ekxeyenma egwáxok Dios tén han nélmaxnagko
3 Élyáxeg, kéméxcheyk chá'a negko'o agmések ekxeyenma egwáxok Dios kéxegke éñamakxa, ekpayhawo nak chá'a negko'o antéhek, hakte yáwegkek kélteme megkólya'ásseyam kéxegke, yágwokmók nahan ma'a ektémakxa nak kélásekhamaxkoho kéxegke. 4 Cháxa keñamak ektaqmeleykencha'a chá'a negko'o nenxeyenma kéxegke nepyeseksa Dios énxet'ák apagkok eñama kélwasqápeykekxoho, tén han megkólya'ásseyam kélxekmóssama nak kéxegke neyseksa ekyókxoho ektémakxa nak kélnaqtawáseykegkoho, tén han kéllegeykegkoho. 5 Cháxa senxekmósso negko'o ekteme ekpéwomo agko' ma'a ektémakxa nak segyekpelchémo Dios, yaqwayam sa' kaxének apwáxok ekpayhawo kólántexek kéxegke m'a aptémakxa nak Wesse' apwányam Dios eñama kéllegeykegkoho s'e kaxwo' nak.
6 Hakte payhawók ellegássesagkohok Dios ma'a énxet'ák apkellegassáseykegkoho nak kéxegke, 7 keñe kéxegke, kéllegeykegkoho nak, ellókassesek kélyampe, ekhawo nahan negko'óxa. Sa' eyke katnehek apwa'akto sa' Wesse' egegkok Jesús yetlo apkelásenneykha ekha nak apmopwancha'a xa, apkexyekmo sa' neyseksa táxa eyáléwe apkeñama m'a néten. 8 Ewaták sa' yaqwayam ellegássesagkohok ma'a énxet'ák melma nak takha' m'a Dios, tén han melyaheykekxoho nak ma'a Wesse' egegkok Jesús amya'a ektaqmela apagkok. 9 Kóllegássesagkohok sa' xa énxet'ák nak, yetlo kélmassésseyam meyke néxa, makhawók sa' kólchexakhagwók meykexa nak Wesse' egegkok, tén han apcheymákpoho tén han apmopwána, 10 cham'a apwa'akto sa' Wesse' egegkok xa ekhem nak, yaqwayam sa' kólteméssesek apcheymákpoho nepyeseksa énxet'ák apagkok, tén han etnehek apcháyo m'a apyókxoho énxet apteme nak melya'ásseyam; hakte axta kólya'asseykmok ma'a amya'a nenlegassama axta.
11 Cháxa keñamak nélmaxnéssessama nak chá'a kéxegke xa, nélmaxnéssessama chá'a Dios néltémo etnéssesek ekpayhémo m'a apkelwóneykencha'a axta kéxegke, tén han elának ekyókxoho m'a aqsok kélmámenyého nak kóllának kéxegke, eñama apmopwána tén han ma'a kéltamheykha eñama nak ektekkessesso m'a megkólya'ásseyam nak. 12 Cháxa keñamak peya sa' kólteméssesek eyeymáxkoho apwesey Wesse' egegkok Jesús eñama kéxegke, keñe sa' kéxegke etnéssesek kéleymáxkoho eñama apmésso naqsa ektémakxa ektaqmeleykha apwáxok elanok ma'a Dios egagkok tén han Wesse' egegkok Jesucristo.
© © Enxet Lengua Sur Bible © Paraguayan Bible Society, 2015.